Read tula Kolosiyam 3 Bible Online

Kolosiyam 3 - tula bible

Kolosiyam 3

¹Di̱ne n Kwama a ni chi̱n ti̱kuri ti̱fwi yinangu ta kun n ti Masiyangu, ti̱funbwi kwadu ti̱nang bau kana chi a bwa diye. We bwa diye n Masiya a swe a kang ki̱yilang Kwamang.

²Ti̱yo ti̱kuran chi̱ntu a chitu a bwadiyentu, n ke chi ti̱bwilai ti̱tu ni̱bu a yimbu Kwama ki̱ tunde.

³Yo ta bwa n ti Masiya, yinu ti̱kuri chi̱ntu ki̱kangu a lai ware n ti Maisiya we kakku Kwama wu niyang kube.

⁴Aya yo n Yesu Masiya wu nang di̱bwa̱r ti̱kuri chi̱nu ka ki̱lade, n ti̱n ta kundu ware we dwiyen kitu.

⁵Di̱ne yiko, ti̱du nangi̱ ti̱bwila chi̱ntu ki̱yadu a fiwiine n ti da bwiye, yinang ki̱kulbu we, n ti̱ wa̱ri yariye, ka kubeke, ti̱kubedu chi ti̱bwilai we, n ti ki̱dwanki, di̱ne ki̱dwanki beka kau chimi̱n di̱yor.

⁶Di̱ne ni̱bu ki̱mi̱la maku ti̱bwitani̱mu, ki̱fwini Kwama ki̱bedu we ni̱bu a ko a bunki̱mi̱nti̱bi̱mu.[1]

⁷N ti̱n ti̱fwan ti̱dwala we wa̱re yibwilayu yo ferediye yo n ti̱n we da wu bwilange.

⁸Aya ki̱ka̱ngu ti̱mati̱nu ti̱tu we ki̱da fal. Ti̱madu ki̱fwini we n ti ni̱r dukwani̱nu, n ti da wubwila, n ti ti̱turantu, n ti swa̱ba ku.

⁹Ti̱mwedu yichiyu mi̱nu ti̱kwanitu we. Ti̱madu kwa̱li̱n chi̱n di̱du we kangu ta kwer ta du bwila n ti yayu no ti̱ yadengu.

¹⁰Aya ki̱ka̱ngu ta ke ki̱ni Masiya, ki̱ka̱ngu ti̱suten ti̱kau bi̱kam duum ni̱bi̱m. N Kwama a yo chimi̱n da wufwiye, n ki̱n ki̱dosa chi̱nu ki̱dati kwang ke ti̱ kau yinang ki̱n ke n ti̱yim ki̱ni siin.

¹¹Yo n Kwama a kwer a mar mun wufwiye niye, ka m mun naba ni̱bu Yafuda ka naba Yelena ka bi̱biini̱m. Ka wu a bilaare ka wu a bibu laare, kwang a fiwiine. Ti̱nti̱ne ka m mun bwe kuwe ka wu a kasabe, ka̱be ka n ke ka̱be. N Yesu Masiya nang chi a la chiye, n ki̱n ki̱swedu n ti ka nang wuwule niye.

¹²Di̱ne yiko yo kwer n Kwama a sutu chi̱n ti̱ kau ni̱bu ki̱m, a mi̱la chi̱n, ti̱kabi ki̱ni ki̱bune, ki̱ni ki̱li̱mang, ki̱ni si̱kki̱ku durang, ki̱ni bubbuke ni̱re, n ti bwanu.

¹³Aya tama bwanu ki̱ni ni̱bi kwang, ka wuka nii a ma chi mi̱n ki̱lenge, ti̱du ki̱mi̱n, a fiwiine tiyang kangu n Tewuduwe a dub chimangu ti̱dub chi mi̱n ti̱n.

¹⁴We chitu ki̱ni kwang chi a la chiye ti̱mi̱la yichiyu, wu a bwa̱u chi̱ni kwang a fiwiine we fiswe li̱mange.

¹⁵Ti̱du li̱mang Masiya a maka chi̱n we chitu ti̱maditi kwang, di̱ne li̱mang ki̱ku n Kwama a yo ti̱kau bwi wiin, ti̱nang wana Kwama kwadu.

¹⁶Ti̱yam ya̱m Masiya mu a swe we ni̱tu chi̱ntu yinang yinang ti̱nang miya kebu chimu mi̱n ti̱nu ti̱na wu chi mi̱n ti̱n ki̱tele ki̱ni yinku n ti kabaku Sabura n ti teni n ti teni delaki ti̱nang wana Kwama we ni̱tu chi̱ntu.

¹⁷Aya kasi no ti̱ma ti̱ti̱le chi ki̱ni kwang ka chi ta fwade ka chi ta made, ti̱ma ki̱ni kwang a di̱n Tewuduwe Yesu, ti̱nang wana Kwama Te we di̱ki̱ne.

¹⁸N ti̱n nati̱bu ki̱namu ti̱bunti̱ kwartabu chimu yinangu a dakan naye bunti̱ke ka bunti̱ Tewuduwe.

¹⁹N ti̱n kwartabu ti̱mi̱la nati̱bu chimu, ti̱tau chi yinang.

²⁰N ti̱n bwesi̱mu, ti̱bunti̱ kasi no ti̱ti̱le chi ti̱tu tebu chimu ki̱baddu ta maditu. Di̱ne nang chi n Kwama ki̱badde.

²¹N ti̱n Tebi̱bu, ti̱yodu bwesi̱mu a madu ki̱fwiniwe nabwen, ke bwi chiyu a mwana madu we ki̱ri̱m we funti̱ku bwiyangu.

²²N ti̱n ka̱biyu ti̱bunti̱ tebi̱lom chimu bi̱bu a ti̱ti̱nimu we chitu ti̱maditi kwang. Ti̱li̱ma chimi̱n ni̱ru kasi no fere. N ke kana yo a fi̱r chimi̱nti̱ nu we yinangu ti̱ma nangange ke n chi a weer chi̱ne. Ti̱bun chimi̱n ti̱n ki̱ni ni̱ri diin ka nang wuwule yo, di̱ne ti̱bunti̱ Tewuduwe.

²³Kasi no ti̱ma ti̱ti̱le chiye, ti̱ma yinangu a dakan ki̱ni nuri diin yinangu ti̱ma Kwama mi̱nu n ke niyang.

²⁴Ti̱tabbi̱duwe ti n Kwama ka ni chi̱n ki̱ti̱me wu a kula, di̱ne telo ti̱siide nang Masiya.

²⁵Aya ka ti̱n ka̱biyu ti̱ma chi a lebe, ta yati̱ ki̱ti̱me chi a lebe. Di̱ne we kabaki̱ Kwamangu a ne sutukuwe.