Read tula Kolosiyam 4 Bible Online

Kolosiyam 4 - tula bible

Kolosiyam 4

¹N ti̱n tebi̱lomu ti̱tau kabi chiyu yinangu a dakanang. Di̱ne ti̱yim n ti̱ni ki̱ni telo ti̱nti̱n we bwadi.

²Ti̱funti̱ bwi ti̱chakakku ki̱ni twa̱ba̱ku ki̱ku, yo ti̱twa̱ba̱ bunite ti̱swe ki̱ni ki̱yolangu ti̱nang wana Kwama.

³Ti̱nang twa̱ba̱ ni̱mi̱n ti̱nu yinangu Kwama ka wudu ni̱mi̱n kwa̱ru ka ni ni̱n da nang mwa di̱mwar we ti̱lairi Yesu Masiya wu n chi a no swaanbu ferediye. Di̱ne nang ya̱m bi̱bu a yo mang le di̱bi̱nti̱li̱mu.

⁴Ti̱twa̱ba̱mi bunitu ke m ma di̱mwar di̱di tas yinangu a dakanang a ne taiwe.

⁵Ti̱ya yayu ki̱ni kasan we tibe ni̱bu bi̱bu a bunti̱bu Yesumu. We ka nang wuwule ki̱swi ta yange ti̱ma nangangi ki̱n.

⁶We yitaku ya̱ma̱ngu, ti̱fwa ki̱ni yii li̱me yinangu ka li̱ma kawure bwiyangu, ke ti̱yim yinangu ta ni ka nang wuwule niye di̱ki̱li̱n yiinangu.

⁷N Tikiku ka fwa chimi̱n chi a tau ki̱fwedu n ti mi̱nitu. N ki̱n kasi ke chire wa bunti̱ke wu nang mi̱lane. N ki̱n ki̱ma nangang Tewuduwe yinangu a dakanang ware n ti mi̱n.

⁸Chi a yo mang tum ki̱n we di̱chine, mi ke a fwa chimi̱n kangu ni̱n we mi̱nangu, ke ti̱yim yinangu ni̱n madangu. Ti̱nti̱ne ke a kum chimi̱n ni̱ti̱tu.

⁹N ki̱n ki̱ bungadu n ti Onisimu, kasi ke chire wu yile wa bunti̱ke mang mi̱lan di̱ne kwa̱mbi̱r ki̱ne, n ki̱n a be a ti̱m chim. N Chi ki̱ni burako ka fwa chimi̱n chitu ki̱fwedu we fiintu.

¹⁰N Aristakus, fate mi ni̱bu a kwau ni̱n ware ko n siiti̱ chi̱n. M Markus wu tuke chi wiin n ti Barnaba, (N ki̱n nang wu mang tu mang fwa ya̱m a dur ki̱n mi ka a benge ti̱yiu ki̱ne)

¹¹N Yesu wu n chi ki̱yalu ko n Yustuse ki̱siite chi̱nu ti̱nti̱n. Ni̱bu bi̱bi bi̱tamu nang ni̱bu Yafudam we bi̱bu a bii laar a ni dutu chi̱ntu ki̱ma nangang di̱ne Yaa Kwama n ti mi̱ni̱mu. N chi a makai yinang.

¹²N Abafaraditu naba bi̱n chi̱ne, wu n ki̱n naba nanga Yesu Masiya ki̱siite chi̱nu. Ki̱twa̱ba̱ chimi̱n buniti kwadu yinang yinang ko ke ti̱ti ki̱ri̱ng we ki̱ke Kwama, ti̱kau bi̱bu a kwalabi̱ chim, bi̱bu ki̱ma chi Kwama ki̱badde, a ne kamaku we.

¹³M mi̱n mi̱fwan mang fwa chi mi̱nu mi a Abafaraditu ki̱ma nangu bobu di̱ne chi̱ne, n ti bi̱bu a Lawudukiyamu n ti bi̱bu a Yirafolisi̱mu.

¹⁴N Luka naba yinenge ni mi̱lade, n ti Dimas ki̱sii te chi̱nu.

¹⁵Ti̱sii mi kebu ni̱bu bunti̱ki̱mu a Lawudukiyamu n ti Nimfa n ti ni̱bu bunti̱ki̱mu ki̱muradu a lokomu.

¹⁶A kutengu ni̱bu a ki chimi̱n lwangi̱n di̱de, ti̱yo wuka ni a ya kii ni̱bu bunti̱ki̱mu a Lawudukiyamu mi̱n, n ti̱n ti̱n ti̱ki lwangi̱n di̱du mang tum ni̱bu Lawudukiya mi̱n ti̱ne.

¹⁷Ti̱fwa Arkibus mi̱n ti̱n ko a mwintuwe n ki̱n ka swan nangangu n Tewuduwe a ni ki̱nangu.

¹⁸M mi̱n Bulus mi̱n fwan, mi̱n mwal chimi̱n lwangi̱n di̱du ki̱ni fa̱la̱ng mang. Ti̱tabbi̱duwe m mi̱n n we di̱bi̱nti̱li̱nu ti̱na twa̱ba̱ bunitu di̱ne mi̱n. Li̱me Kwama a swe ware n ti chi̱n.