Read tula 2 Tassalonika 2 Bible Online

2 Tassalonika 2 - tula bible

2 Tassalonika 2

¹Kebu mi̱m ni̱n baddu nang fwa chimi̱n ya̱m we chi ka fwedu ka n Tewuduwe Yesu Masiya a mwatan ka ki̱lade, n ti yinangu ni tekadu n ti ki̱nangu. Mi̱n wana chi̱nu kebi̱ mi̱m,

²Keku bi̱yili̱mang changu a mi̱kaduwe di̱ne bi̱kam ya̱m fa̱kum ki̱fi̱bti ka bi̱bu a di̱tumbi̱r yiine, ka bi̱mwali̱li̱m ya̱m bi̱bu ni̱bu a fwa ko ni wuduku, ka ya̱mu ko Tewuduwe a tu a beme.

³Kasi no yire, ni a swakudu chi̱n we, di̱ne ka m Masiya a mwatan ka ki̱lade, ni̱bu nabwen ka ko Kwama, we ki̱dang kangu di̱kan di̱bwilan Niin[2] ka chiredu.

⁴N ki̱n ka ko Kwama n ti ti̱yobitu ni̱bu ki̱lirediti kwang. N ki̱n ka kedu ko ni̱bu a ni ki̱n dwiyen ti̱tu. Di̱ne yiko n ki̱n ka swedu we kan Kwaman di̱dunu, ka yi ni̱bu ko n ki̱n nang Kwama.

⁵Ta kurbu tiko, n fwa chimi̱n yo mi̱n no n we ware n ti chi̱na?

⁶Ti̱yim chi ki̱ti̱ka di̱bwilan Niin di̱du ka bedangu. N ki̱n ki̱yam ki̱swi ko.

⁷Nangki̱n, dukan di̱bwilan niin di̱du a tu a mwe nangangu we ni̱tu ni̱bitu kasi ki̱ku ni̱bu a swaanbangu. Aya wu a kebu ni̱bu ka du Kwama a ne ni ki̱n ki̱fi̱be ka lami̱n yo ki̱lade.

⁸A kuteng ki̱lakongu, luke di̱bwilan niin di̱de ka kwa̱la̱du, aya yo n Tewuduwe Yesu ka ki̱lade, ka yo bwako ki̱ni dukan yii konu, ka chi̱u ki̱nu ki̱ni dukan dwiyen kiti̱nu.

⁹Di̱bwilan niin di̱du ka ma chi ya̱r yiitu ki̱ni dukan Setan, ka yung chi ya̱r yiitu, n ti di̱mwal, n ti yimani chiyu dangtidangti.

¹⁰N ki̱n ka ma nangangu ki̱ni wa̱ri di̱buti̱riyu nabwen keki̱ maka bi̱bu a tu a tau wa̱re bwa ki̱diyamu. N chi ka bwaradu di̱ne a ko ka yiu ya̱m Masiyamu ki̱ni furi mwene, wu a kau wa̱re yuke we Kwama.

¹¹Di̱ne yiko yo kwer n chi a ko, n Kwama ka du chidu ka yiu ti̱kwani ti̱tu ka kau chimi̱n yaretu. Ka nang chikiye, n chi ka kedu ki̱ni ti̱kwanitu di̱bwilan niin di̱du ki̱fwa chimi̱nditu.

¹²Di̱ne yiko n Kwama ka mwata chimi̱nu di̱ne n chi a ko a kebu bi̱yili̱mu, a le ki̱kai ki̱swi a ya̱m ti̱kwanime.

¹³Kebu mi̱m bi̱bu n Tewuduwe Yesu a mi̱lani̱mu, a dakan ni wana Kwama di̱ne ti̱ni kwadu. N ki̱n a sutu chi̱ne feredi yo n ki̱n a ru ti̱ti̱nite ko ke ki̱yu chi̱n we nangang Fi̱ki̱m Kwamamu ki̱yo chi̱nu yinang Kwamamu. Ti̱nti̱ne we wa̱re ta ke kasi bi̱yili̱mu ya̱m Yesume.

¹⁴Ke chitu a kabbi yiko, n Kwama a yal chi̱ne we wa̱re ta nween ya̱m bi̱li̱mu nang mwa chini̱mu. N ki̱n a yal chi̱ne ko keti̱ ku, ti̱kattuwe bi̱bu ka ya nabwe dwiyene n Kwama a ni Yesu Masiyamu.

¹⁵Di̱ne yiko, kebu mi̱m, ti̱ti ki̱ri̱ng we bi̱yili̱mu ta yiu a dur Yesuni̱mu. Ti̱chakakku ki̱ni keku bi̱yili̱mangu we chitu nan miya chimi̱nitu n ti bi̱bu nang fwa chimi̱ni̱mu ki̱dangu no chi̱ni warengu n ti chi nang mwal chimi̱ne.

¹⁶Yam Tewuduwe Yesu Masiya ki̱fwan n ti Kwama Te chire wu a mi̱la chiniye, wu we li̱me ko, a ni chi̱ni runni wu ni tiindu ki̱diya kwadu,

¹⁷wu a kum chimi̱n ni̱te, a ru chimi̱n ni̱ru ke ti̱chakakku ki̱ni fwaku n ti maku chi a daatu.