Read tula 2 Tassalonika 1 Bible Online

2 Tassalonika 1 - tula bible

2 Tassalonika 1

¹M Bulus a mwal ni̱bu bunti̱ki̱m bi̱bu a Tasalonika mi̱n lwangi̱n di̱du yo n ki̱n n ti Sila[1] n ti Timoti bi̱bu n chi ki̱bunti̱ Kwama Te chire n ti Yesu Masiyamu.

²Tewuduwe n Kwama a yo chimi̱n Li̱me n ti li̱mamgu a di̱n Yesu Masiya.

³Kebu mi̱m, ni̱n wana Kwama kwadu di̱ne chi̱ne, yinangu a dakanang ni̱n mi̱nang, we keku bi̱yili̱m changu ki̱chau kakkangu yinu n ti̱n we kuri suk ti̱mi̱la yichiyu yinangu a dakanang.

⁴Ni̱n fwa bi̱kamu ni̱bu bunti̱ki̱ Kwamamu mi̱n runni chi̱n n ti muki̱ni̱rang changu we nwe riye n ti fumaku ti̱ yadangu, ni̱n ngau kwiye ki̱ni chi̱n.

⁵Ti̱ti kwang a yung ki̱swi ki̱bedu wu n Kwama ka mwata ka nang wuwule niye mi̱nde, chi ka nabu kutengitu, n Kwama ka yungdu n ti̱n nang bi̱bu a da ka chau yaa komu.

⁶We mwataki̱ kangu, n ki̱n ka wela bi̱bu ki̱ni chi̱n riye mu.

⁷N Kwama ka ni chi̱n bi̱bu ti̱nwe riyemu n ti ni̱ni̱mu fi̱kaku we di n Tewuduwe Yesu ka fwadede we bwadiye. N ki̱n ka fwadedu n ti ki̱kati ni̱bu ti̱tumbi̱ri ki̱mu.

⁸N ki̱n ka wela bi̱bu a yimbi̱ Kwamamu, ka nang chikiye bi̱bu a bunti̱bu ya̱m bi̱li̱m Tewuduwe Yesu.

⁹Ti̱welan chitu ti̱kaiyari ki̱diya kwadu, n chi ka swedu a nen kuu dwiyen Kwamantu a ne ya ti̱n kakku Kwamangu.

¹⁰Di ki̱lake ko be ka yiu dwiyentu ka yati̱ ri̱kaku we ni̱bu Kwamamu, n ti̱n we bi̱bu ki̱ri̱ka ki̱ni̱mu diko di̱ne ta ke bi̱yili̱mu we ya̱mu nang fwa chimi̱ni̱mu.

¹¹Di̱ne yiko, n ni̱ni bobu ni̱n twa̱ba̱ chimi̱n bunitu ko Kwama a ma chimi̱n mwataku ki̱ku ka yungdu n ti̱n ti̱ma chi n ki̱n a yal chi̱ne ko be ti̱ma. Ti̱nti̱ne ni̱n twa̱ba̱ ti̱nu ko a ni chi̱n dukanu ta mang chi n ki̱n ki̱ baddite, ti̱ma ti̱n chi ti̱yilitu keku bi̱yili̱mang changu a yung chinitu.

¹²Yinu ka nang wuwule niye ka dela Yesu Tewuduwe di̱ne chi ti̱yilitu a ku a ti̱maditu, n ti̱n ta yati̱ ri̱kaku ware. Ti̱tu a fwe ying di̱ne li̱me Kwama chire n ti Tewuduwe n Yesu Masiya.