Read tula 2 Tassalonika 3 Bible Online

2 Tassalonika 3 - tula bible

2 Tassalonika 3

¹Mang swan ya̱mi ying kebi̱ mi̱m, ti̱twa̱ba̱ ni̱mi̱n buni ke ya̱m Kwamamu a ti̱rani daatu, a yati̱ dwiyentu yinangu a ya we di̱ chi̱nengu.

²Ti̱twa̱ba̱ bunitu ti̱nti̱n ke Kwama a yu ni̱n we ni̱bu muli̱ni̱mu n ti bi̱bwilanmu, di̱ne n chi a kebu bi̱yili̱mu ki̱ni kwang.

³Aya n Tewuduwe naba yile, ka ru chi̱nu, ka yu chi̱nu we ni wu bwila ka nang chikiye n Setan.

⁴Ni̱n ke ko Tewuduwe we yichiyu ki̱maka chi̱nu ti̱ma chi nang fwa chimi̱nitu. Ti̱nti̱ne a ne ta twi bwi ta chakakku.

⁵We yiko, Kwama a yo n Tewuduwe a yung chi̱n yinangu Kwama a mwan a mi̱la chi̱nangu n ti muku ni̱rangu ki̱chiredu a di̱Masiyangu.

⁶Aya ki̱ka̱ngu kebu, ni̱n ngau chimi̱n ki̱kure a di̱n Tewuduwe Yesu Masiya, ti̱bwa̱lu we n ti sulabi̱bu a babbu nanganmu, wu a bunti̱bu yili̱ntu ta ya a di̱ ni̱netu.

⁷N ti̱n n ti̱fwan ti̱yim a dakan ta bunti̱ nani niyu, di̱ne nang yung chimbu sulai ka fwitiye.

⁸Ti̱nti̱ne, nang chabu chabti li̱mang a fa̱la̱ng wuka niyang, aya ni̱n ma nangangu ki̱ni dukan ni̱n di̱ne ke ni̱n yo wuka nii mi̱nu ki̱dada̱ku we.

⁹N ke ko ne nang medu nang bi̱u chabti̱te, aya ni̱n baddu nang miya chimi̱nu yinangu ta ni̱n yadangu.

¹⁰Kasi no n nang ki̱dangu n ni̱n no we n ti chi̱nangu, ni̱n ngau chimi̱n ki̱kure “Ko ka nang wuwule niye wu a mabu nangange, a ne yadu ka chadu.”

¹¹Ni̱n nwe ya̱mu ko bi̱kam chimu a mwan a ma fwiti. N chi a mabu nangang ki̱kai ki̱swi chi a didi̱kuni̱n we fantiyu ni̱bu ki̱mang nangi̱niyu.

¹²Ni̱n fwa duum ni̱bu bi̱bu mi̱nu we di̱n Tewuduwe Yesu Masiya, ni̱n ngau chimi̱n ki̱kure, a ma nangangu a chabi ki̱ni dur chi̱n.

¹³Aya n chi̱n Kebu mi̱m ti̱twidu bwi we ti̱na ma nangi̱n ti̱yilitu.

¹⁴Ka wuka chi̱n a bunti̱bu chitu nang mwal we lwangi̱n di̱dite, n kawure a swaan ni wuko yinang, ti̱bwa̱lu we ware, ke n ki̱n a nwe dibwi.

¹⁵Aya ti̱ kedu a kadu kati̱re chi̱n we, aya ti̱ wuki̱mi̱n ki̱tele yinangu mwang ma kemo mi̱nnang.

¹⁶Ya̱mu n Tewuduwe Yesu wu ki̱ni ni̱bu ki̱mu li̱mange, a chakakku a ni chi̱n li̱mangu kasi no wuwule ki̱swiye. Yam n Tewuduwe Yesu a swe ware n ti chi̱ni kwang.

¹⁷M mi̱n m Bulus mi̱n mwal chimi̱n di̱siir di̱du m mi̱n m mi̱fwan ki̱ni fa̱la̱ng mang mi di̱mwal “Bulus” N nang ki̱swi mi̱n mwali̱n ka nang di̱di̱le lwangi̱ne.

¹⁸Li̱me Tewuduwe Yesu Masiya a swe ware n ti chi̱ni kwang.