Read tula 1 Tassalonika 3 Bible Online

1 Tassalonika 3 - tula bible

1 Tassalonika 3

¹A kuteng ki̱ku nang ku chitu a ma bwarangu, ni̱n sute ti̱kuran ni̱ntu ni̱n swe n ni̱kun a Atina.

²Yinu ni̱n tum Timoti ke ni̱n ma nangang ware ko a ya chimi̱n di̱siir ya̱m bi̱li̱mi̱m Masiyam. Ni̱n tung ki̱n ke a maka chi̱n a kum chimi̱n ni̱tu ke ti̱ke bi̱yili̱mu ki̱ni dukan, ti̱chakakku ki̱ni keku bi̱yili̱mangu.

³Ke a maka chi̱n ti̱wulu tayi fumaki̱ku ti̱yadangu we. We bi̱yili̱mu a dakan ta yindu tiko duum fumaki̱m bi̱bu ka fwedu n ti ni̱bu bunti̱ki̱mu.

⁴Kasi no nang ki̱dangu n ti chi̱nangu, ni̱n wu chimi̱n ki̱tele ko fumaku ki̱bedu, a fwe ti̱ni yiko yinangu ta kuwangu.

⁵Nang chi a yo yinangu chitu a la dukan mi̱nangu, n tum Timoti mi a ya̱nti̱la miye ka keku bi̱yili̱mang changu we ki̱ni ki̱ri̱nge. Mi̱n wulu mi ka kano Setan a butu chi̱ne, a yo nangang nangu a kau ti̱kusiye.

⁶N Timoti a ki̱la ki̱ka̱ng ko keku bi̱yili̱mang changu n ti mi̱laku a ma dukan a lati̱ ki̱ki kwadangu. A fwa ko ti̱kur siram ni̱mu ki̱ni furi mwen yinu ko ti̱badu we ta ku ni̱nu yinangu n ni̱n bati̱nu nang ku chi̱nangu.

⁷Di̱ne yiko kebu ni̱n ya dukanu we ni̱tu ni̱ntu ki̱ni chi ni̱n made kwang di̱ne keku bi̱yili̱mang changu.

⁸Ni̱n nwe ta̱ma̱ng fiswengu, yo kwer ta ti ki̱ri̱ng we Tewuduwe.

⁹Kanodu nang wana Kwama yire di̱ne chi̱ne, di̱ne n ni̱nni ti̱mi̱lantu nabwen we kakku Kwamangu di̱ne chi̱ne.

¹⁰Kum n ti kuko ni̱nni bob ni̱n twa̱ba̱ chimi̱n buni, ni̱n bi̱u Kwama ko a yo ni kukatuwe ki̱da ke ni̱n do chi a no dubbe we keku bi̱yili̱mang changu.

¹¹Yam Kwama n ki̱fwan, Te chire n ti Tewuduwe Yesu yo a fwe daatu ni̱n ya bwana di̱chi̱ne.

¹²N Tewuduwe a yo mi̱laku changu a dwiyen we yichiyu, ke ni̱bu a chakakku we duiyeki̱ku yinang kangu mi̱laki̱ nangu a ti̱ran a lanti̱ chi̱nangu.

¹³Di̱ne yiko n Masiya ka yo ni̱tu chi̱ntu ka rudu, a ne der we, ti̱nti̱ne bi̱bi wauwadi̱m Kwamam we diko wu n Tewuduwe Yesu ka bungadu n ti bi̱bu n bi̱kki̱ni̱mi kwang.