Read tula Titus 1 Bible Online

Titus 1 - tula bible

Titus 1

¹Mi̱na Bulus naba nanga Kwama Fandu Yesu Masiyane. A suti a twiye di̱ne ke n yo keku bi̱yili̱mang we ni̱bu n Kwama sutumu a ru, ke n maka ti̱chi a swaan bi̱yili̱mu we bunti̱ki̱ chirengu.

²Keku bi̱yili̱mangu, n chi a yo ni̱ru we ti̱kuri ki̱diya kwaditu. N Kwama a ne mwe ti̱kwanitu, ti̱tu n Kwama a bwa̱u ka ni chi feredi we tile bi̱rketu.

³Aya yo ki̱swi ko a lame, n ki̱n a yung ya̱m bi̱li̱mi kwa̱rikwa̱ri, n ni̱n fal ni̱n mwa ni̱bu. N Kwama naba yuke chire a yoi mi̱n da̱ng ki̱mi̱n nangang ki̱ku.

⁴M mwal Titus mi̱n bwe nanga mi wu yile we keku bi̱yili̱mangu ki̱ku n chi̱ni ki̱ni kwangangu. Li̱me n ti fiswe li̱me a di̱Kwama Te n ti Yesu Masiya naba yuke chire a swe ware ti mun.

⁵Di̱ne titte n dun we kunna Kirite mi ke n swang nangangu niyang dubbangu, mwang yo seli̱bu we ka di̱di̱le bi̱ne, yinangu mang fwami̱nangu

⁶Sele a kaddu wu ni̱bu ki̱fwara ya̱mi yiyu a lebi̱lei we dur ki̱ne we, a wu ki̱ni naye wiine, ti̱nti̱ne sele a kau wu bwesi̱m ki̱mu a ke bi̱yili̱mu n ke bi̱bu a ne kwa̱mbi̱r we.

⁷Wakili tikake ni̱bu bunti̱ki̱me, a kedu ya̱m bi̱bwilamu we dur ki̱nu di̱ne nangang Kwamangu n ki̱n ki̱madangu, a kaddu wu n kawure ki̱ ku ki̱le ko we, a kaddu wu ki̱kukku dur ki̱ne we, ka wu ki̱ma ki̱fwini date, ka naba nori̱ne, ka naba muli̱n ne, ka wu ki̱ni ki̱dwanki ka̱mbi̱re.

⁸A kau nii wu ki̱yiu rungko, wu ki̱mi̱la maku chi a leleye, n ke ni wu kulangkulange, naba yile, nii wu wauwade, wu ki̱tau dur ki̱ne.

⁹Tikake n ki̱n nang wu ka tidu we bi̱yili̱m ya̱m Kwamamu kangu n ki̱n a ya mi̱ne miyakangu, ke n ki̱n a ru bi̱kamu we di̱mwaru ti miyaku ki̱yilangu, yinu n ki̱n ka medu ka kwa̱l ti̱lairi bi̱bu a kebu ki̱ni miyaki̱ kangi̱mu.

¹⁰Aya ni̱bu nabwen we bi̱bu ka kwila miyaki̱mu, ka ni̱n fwara ya̱mi yi kusi, ki̱butu bi̱kamu ni̱bu, ka kwa̱l di̱du ki̱yidu ko ka ni a bibu laare a ne ya yuku.

¹¹A mwintuwe ni wela chidu ke a yinge yii chi. N chi ki̱kai loniyu nabwen ki̱ni miyaku ti̱kwaniyang chiyangu ki̱yoti̱ ni̱r we ko chi yaan di̱dibi̱rangu.

¹²A lanti̱n wuka fa̱ku wu n ki̱n naba ki̱retan a fwa ko, “Ni̱bu a Ki̱retamu ki̱mwera ti̱kwani, nai yi kwani yiyu bwitiyi bubbuku ki̱chau ka chi.”

¹³Ya̱m bi̱bu bi̱yili̱m. Di̱ne yiko, a ma ti̱welantu yinang, ke n chi a tiwe keku bi̱yili̱mang ki̱yilangu.

¹⁴Di̱ne ke n chi a lekaduwe ya̱mi seli̱bu ni̱bu Yafudamu bi̱bu a ko bi̱yili̱mu .

¹⁵Kanang ti̱ti̱le chiye yi wauwadu we bi̱bu ki̱ni wauwade ni̱remu. Aya a ne chi wauwade we bi̱bu a ne bi̱yili̱m wemu n ti keku bi̱yili̱mangu, di̱ne ti̱kuran chitu n ti da bunti̱ke chi a kaiyan.

¹⁶Ni̱bu bi̱bu ki̱fwadu ko chi yim Kwama, aya we da chi ki̱kwila Kwama. N chi a kau ni̱bu ti̱bwitani̱m, a ne kwa̱mbi̱r we, a mebu a mabu chi ti̱yili.