Read tula Kolosiyam 1 Bible Online

Kolosiyam 1 - tula bible

Kolosiyam 1

¹M mi̱n Bulus wu a mwal lwangi̱n di̱de, m mi̱n Fandu Masiya di̱ne n Kwama a suti ko n kau Fandu. M mi̱n ti Timoti ke chire ni̱n si chi̱nu,

²min mwal chinminu n ti̱n kebu ni̱bu bunti̱ki̱m bi̱bu ki̱bunti̱ Kwama ki̱ni da wuyile a Kolosimu. Li̱me Kwama n ti li̱mang kangu a swe ware n ti chi̱n.

³Kanang ki̱ki̱le ki̱dang ni̱n twa̱ba̱ chimi̱n buniyange, ni̱n wana Kwama Te Tewuduwe Yesu Masiya.

⁴Nangki̱n, ni̱n nwe yinangu ta ke bi̱yili̱mu we di̱Yesu Masiyangu, n ti yinangu ta mi̱la ni̱bu Kwamangu.

⁵Chi a yo ti̱madi yiko, di̱ne yo ni̱re chi̱n we chi ti̱yilitu a yang chimi̱n a bwaditu. Bi̱bu nang ya̱m bi̱li̱mu ta nwe feredimu, nang di̱kwa̱l di̱yiili̱nu ta tu ta nwenu.

⁶Ya̱m bi̱biini̱m bi̱bu a be chimi̱nemu ki̱ti̱radu we wule ti̱ti̱niye kwang, ki̱sute datiyu a lebiyu yinangu a sute yichiyu we di ta mwe ta nweeng ya̱me, yinu ta swaan bi̱yili̱m Kwamamu we li̱me wu a ma ni̱bu ki̱letimu mi̱ne.

⁷Bi̱bu nang ya̱m n Abafaraditu a miya chimi̱ni̱mu, n ki̱n ke chire naba nangange, wu n ki̱n naba nangan Masiya wu yile, n ki̱n ki̱maka ni̱nnu ki̱ma nangang ki̱ku a sute chi̱n.

⁸N ki̱n nang wu a fwa ni̱mi̱n yinangu Fi̱ki̱m Kwamamu a maka chi̱n ta mi̱la ni̱bu bunti̱ki̱mi kwange.

⁹Di̱ne ya̱mu nang nwemu, ni̱n chakakku ki̱ni twa̱ba̱ki̱ku di̱ne chi̱ne. Ni̱n twa̱ba̱ Kwama a yung chi̱n chi n ki̱n ki̱baddu ta made. Ni̱n twa̱ba̱ chimi̱n ti̱n ke Fi̱ki̱mu a ni chi̱n kasan n ti swaanku.

¹⁰We yiko ke dati chiyu a li̱ma Kwama bwi, ke ti̱chakakku ki̱ni nangang ki̱yilangu, ti̱nang maka bi̱kamu we chi ti̱yiliti kwang. We yiko ta swaanu yinangu a dakan ta yim Kwamangu.

¹¹Ni̱n twa̱ba̱ chimi̱n ti̱nu ke n Kwama a rub chi̱n we ne dukan ki̱nu a ribu riye ke ti̱me ti̱ma bwanu ti̱mu ni̱ru ki̱ni ti̱mi̱lan we riye ti̱nwede.

¹²Ti̱nang wana Kwama Te chire, n ki̱n wu a yo chintuwe bi̱bu ka ya ki̱ti̱me kula a yang ni̱bu ki̱mu mi̱n a bwadiye.

¹³Di̱ne n Kwama a chake ni we dukan Setan a ki̱liyenu, a be ki̱ni chi̱ni a mati̱n bwe ni̱re ko n ki̱n a mi̱lane,

¹⁴wu a tu ni ki̱ni ki̱tuum bwe komu, a da̱u ki̱leti chireyu.

¹⁵N Yesu nang chirkaku Kwaman wu niyang kube, n ki̱n nang wu ki̱ni dukanu we kanang ti̱ti̱le chiye a yonti kwang.

¹⁶N Yesu nang wu n Kwama a yo chitu a twiyetu n ti ti̱tu a ti̱ti̱niti kwang, n ti chi ni kude n ti chi̱ niyang kubitu, mati̱mu, n ti bi̱bu ki̱ma mati̱n ne, n ti yaatiyu, bi̱bu ki̱mati̱ni̱mu, dukan yili̱ni̱mu. Chiti kwang a kau a di̱ki̱ne di̱ne n ki̱n a ke yiko.

