Read tula 1 Tassalonika 5 Bible Online

1 Tassalonika 5 - tula bible

1 Tassalonika 5

¹Kebi̱mi̱m, we ya̱mu ka yire ka fere ki̱chiti̱wu ka n ke chi a mwinti̱buwe mang mwal chimi̱nde.

²Ti̱tu ti̱yim ti di ki̱lake Tewuduwe ka bedu a ne di̱mwar we, yinang yo daaku a be ka ma kute.

³Yo ni̱bu ka lekadu n kawure ko ti̱mu a li̱mi buke, nang ki̱dangu ti̱mu ka mulmedu yinang yo burang luran ki̱bu naye a ne bwa ka wulinde we.

⁴Kebu mi̱m, n ti̱n a newe a ki̱liye, wu di a ne beka fuka chi̱nu fukane yinang da kute.

⁵Nangki̱n, n ti̱n bwesi̱m bi̱bu a yiiki̱m n ti bi̱bu a kukom, n ti̱n n ke bi̱bu a ki̱liye ka kummem.

⁶Di̱ne yiko, ni kabi ki̱ni doku bwiyang yinang, ni dadu dum we yinang bi̱bu a kebu bi̱yili̱mang. N ti ki̱ki yikongu, ni mibani bobu we nangi̱n ti̱yili chi̱retu.

⁷Ni̱bu ki̱ da duumi, kum, bi̱bu a nori̱ni̱mu, ki̱la bwi chiyi kum.

⁸Aya yo n chi̱ni bi̱bu a yiiki̱mu, ni swe ki̱ni swaanki̱ we dutu chi̱rentu, ni so bwi ki̱ni keku bi̱yili̱mangu yinang kuli̱n kunni̱n n ti mi̱laku, yinu yo ni̱re wu a yuke a kau nimi̱n di̱dun di̱du a ka̱mbi̱ri̱n.

⁹Nangki̱n, n Kwama a sutubi̱ ni ko ke ni twai ki̱fwini ko, aya n ki̱n a ke ka yu nidu a di̱n Tewuduwe Yesu Masiya,

¹⁰Di̱ne yiko ti̱ kum yichiyu mi̱n ni̱ti̱tu, n ki̱n a bwa di̱ne chi̱ni ko ke ni swe ware n ti ki̱n ki̱diya kwadu.

¹¹Kebi̱mi̱m, ti̱ kunka dutu chi̱ntu, ti̱maka yichiyu ti̱dwiyen a di̱n Yesunu yinangu ta tu ti̱madangu.

¹²Di̱ne yiko kebu mi̱m, ti̱ni bi̱bu ki̱ma nangang Kwamamu dwiyentu, a ma nangangu yinang ka dakan we tibe chi̱n.

¹³Ti̱ni chi dwiyen ti̱tu a dakani tau chi ki̱ni ki̱siyang ki̱duwang, ti̱mi̱la chi di̱ne nangang chiyangu. Ti̱ma fiswe li̱mange we tibe chi̱n.

¹⁴Ni̱n wana chi̱nu kebu mi̱m, ti̱ma bi̱bi bubbuki̱mu mi̱n ti̱welan ti̱ kum bi̱bu ni̱tu chitu a mabi̱ dukani̱mu mi̱n ni̱tu. Ti̱maka bi̱bu a ne dukan wemu, ti̱ma bwanu we chiti kwang.

¹⁵Ti̱twar bi̱bu. Ti̱madu ki̱yerang we kasi no a di̱di̱le muli̱n. Aya ka nang ki̱ki̱le ki̱dange, n kawure a funti̱ bwi a ma fate mi̱n chi a lelei n ti kasi no n wure.

¹⁶Ti̱kabbi ki̱ni ti̱mi̱lan diti ki̱da̱ng.

¹⁷Ti̱dudu twa̱ba̱ku buniyangu we.

¹⁸Ti̱kabi ki̱ni di̱wan we kasi no ti̱ti̱le chi, Nangki̱n ti̱tu nang chi Kwama ki̱baddu a ni̱bu Yesu Masiyame.

¹⁹Ti̱chidu Fi̱ki̱m Kwamamu we bwi chiyu.

²⁰Ti̱swa̱ba̱du ya̱m fa̱kumu a wudu wuka mi̱ni̱n mu we.

²¹Aya ti̱swa̱ka̱ yaminmiyu ti̱tau chii a lelentu.

²²Ti̱kedu kasi no bi̱bi̱le duum muli̱ni̱m we,

²³N twa̱ba̱ bunitu we Kwama wu ki̱ni ni̱bu ki̱mu li̱mange a yo chi̱n yi wawad, a sute chi̱n ti̱ kau ni̱bu bi̱bu ki̱ li̱ma Kwama ni̱ri̱m, mi̱n twa̱ba̱du mi Fi̱ki̱m chimu n ti ti̱kuri chi̱ntu n ti bwi chiyu a kau a ne der we, a lami̱n yo n Yesu Masiya Tewuduwe ka ki̱lade.

²⁴Yo n Kwama nang wu a yal chi̱ne, n yim a ne kwiyadu ka ma chi n ki̱n a fwatu.

²⁵Kebu mi̱m ti̱twa̱ba̱ ni̱mi̱n buni.

²⁶Ti̱sii kebu mi̱mi kwang ki̱ni di̱siir kwarkaki̱n a ni̱bu bunti̱ki̱me.

²⁷Kebu mi̱m, n du chi̱n ti Tewuduwe, ti̱ki kebi̱bu mi̱n lwangi̱n di̱du kwang.

²⁸Yam li̱me Yesu Masiya Tewuduwe chire a swe ware n ti chi̱n.