Read tula Titus 3 Bible Online

Titus 3 - tula bible

Titus 3

¹Kur ni̱bu mumu mi̱n mwiko a na ni bi̱duumu dwiyentu n ti bi̱bu ki̱ma mati̱n mu, a bunti̱ ya̱m chimu. A swengi doku bwiyang a nang ma nangi̱n ti̱tu a lelei.

²A fwadu ya̱m bi̱bwilam we a dur wuka niin. Ti̱nti̱ne a na ma fiswe li̱mange, a kab ki̱ni ni̱ri bukki̱n, a yung ni̱r di̱yili̱n we ka n wure.

³Nangki̱n yo no ferediye, n chi̱ni no niyang kasabu, n chi̱ni ni ko bunti̱ki̱ku, ni̱bu a butu ni. Kubeku dangtidangti n ti ki̱dwankiyu nabwen a la dukan chi̱renu. Ni ya yayu chire ki̱ni muli̱n n ti mi̱kakwiye, ni tau kebi̱bu a ni̱r. Ni̱bu a ko ni, n chi̱ni ni koti̱ chi.

⁴Aya yo ki̱bune n ti mi̱laku Kwama naba yuke a fwenge.

⁵N Kwama a yu ni. N ke di̱ne nangi̱n ti̱yili chirei, aya di̱ne ki̱bune ko. N ki̱n a nura ki̱leti chireyu a ni chi̱ni Fi̱ki̱m bi̱bi wauwadi̱m, n ti bi̱be wu robe n ti ti̱kuri ti̱fwi.

⁶Fi̱ki̱m Kwamamu a kuri burtu we dutu chi̱retu we a di̱n Yesu Masiya naba yukenu.

⁷A ma ti̱tu di̱ne we li̱meko ke ni̱n kadu ni̱bu ki̱leti̱m we kakku Kwamangu, ke ni kau bi̱bu ka chau kula wu a ti̱kuri ki̱diya kwadi ti̱tu niyang yo ni̱r wetu.

⁸Ya̱m bi̱bu bi̱yili̱m, mi̱n baddu mwang ngau ki̱kure we bi̱bu yinang, di̱ne ke bi̱bu a ke bi̱yili̱m we Kwamamu a tituwe ki̱ri̱ng a nang ma nanga ki̱yilangi ki̱n we chi a leletu yinang, ki̱chitu wi kwang a le, ki̱ni makaku.

⁹Aya di̱ki̱du duru we ya̱mi yikusiyu n ti kiku tukebangu n ti di̱kulan yiinu we yili̱n Musantu. Ti̱tu ka nangang ki̱kusang n ti kaiku ki̱swiyang.

¹⁰Aya nii wu ki̱yo chimi̱n yarame, ka ti̱kwabu ki̱da yurau a nwebu chi̱ne, ti̱yo nii wuko a ki̱ti̱ku ti̱du ki̱n.

¹¹Chi mwang yinde, ki̱duum ni̱bu bi̱bi̱mu a ki̱latuwe da wuka̱re, ki̱leti chiyu ki̱yung twiyaku chiyangu.

¹²Mi̱n baddu mang tum Artimas ka Tikiku we di̱mune. Funti̱ bwi be yai we a Nikafolis, di̱ne mi̱n baddu mang ma sa̱na̱ngu a bwako.

¹³Ma chi mwan maditu ke funti̱bwi makan Sena lauya n ti Afolos we a wa̱re. Funti̱bwi kedu a kwaladu chiwe.

¹⁴A dakan ni̱bu chi̱remu ka miyadu yinangu ka ni dur chi̱nu we maku nangi ti̱yilitangu, ke n chi a ma makaku we kwalantu. A ridu da chi we a ti̱kusi.

¹⁵Ka nang wuwule niye wu we ware n ti mi̱ne ki̱sinedu. Makai simiti̱ ni̱bu bunti̱ki̱m bi̱bu ki̱mi̱la chini̱mu we keki̱ bi̱yili̱mangu. Yam li̱me Kwama a swe ware n ti chi̱n ki̱ni kwang.