Read tula Kolosiyam 2 Bible Online

Kolosiyam 2 - tula bible

Kolosiyam 2

¹Aya mi̱n baddu ta yindu tiko nabwe riye mi̱n nwede di̱ne ke n maka chi̱n n ti ni̱bu bunti̱ki̱mu a Lawudukiya, n ti bi̱kamu ni̱bu bunti̱ki̱m a yimbi̱ mi̱n kabu n ti ka̱be.

²Mi̱n madi ying mi ke n ru chi̱n kwang a Fi̱ki̱m Kwamam, mi̱n baddu ti̱ni ki̱ni kwang ti̱ mi̱la yichiyu we yiko ti̱kunkan ware, mi̱n baddu ta ya delaki̱ku ki̱ya̱r ni yiiyangu ki̱ku ki̱ bunte swaangku ya̱m Kwamamu yo ni yim yinange. Ke n chi a yim chi ti̱lairi Kwamatu, ka nang chikiye m Masiya ki̱fwan.

³We di̱ki̱ne a lai kuli ti̱tu a swaanku kasan yingku ya̱m Kwamantu.

⁴Mi̱n fwa chimi̱n bi̱bu, ke wuka nii a buti̱du chi̱n we, wu ka yodu ta kudu yinangu ki̱fwa bi̱yili̱mange.

⁵Kasi ki̱ku mang newe n ti chi̱n kabu n ti kabangu, aya ni̱r mi̱nu n we n ti chi̱n we Fi̱ki̱mu. Mi̱n ma ti̱mi̱lantu yinang kangu mi̱n nwedu yinangu ta ti ware ki̱ri̱ng ti̱funti̱ bwi we keku bi̱yili̱mang changu a di̱Masiya.

⁶Ki̱ka̱ngu ta yiu Yesu Masiya a kau Tewuduwe chi̱nangu, a le ti̱ chakakku ti̱nang bunti̱n da ko.

⁷Ti̱ti we keku bi̱yili̱mang changu ki̱ri̱ng we di̱ki̱ne, ti̱chakakku ti̱nang duyedu we yo ni̱re. Tiyangu ni̱bu a miya chimi̱nangu. Ti̱chakakku ti̱nang wana Kwama.

⁸Ti̱ma dandan, ti̱kedu wuka nii a buti̱du chi̱n we ki̱ni miyaku chiyangu, chi n chi ki̱miyade ti̱kusi n ti ti̱kwani a ne bi̱yili̱m we, n chi ki̱miya ya̱mi daati ni̱bi n ti chi a ti̱ti̱niye n ke bi̱u Masiya.

⁹Di̱ne we di̱Masiya wu a kau yinang niye, Kwamai kitu we.

¹⁰Aya n ti̱n di̱ne kunkaku changu n ti Masiyangu, Fi̱ki̱m Kwamamu a lwe chi̱n di̱ne n ki̱n nang Mai wa mati̱m ki̱ma mati̱n ne n ti wu ki̱ni dukane.

¹¹Di̱ne kunkaku changu n ti Masiya, a kau n ti̱n yinang bi̱bu a bi laaram. A yung a chaku da bwiye chi̱n. Mang fwabu biku laarang ki̱ku a bwiyang, aya chaki̱ku da bwiye n Masiya a ma chimi̱ne.

¹²Ki̱dangu ni̱bu a ma chimi̱n batismangu, n ki̱n a nura we da bwiye, n ki̱n a bwa a fur ki̱n yinangu a fur Masiya. A kuku chi̱n n ti ki̱n ki̱ni da wufwiye tiyangu a kukku Masiyangu. We keki̱ bi̱yili̱mang changu we dukan Kwamanu a ki̱ku ki̱n we fure.

¹³Feredi n chi̱n no ti̱ma kutan we di̱Kwama di̱ne ki̱leti chiyu, n ti biku laarangu di̱ne ki̱leti chiyu a da wa bwiye. Aya n Kwama a kuku chi̱n a ni chi̱n ti̱kuri ti̱fwi n ti Masiya. A du nimi̱n ki̱leti chireiyu.

¹⁴N Kwama a nuran ki̱letiyu a no a dur chi̱renu. N ki̱n a da̱u ki̱letiyu a ki̱tiyang bwang.

¹⁵N ki̱n a la dukan mati̱n ki̱fi̱btinu n ti dukan mati̱ni̱mu, n ki̱n a ni chi dibwi yi kwa̱rikwa̱ri. N ki̱n a yung ki̱chau ki̱la we ki̱tiyang bwangu.

¹⁶Di̱ne yiko ti̱kedu wuka nii a swa̱badu chi̱n we di̱ne ti̱chau ti̱tu, ka ti̱ no ti̱te, di̱ne ta bungabu n ti chi we yikayu yeni ka yilang difi̱kare ni̱bu Yafudam ka ki̱ku a swange.

¹⁷Ti̱ti kwang ka ki̱wulang, ki̱ku ki̱yung ni̱bu mi̱n chitu ka fweditu, a ya n Masiya nang kasi chiti siine.

¹⁸Ti̱kedu ni a swaki̱du chi̱n we ko a mwituwe ti̱sung ti̱si ni̱bu ti̱tumbi̱ri, wu ka yodu ta kwala ki̱ti̱me chi̱ni ki̱ne, ni̱bu bi̱bu ko n chi ki̱ni kaang yingku we di̱Kwama di̱ne a ku dwakam bi̱yili̱m. Aya ki̱kukku ka dur ki̱n a ne ki̱kwi we, ki̱ma ka ti̱kuran bwiyen.

¹⁹N ki̱n a du keku bi̱yili̱mangu n ti miyaku ki̱yilang Masiyangu. Yinangu tikake ki̱ni kwa̱l ki̱nangu, m Masiya a ti ni̱bu ki̱mu mi̱n kakku ki̱ni kwang a kabbi wiin, a kwarkan a fiwiine yinangu mer ki̱ taba chitu a fiwiineng. Ki̱dwiyedu yinangu n Kwama a do ka fwedang.

²⁰Yinangu ta bwa n ti Masiyangu, yili̱n ti̱ti̱nitu a ne dukan we dur chi̱nu. Di̱ne yiko a mayire ti̱nabu yili̱n ti̱tu chiku yinangu n ti̱n we ti̱ti̱niti chikke?

²¹Yili̱n ti̱tu n nang, “Ti̱tadu ti̱tu we, ti̱chadu ti̱tu wenge, ti̱twaiyu ti̱tu we.”

²²Ti̱tu ki̱yung chi ka ni ma nangangi ki̱ne a ne ti ke ni wasu ti̱nu a bwa. Di̱ne ti̱tu ka yilang n ti miyaku niyang.

²³Yili̱n ti̱tu ki̱yungdu yinang kasan ti̱yili. Nangki̱n ki̱ miya ni̱bu mi̱n kwa̱mbi̱r, ke a yung ni ki̱bunti̱ Kwama yinang yinang ki̱ni bwanu, ki̱swa̱ba̱ yichiyu, ki̱ni bwi chi riye, aya yili̱n ti̱tu a makabu ni̱bu n chi a dubu ti̱kuran ti̱bwilantu.