Read tula 1 Timoti 1 Bible Online

1 Timoti 1 - tula bible

1 Timoti 1

¹M Bulus fandu Yesu Masiya we a yilang Kwama naba yukengu, n ti Yesu Masiya wu ni̱n yon ni̱re.

²Mi̱n mwal mi̱n lwangi̱n di̱du Timoti, di̱ne m mun bwemi siin we keku bi̱yili̱mangu. N Kwama Te chire n ti Yesu Masiya Tewuduwe chire a yo n rii li̱me, n ti ki̱bune, n ti li̱mangu.

³Mi̱n fwa mi̱n ti̱nu ki̱da ya̱mu no mang fwa yo mang du Afisa mang yika Makidoniya. Swe we Afisa, ke n wela ni̱bu ti̱kwanim bi̱bu n chi ki̱ miya ni̱bu mi̱n ya̱m ti̱kwanimu.

⁴Yi chi mwi a du ki̱sini seli̱biyu yiyu ka yo ni̱bu ka ledu we wa̱rengu, duum bi̱bu seli̱bu chim a no ki̱fwadi̱mu. Ka n chi a miya duum ya̱mi bi̱ki̱me, ni̱bu ki̱kai ki̱swi we ya̱mi yikiyu. Ti̱tu ki̱yo ni̱bu a bunti̱bu doku Kwamangu. Naba yung ke ki̱maka ni̱bu we chi Kwama ki̱badde, yo a maka ni̱bu a ke bi̱yili̱mu we di̱Kwama.

⁵Chi a yo min fwa chimi̱n yam bi̱be, di̱ne ke ni̱bu bunti̱ki̱mi kwang a kabi ki̱ni mi̱laki̱ ki̱chiredu a ni̱r di̱yili̱n di̱du a ne dire we, ni̱r di̱du ki̱ridu ki̱ni keku bi̱yili̱mangi kwadu.

⁶Aya bi̱kamu ni̱bu yungki̱m a du ki̱kwi siine we. Ki̱ lekadu a chi a ne makakuwe.

⁷N chi ki̱baddu ka kau bi̱kam we ni̱bu yungku yili̱n Musatu. Aya n chi a swaanbu kasi ki̱ku n chi ki̱miya bi̱kamu mi̱ndangu. Kasi ki̱ku n chi ki̱miyadu yinangu a swaan chiyangu, we bi̱yili̱mu a swaanbu chi.

⁸Ni yim yili̱n Kwamatu a le, ka ni ma nangangi ki̱n tiyang ka dakanange.

⁹Ni yim yili̱ntu n ke di̱ne bi̱bu ki̱tum yilem aya di̱ne bi̱bi kukkudumu n ti bi̱bu ki̱yo bi̱ngangimu, yinu n ti bi̱bu ki̱ ni Kwama kutengimu, n ti ki̱chakakku ki̱ni ki̱letimu. Bi̱bu a ne we wawadi̱mu a siibu Kwama, bi̱bu ki̱chiu tebu n ti nebu n chi ki̱kau dutu.

¹⁰Ni̱bu bi̱bu ki̱ma ti̱kulimu n ti kwartabu ki̱daradu n ti kwartabi̱mu, bi̱bu ki̱ma kuutu ni̱bu ki̱fwara ti̱kwani ki̱nwe chi a fwebe, yinu n chi a yabu we wa̱re Kwama ki̱ma chi n chi a ku diye,

¹¹a bunti̱bu miyaki̱ku ki̱bedu a yili̱n Ya̱m bi̱li̱mu n Kwama naba delake a ni minimu.

¹²Mi̱n wana Yesu Masiya, yinangu a da̱ng mang da ki̱mi̱nangu n ti yinangu a yo mang kau naba nangangeko.

¹³Kasi ki̱ku no mang swa̱ba Yesu Masiyangu, n ni ni̱bu bunti̱ki̱mu riye a wa̱riyu dangtidangti. Aya n Kwama a nwe ki̱bune mi di̱ne m ma ti̱chitu wu a Kwalan swaanke n ti kwalan keku bi̱yili̱mange.

¹⁴Nabwe li̱me Tewuduwe a kure we di̱mi̱ne burtu, n ti kekubi̱yili̱mangu n ti mi̱laku a di̱Masiya Yesuwe.

¹⁵Bi̱bu ya̱m bi̱yili̱m, a dakan n kawure ka kedu, n Yesu Masiya a be ti̱ti̱nitu ke a yu ni̱bu ki̱leti̱m, we ni̱bu ki̱letimi kwang m mi̱n nang di̱bwilan naba ki̱lenu ki̱ni kwang.

¹⁶Aya n Kwama a nwe ki̱bunemi ko ke n Yesu Masiya a ma nangangu ki̱ni mi̱n ko ke ni̱bu a ku bwanu ko we di̱mi̱ne di̱bwilan naba ki̱leti, ke bi̱kamu a swaan a ke bi̱yili̱mu we di̱ki̱ne ke a ya ti̱kuritu ki̱diya kwaditu.

¹⁷Dwiyetu n ti delaku a di̱Kwama ki̱diya kwadu, n ki̱n nang Mai ki̱diya kwade, wu a bwabubwa wu niyang kuti̱be, n ki̱n nang Kwama n ki̱kun. Amin.

¹⁸Bwemi Timoti ya̱mu mi̱n fwa mi̱ni̱mu a tituwe bi̱bu fa̱kubu a fwa we dur muni̱mu ke n chau ki̱la we kun di̱mwa̱r ya̱m bi̱li̱mi̱nu.

¹⁹Mwan tau keku bi̱yili̱mangu ki̱ni ni̱ri diin. Bi̱kamu ni̱bi a ko ka bunti̱ chi ni̱tu chin ki̱fwade, di̱ne keku bi̱yili̱mang chiyangu.

²⁰Nang tiyangu Yemeniya n ti Aleksanda wemi̱nangu bi̱bu mang ni Setan ke a twai ni̱r Setanu, m ma ying ke n chi a du da wu a swa̱bane.