Read tula Yibraniyam 1 Bible Online

Yibraniyam 1 - tula bible

Yibraniyam 1

¹Feredi n Kwama a fwa tukebu chi̱remu mi̱n ya̱mu we yii fa̱kubi̱bi a wa̱riyu dangtidangti n ti ki̱switiyu dangtidangti.

²Aya we a diti swan kute yiyu, a fwa nimi̱n ya̱mu a di̱bweko wu n ki̱n nan chakkula chiti kwange. We ti̱le bi̱rke, n Kwama a mu ti̱ti̱nitu a di̱ki̱ne, yinu ki̱na yo wule ti̱ti̱niye a di̱ki̱ne.

³N ki̱n nang ki̱yiye wu a dwiyen Kwamaye, n ki̱n a fiwiine n ti Kwama. N ki̱n ki̱yikadu ki̱ni ka nang ti̱ti̱le chiye we fi a no dakan ka yade ki̱ni dukan di̱kwa̱l yiin ki̱nu. A kuteng ki̱ku, n ki̱n a nura ni we ki̱leti chireyangu, a swe a kang ki̱yilang Kwamang we bwa diye ki̱to chitu ki̱ni kwang we dukang Kwamanu.

⁴We ti̱tu fal a yung n ki̱n a la ni̱bu ti̱tumbi̱rimu nabwen, yinangu di̱nu n Kwama a ni ki̱ni̱nu a la di̱mbi chiti̱ti kwangangu.

⁵Nang wuwule naba di̱tumbi̱re n Kwama a yiko, “M mun Bwemi, diwu n kau Temun.” A yiinti̱bu wuka naba di̱tumbi̱ri ko we ko, “mang kau Temun, mwan kau Bwemi.”

⁶Yo yaka tum Bwe wu kake n Yesu we ti̱ti̱nite a yi ko, “Yam, ni̱bu ti̱tumbi̱ri Kwamamu a sii a delan ti̱n.”

⁷We ni̱bu ti̱tumbi̱ri Kwamamu a yi ko, “Kwama ki̱yo ni̱bu ti̱tumbi̱rim ki̱mu ki̱kau ki̱fi̱be, yinu ni̱bu nangang ki̱mu yinang ben ki̱rang.”

⁸Aya we Bwe a yi ko, “Fi swe mati̱nmwitu, Kwama, wu ki̱diya kwade yinu tungku yilengu ka kau ki̱twalang yaamongu.

⁹Mun bau nangang yilengu, n ko bwila. Nang chi a yo Kwamamo a kukki̱n kakku ti kalmunu, a ki̱kur mi̱n ki̱nung li̱mengu.”

¹⁰A ki̱la fwa ko, “Tewuduwe, we ti̱le bi̱rke, n ru tame ti̱ti̱niye, bwa diye kwang ka nangang fa̱li mwiyang.

¹¹N chi ka twiyadu, aya m mun we kwadu, aya n chi ka twiyadu yinang kuri.

¹²Mwang dal ki̱nu yinang luke, aya ka twiyadu yinang luke a ka̱ra̱ne, m mun mwang sutenbu we, swa̱tu mwitu a ne riduriye.”

¹³Aya n Kwama a yiinbu wuka naba di̱tumbi̱ri we yinangu a yi bwe kongu ko, “Swe ki̱ni dwiyen we kangki̱yi̱lang mangu, ka lami̱nti̱ yo mang yo fakwarbi̱ mumu a wana namo.”

¹⁴Kanodu ni̱bu ti̱tumbi̱rimu kwang n ke fi̱ki̱m delaku n Kwama tum ko ke a to chini bi̱bu ka ya yuki̱ma?