Read tula 2 Timoti 4 Bible Online

2 Timoti 4 - tula bible

2 Timoti 4

¹Mi̱n fwa ya̱m bi̱bu ki̱ni dukan Timoti, we Kakku Kwama n ti Masiya wu ka kaba bi̱kuri̱m n ti bi̱bwari̱m mi̱nde, ti̱nti̱ne di̱ne ka ki̱ladu beka ma mati̱n ti̱ti̱niye.

²Ma di̱mwar ya̱m Kwamammu, do bwi kasi no da we ko no newe. Do ni̱bu, ti ki̱ri̱ng mwi a chadu kakku we bwila a nang ma ti̱yili chi. Tau bwanu we chiti kwang nang miya ni̱bu mi̱n ya̱m Kwamamu.

³Nangki̱n ki̱siwi ki̱bedu wu ni̱bu a ne mi̱la nweku ya̱m bi̱yili̱mangu n ti miyaku ki̱yilangu. N ti ki̱ki yikongu, n chi ka mi̱la chi ni̱r chi̱n ki̱badde. N chi ka ri dutu chitu ki̱ni ni̱bu yungki̱m bi̱bu ka fwa chimi̱n ya̱mu a wa̱re ka li̱ma chi bwiye.

⁴N chi ka swa̱ba bi̱yili̱mu, ka bunti̱ miyaku ribang.

⁵Aya so yimwiyu we chiti kwang. Mu ni̱ru we riye, chakakku ki̱ni di̱mwar ya̱m bi̱li̱mi̱nu. Ma nangangu n Kwama a yo mi̱n a fa̱la̱ngu yinang.

⁶N tu m bwa̱u kui we wadwadu wa damiye n ti nangang Kwamangu mi̱n madangu. Di̱ne ne mang dadi yurau mang bwadu.

⁷M ma kun di̱yili̱n, n ri banangu, mang ki̱labi kuteng we keku bi̱yili̱mangu.

⁸Ki̱ka̱ngu a dumi ka di̱ki̱ri̱n dwiyeni̱nu, ki̱yaiyu we bwadi di̱ne Kwama a nwe ta̱ma̱ng mange. N Tewuduwe wu ki̱mwata ni̱bu mi̱nde, ka ni di̱ki̱ri̱n ki̱ti̱me mi̱nu we di ki̱lake ko kasi ki̱ku n ke kana mi̱n mang yiu di̱ki̱ri̱nu aya n ti bi̱bu a swe ki̱yam ki̱laku kangangu.

⁹Timoti funti̱bwi be bwa di̱ mi̱ne daatu.

¹⁰N Dimas wu a dui di̱ne ti̱ti̱niye, a yika Tasalonika. N Ki̱rsens a yika Ka̱latiya yinu n ti Titus a yika Dalmatiya.

¹¹Kana Luka nang wu n we ware n ti mi̱ne. Yo kano mun bede, bunga ware n ti Markus di̱ne ka ma mi makaku we nangangu.

¹²N tum Tikiku a Afisa.

¹³Yo mwang bede, da̱mite luke chuye wu mang duwe a fa̱la̱ng Karbus a Toruwa, n ti Tatti̱ki̱da yiyu, tabedu Ti̱bali̱n ti̱mwalanitu we.

¹⁴N Aleksanda wu ki̱tu kube, a yo nangang mangu a chabu kakku. N ki̱n we ka ya ki̱ti̱me ko we Kwama.

¹⁵Di̱ne yiko, mun ti̱n ma ni wi daandaan di̱ne a kebu miyaki̱ chirengu.

¹⁶Di mang mwe mang ti a kakku ni̱bu kabaki̱m ke n ni di̱ki̱li̱n yiin we ya̱m mi̱mu n chi a kebi̱mu, a ne ni a timituwe we. N chi a yaran a dui we. N twa̱ba̱n mi Kwama a du chimi̱n di̱ne n chi a yaran a du mi̱n we.

¹⁷Aya n Kwama a timituwe a makai ki̱ni runni wu a yo mang me mang ma di̱mwar ya̱m bi̱li̱m Yesu Masiyami tasitu. Ke bi̱bu n ke kuu ni̱bu Yafudam we fikomu a nwe. N Yesu Tewuduwe a timituwe a yo n chir we fa̱li bwayu.

¹⁸N Tewuduwe ka chakiyu we kasi no a wuwule bwila, ka yodu mang lam loko we bwadi li̱mang. A le ni dela Kwama Tewuduwe ki̱diya kwadu. Amin.

¹⁹Ti̱simi̱ti̱ Biriskila n ti Akila n ti di̱kur lon Onesiforu.

²⁰N Yeratu we Korinti lanta di. N duwe Tarofimu a bubuwe we Miletus.

²¹Funti̱bwi lam fi ki̱ni didi̱be. N Yubulu n ti Fudens, n ti Lainus, n ti Kalaudiya n ti bi̱kamu kebu kwang ki̱si chinedu.

²²N Kwama a swe ware n ti chi̱n. N Kwama a dela chi̱ni ki̱ni kwang.