Read tula Yibraniyam 2 Bible Online

Yibraniyam 2 - tula bible

Yibraniyam 2

¹We yiko a dakan ni tidi ki̱ri̱ng we yam bi̱yili̱mu niyang nwemu,[1] ke n chi̱ni ni da̱du ti̱kuran chi̱retu we wa̱re a dakane.

²Ka ya̱mu ni̱bu ti̱ti̱mbi̱rimu a fwamu a kabi yiko, yinu ka ki̱ki̱le kiku ti koku bunti̱ku ti̱welanta dakanite.

³Kanodu ni swidi yire, ka ni du yuku ki̱duwang ki̱ku wu n Tewuduwe Yesu a mwe ki̱ma di̱mware ki̱nu, yinu du bi̱bu a nwe di̱kwa̱l yiin ki̱ni̱mu a mwa niye.

⁴Yinu n Kwama a sub a ma di̱ki̱n di̱mwar we di̱du ni̱bu a manu ki̱ni yungku ti̱mwalin ti chi ya̱r yii n ti chi ka̱ta̱kitu dangtidangti n ti ki̱ti̱nti fi̱ki̱m Kwamamu a keran nimi̱n a ki̱ke komu. N Yesu a chirkan n ti kal ki̱n.

⁵Ki̱dangu ki̱bedu ki̱ku ni fwa ya̱m we dur ki̱n ki̱ka̱ngan mu, ni̱bu n Kwama a yo ka ma mati̱ni̱mu n ke ni̱bu ti̱tumbi̱ri.

⁶Aya we wukane fi n Kwama a fwa ya̱m ko, “Nii wureni, wu m muni bob we kuteng kange, Bwe Nii yinang wure wu mwani̱n kuri ki̱ne?

⁷N yo ni̱bu ti̱tumbi̱ri Kwamamu a la ki̱n a baki̱swi bayim; n ni ki̱n dwiyentu n ti ri̱kaku.

⁸N du ki̱n a ma mati̱n ka nang ti̱ti̱le chiye kwang.” Yo n Kwama a du ka ti̱ti̱le chi a fa̱la̱ng kange, a ne chi n Kwama a duba newe fa̱li kiye we. Aya niyan tibu ku ka nang ti̱ti̱le chiye a fwe we falankangu.

⁹Aya n chi̱ni ni ku Yesu, wu a no yo ni̱bu ti̱tumbi̱ri Kwamamu a la ki̱ne, ki̱ka̱ngu a ya di̱ki̱ri̱n mati̱ni̱n n ti ri̱kaku di̱ne n ki̱n a nwe riye bwa ke we li̱me Kwama di̱ne ka nang wuwule niye we ti̱ti̱nitu.

¹⁰A kabi yiko n Kwama, wu a yo chiti kwange nang wu ki̱to ti̱n chiti kwange. Di̱ne yiko, ka n Kwama ka bedu ki̱ni bwesi̱m ki̱mu nabwen ke a ya ri̱kake, a le a ne ka du tikake naba yuke chi. A ma yiko di̱ne riye n Yesu a nwe.

¹¹Aya ki̱ka̱ngu n ki̱n wu a yo ni̱bi wauwade n ti bi̱bu a yo chi wauwadi̱mu, a kau di̱kur loni diin. N Yesu a nwebu dibwi yinangu ka yal chidu ko ke bangu.

¹²N ki̱n a yi Kwama ko, “Mang mwa kebu mi̱mu mi̱n di̱mwar di̱n muni̱nu. Mang delanu we muraku ki̱tuu ni̱bu.”

¹³A ki̱la fwati̱n ko, “N ke mang tidu we di̱Kwama.” A ki̱la fwati̱ ki̱da ko, “M mi̱n nang wu n ti bwesi̱mu n Kwama a niyimu.”[2]

¹⁴Di̱ne bwesi̱m Kwamamu ni̱be, a mu bwi chiyu ki̱ni ki̱tuum n ti name, n Yesu ti̱n ni̱bu a bi̱u ki̱n yinang ni ki̱ni nam bwi n ti ki̱tuum. A kabi yiko, ke n ki̱n a bwa yinang ni, we yiko nang tiyangu n ki̱n ka kaiyin dukan Setane, n ki̱n wu ki̱ni dukan bwane.

¹⁵Yinu n ki̱n a kwi ni̱bu we ti̱kuri chintu a ka̱bi ki̱ni tayi bwayu.

¹⁶Ni yimi kwang ko n Yesu a be ke a maka ki̱fi̱ku Yibrayim n ke ni̱bu ti̱tumbi̱ri Kwamam.

¹⁷Nang chi a yo ni̱bu a mar ki̱n yinang kebu ki̱me kasi no a wuwule bale, di̱ne a kau tikake Fanse ki̱ni yile. Wu ki̱ni ki̱bune we nangangu ki̱ma Kwama mi̱ndangu. Ke a kau niku ki̱tuumang we ri̱kaku li̱mang ki̱letiyang ni̱bangu.

¹⁸Yoko n ki̱ni ki̱fwan a nwe riye swa̱ka̱ku kangu, a lwe ka maka ka nang wuwule niye wu ki̱ya sweke.