Read tula Filibiyam 4 Bible Online

Filibiyam 4 - tula bible

Filibiyam 4

¹Di̱ne yiko, kebu mi̱m, n ti̱n bi̱bu mi̱n mi̱ladi̱mu, ti̱kuran mitu kwad mi̱n baddu mang ku nu chi̱n, n ti̱n bi̱bu ti̱yo ni̱r mi̱nu ki̱nwe ta̱ma̱nge, bi̱bu mi̱n ngau kwiye ki̱ni chi̱ni̱mu. Mi̱n wana chi̱nu ti̱tii ki̱ri̱ng we di̱Tewuduwe.

²N wu Yudiya n ti Sinti̱ki mi̱n ki̱tele, mi a do tibe chi a di̱n Tewuduwe.

³M mun fate nangangemi wuyile, mi̱n wananu maka nati̱bu bi̱bu. Di̱ne a nwe riye we nangang Kwamangu n ti mi̱n n ti Kilemen n ti bi̱kamu fati̱bu nangam, bi̱bu di̱nbi chitu we taki̱da ti̱kuriye.

⁴Ti̱swe ki̱ni furi mwen we kunkaku changu n ti Tewuduwe kwadu. Mang fwa ti̱nu ki̱da, ti̱swe ki̱ni furi mwen!

⁵Ti̱kabbi ki̱ni da wu bubbuke ni̱re we ka nang wuwule niiye. N Tewuduwe a mwatan ka bedu.

⁶Ti̱kuru chiwe, aya we chiti kwang ti̱ kabi ki̱ni twa̱ba̱ku buni ti̱nang bi̱u Kwama chi ta kwalan no ta yaditu ki̱ni di̱wan we ni̱tu chi̱ntu.

⁷Li̱mang Kwamangu a su Ki̱nati̱n we yinku niyangu, ka yo ni̱tu chi̱ntu n ti ti̱kuran chi̱ntu ka tidu a kana di̱Masiya Yesuwe.

⁸We kuteng ki̱ku, kebu mi̱m, ti̱nang ma ti̱kurantu we chi a bi̱yili̱me, n ti chi ka bedu ki̱ni niku dwiyene, ti̱tu a daatu, ti̱ti wa̱laki, chi baki, ti̱tu a lele, n ti ka ti̱ti̱le chiye kwang ti̱tu a leleitu, ti̱tu a lwe delaki.

⁹Ti̱ma nangangu ki̱ni chi ta miyanitu, ta yib a di̱mi̱nitu, ka ti̱tu ta nwe we di̱mi̱nitu ta ku mi̱n mati̱nitu. N Kwama naba li̱mange ka swedu ware n ti chi̱n.

¹⁰M ma ti̱mi̱lan yinang yinang we di̱Tewuduwe, di̱ne ki̱ka̱ngu ti̱yungi ti̱n ki̱da yinangu ti̱kuru ki̱ni mi̱nangu. N yim ka nang ki̱ki̱le ki̱dange ti̱ kuriyu, aya ta yabu da wu ta makaye.

¹¹Mang fwabu ti̱tu n ke di̱ne mang kwala ti̱kan chiye, n tu miyang yinangu mang swedu ki̱ni ni̱ri diin we chi m mi̱ni ki̱nitu.

¹²N yim yinangu mang swedu kasi no a ti̱ti̱le kwalang ne ka a kuliye. M miyan kangu mang swedu kasi no chitu a kabi yire, ka a rifure ka a chune, ka a nabwene ka bayi̱me.

¹³Mang medu mang ma ka ti̱ti̱le chiye a di̱Masiya wu ki̱ruiye.

¹⁴We yiko, a lele kangu ta makai we nwe riye miyangu.

¹⁵N ti̱n ni̱bu Filibiyam, a tayim yinang tiko ki̱dangu mang mwe mi̱n ma di̱mwar ya̱m bi̱li̱m we yo mang duwe Makidoniyangu, a ne ni̱bu bunti̱ki̱m a kunka dutu chitu n ti mi̱n we ni ki̱ku n ti yi̱kki̱ku kana ti̱n ti̱kun.

¹⁶Di̱ne kasi no nang ki̱dangu m mi̱n a Tasalonikangu, ti̱tum miye makaku ki̱ni chitu mi̱n badditu a la ki̱da kiine.

¹⁷Ti̱kamaduwe tiko mi̱n bau ki̱li̱mang we di̱ chi̱ne. A ne we yiko, mi̱n bau chitu ka su chimi̱n delaki.

¹⁸N ya chitu ta tumiyetu a lamiti̱la. Ki̱ka̱ngu mang tu mang yiu ki̱li̱mangu ta tume a fa̱la̱ng Abafaraditu. Ti̱tu niku ki̱ki fi̱rfi̱ra̱ng, niku ki̱yilang ki̱ku n Kwama ka yidang, ka nwe ta̱ma̱ng kange.

¹⁹N Kwamami ka ni chi̱n kasi no ti̱ti̱le chi ti̱tu ti̱baditi kwang, ka swe ti̱nu we nabwe delaku kangu a di̱Masiya Yesuwe.

²⁰Dwiyentu n ti̱u Kwama Te chire ki̱diya kwadu. Amin.

²¹Ti̱sii ni̱bu bunti̱ki̱m Kwamamu bi̱bu m bi̱u Masiya Yesumu. Kebi̱bu a fimu ki̱si chi̱n tedu.

²²Ni̱bu bunti̱ki̱mi kwang ki̱sii chinedu, tiyang kasi bi̱bu a lo Mai Kaisare.

²³Li̱me Tewuduwe Yesu Masiya a swe ware n ti chi̱n. Amin.