¹⁷Masiya we yo ka ti̱ti̱le chiye a mwe. N ki̱n nang wu a yo ka nang ti̱ti̱le chiye ki̱ swedu li̱mange.

¹⁸N Yesu nang Mai we ni̱bu bunti̱ki̱mu. N ki̱n nang wa̱re ti̱kuriye, we yiko n ki̱n nang wu n Kwama a kuku we fure a ne ka bwa ti̱nuwe ki̱da, we ka ti̱ti̱le chiye kwang n ki̱n Mai we chitu ki̱ni kwang.

¹⁹N Kwama n ki̱fwan a ke Bweko ka kaddu yinang ki̱n di̱mbi̱ri̱m.

²⁰N Kwama a doka chiti kwang a di̱ki̱ne, chi a twiye n ti ti̱tu a ti̱ti̱nitu, a yo li̱mangu a swe di̱ne ki̱tuum bwekomu a ki̱tiyang bwangu.

²¹Feredi a no nga̱ we tibe chi̱n n ti̱ Kwama, ti̱kau fakwarbu Kwamam we ti̱kuran ti̱kusi chi̱ntu di̱ne bwila ta chakakku ti̱ti̱maditu.

²²Aya ki̱ka̱ngu, n ki̱n a doka tibeko n ti chi̱n we Masiya wu a kau niye a bwati̱ne, ke a mar chi̱n ti̱kau ni̱bu wauwadi̱m, bi̱bi wa̱la̱k a ne der we kakku Kwamangu.

²³Aya a mwituwe ta chakakku ki̱ni keku bi̱yili̱mang changu, ti̱ti ki̱ri̱ng yinang lo a rub a tame wuyile. Ti̱kedu chi a bi̱nglu chi̱nu we yo ni̱re n Kwama a bwa̱u chimi̱n we ya̱m bi̱li̱m bi̱bu. Bi̱bu nang ya̱m bi̱li̱m bi̱biini̱m ta tu ta nwemu. Bi̱bu nang ya̱m bi̱li̱m bi̱bu ni̱bu nangang Kwama a mwa ni̱bu we ti̱ti̱niti kwange, m mi̱n Bulus, ka̱be Kwama a yo mi̱n n kau wuka naba di̱mware ko.

²⁴Ki̱kangu m ma furi mwemwen we riye mi̱n nwedu di̱ne chi̱n ni̱bu bunti̱ki̱m a yikai kuutimu, yinu n ke mang nwe riye we chiti kwang Masiya a bau mang nwedu di̱ne ki̱ne. Ke m maka ni̱bu ki̱mu bi̱bu yinang bwikiye.

²⁵N Kwama a suti ko ke n kau naba nanga ni̱bu bunti̱ki̱m. A ni nangang ki̱ku ko ke m maka chi̱n, m ma kasi di̱mwar Kwamanu yinangu a daka mi̱nangu.

²⁶Ya̱m bi̱bu mi̱n fwa chimi̱ndi̱mu n Kwama a wudubu ni̱bu feredimu mi̱nbu. Aya ki̱ka̱ngu a wudu ni̱bu ki̱ bunki̱mi̱n ti̱numu mi̱n.

²⁷Nangki̱n a li̱ma Kwama ni̱r ka fwa ni̱bu ki̱mu mi̱n ko kulitu n ti dwiyen Masiyatu n ti̱u yikayu kuuti ti̱n. Ti̱tu nang chitu a no lai ni̱bitu: Ti̱tu a yung m Masiya we ware n ti chi̱n we ni̱tu chi̱ntu ti̱n yikayu kuti, we yiko ti̱yim ta swedu ware we ki̱di̱ng mati̱ne n ti Kwama.

²⁸Nang chi a yo ni̱n fwa ka nang wuwule niye mi̱n ya̱m Masiyamu. Nii wu chimi̱n ki̱tele, ni miya ni̱bu mi̱n ki̱ni kasantu Kwama a ni chinitu. Ni baddu ka lam kakku Kwamangi dumbi̱ri̱m we kunkaku chiyangu n ti Masiya.

²⁹Nang chi a yo mi̱ni bobu we nangange. Mi̱n funti̱bwi ki̱ni nabwe dukan Masiyanu ki̱makayi ki̱ni̱mu.