Read tula 2 Timoti 1 Bible Online

2 Timoti 1 - tula bible

2 Timoti 1

¹M mi̱n Bulus fandu Yesu Masiya we ki̱ke yilang Kwamang, naba yuke chire, n ti Yesu Masiya yo ni̱re chire,

²Mi̱n mwal Timoti mi̱n lwangi̱n di̱du di̱ne n ki̱n yinang bwe fur mi̱ne. Li̱me n ti ki̱bune n ti fiswe li̱mange wu a di̱Kwama n ti Yesu Masiya Tewuduwe chire a talmi̱ntuwe.

³Mi̱n wana Kwama di̱ne chi mun maditu. Mi̱n fwa Kwama wu mi̱n ma ki̱mi̱n nangange ki̱ni ni̱ri diin a ne ti̱liren we yinangu tukebu mi̱mu a siiyenge. Mi̱n kurunu we twa̱ba̱ki̱ buniyang mangu kum n ti kuko.

⁴N ke mang kuunti̱nu ki̱da, di̱ne n kur ti̱mweni mwitu we ki̱dangu yani yaradangu. Mang ma ti̱mi̱lan ka ni ngabatuwe ki̱da.

⁵M kur keku bi̱yili̱mang mwangu a tiwe ki̱ku a di̱ ne mun n Yunis n ti nuke mun n Luwisangu. N yim keku bi̱yili̱mangu a di̱chiyengu a lakanbu n ti ki̱mwangu ki̱ni dukanu.

⁶Di̱ne yiko, mi̱n kur mi̱ndu mi fu ki̱ti̱me Kwama wu mwan ya ki̱ni yoku fa̱la̱ng mange.

⁷Nangki̱n n Kwama a nibu chi̱ni Fi̱ki̱m tayim. Aya bi̱bu a dukani̱m n ti mi̱laku n ti takki̱ durang.

⁸Di̱ne yiko a dakabu mwang nwe dibwi yinangu mwang mwa di̱n Tewuduwe nangu. Nwe ti̱du dibwi mi we di̱ne m mi̱n a di̱bi̱nti̱l di̱ne Masiyange. Kasi ki̱ku ta nwe riye we di̱mwar ya̱m bi̱li̱mi̱nu n ti mi̱nangu, n Kwama ka ni chi̱n dukanu.

⁹N Kwama a yuni, a chake ni ko be ni ya yayu yinang Kwama. Di̱yal di̱du a bunti̱bu a nangi̱n ti̱yili chirei aya nang chi Kwama a tu a do ka madu yo ti̱ti̱nitu a tibu swede. Aya di̱ne doku kangu we di̱Yesuwe, a sutu ni a ma nimi̱n ki̱li̱mang.

¹⁰Aya ki̱ka̱ngu a wudunimi̱n ni ku li̱me wu we beku Yesu Masiyangu naba yuke chire. N ki̱n wu a be la dukan bwane, yinu a yii nimi̱n wa̱re ti̱kuri ki̱diyae kwade n ti da wu a yariye ki̱ni ya̱m bi̱li̱mu.

¹¹Nangki̱n n Kwama a yomi̱n n kau naba di̱mware n ti fandu n ti naba yungke wu a ya̱m bi̱li̱m bi̱be.

¹²Ti̱tu nang chi a yo mang nwe riye a di̱bi̱nti̱le. Aya a kammibu chi dibwi. Di̱ne n yim ni mang yo ni̱re, we yingki̱ mangu n Kwama ka medu ka toyu we chi yo ni̱retu ka lami̱nti di ki̱lake ko.

¹³Ti we duum miyaki̱mu mwang nwe we di̱mi̱ne ki̱ri̱ng. Ti̱tabbi̱du keku bi̱yili̱mang changu n ti mi̱laku a di̱n Yesu Masiyanu we.

¹⁴We makaku Fi̱ki̱m Kwamamu ware n ti muni̱mu, madu ti̱kali we ki̱ni miyaku ki̱yilang ki̱ku mwan yangu.

¹⁵A mwan yim mwi ni̱bu bunti̱ki̱mu a Asiyamu a sabi̱r kuteng a nimi̱n. Kasi no nang Faichelus n ti Yemocheni a yika ti̱n.

¹⁶N Kwama Tewuduwe a yo di̱kur lon Onesiforu mi̱n delaku, di̱ne n ki̱n a ya a siiye ki̱kummiti̱ ni̱ru. A nwebu dibwi yinangu a ku ni̱bu a kwabayi makalanangu.

¹⁷A mwintuwe, yo n ki̱n a be Roma, a kaibu ki̱swi a babba mi̱n a lami̱nti̱ ki̱dangu a ya mi̱nangu.

¹⁸Mi̱n wana Kwama a yo Onesiforu mi̱n delaku we di n Tewuduwe ka ki̱lade. M mun n yim nabwe makake a ma mi ki̱dangu m mi̱n no a Afisa.