Read tula Yibraniyam 3 Bible Online

Yibraniyam 3 - tula bible

Yibraniyam 3

¹Di̱ne yiko Kebu mi̱m ni̱bu ki̱bunti̱ Kwamam, bi̱bu a bwa̱u we ni̱tu chitu ka ya bwadimu, ti̱ma ti̱kuran we Yesu wu nang yung chi̱n ko fandu Kwama n ti tikaketi Fanseti.

²N ki̱n a bunti̱ Kwama wu a sutu ki̱ne ki̱ni ni̱ri diin, yinangu m Musa a ma nangangu ki̱ni ni̱ri diinangu.

³Aya yinangu n Yesu a la Musangu a su ki̱nati̱ng, a lakanbu n ti ni wu a mu lo wu yile, a la lo ki̱ni yaki̱delakangu.

⁴Di̱ne ka nang wuwule lo ki̱ni naba muke, aya n Kwama nang wu a mu chitu ki̱ni kwange.

⁵M Musa a ma nangangu ki̱ni ni̱ri diin we lo Kwama aya yinang bwe nanga. Yinu n ki̱n a ying ti̱n chitu ni̱bu ka fwadu we bwa kaketu.

⁶Aya n Masiya ki̱ni ni̱ri diin yinang bwe we ni̱bu Kwamamu. Yinu n chini nang ni̱bu ki̱mu ka ni tau yo ni̱re ni ri̱kanne.

⁷Nang chi a yo Fi̱ki̱m Kwamamu a yi ko, “Diwu ka ti̱nwe ker Kwamane,

⁸kedu ti̱mudu ni̱ru we ki̱ngki̱ng, yinangu ta wi ta ma kulangkulange, yinang di wu ni̱bu a swe mi̱n a di̱silanchagi̱ne.

⁹We bwa ko tukebu chimu a swe mi̱n a ku bwanu mi, kasi ki̱ku n chi a ku chitu mang tau mi̱n maditu we swa̱ti̱tu wan taanantu.

¹⁰Nang chi a yo mang ma ki̱fwini ki̱ni di̱kalan di̱ki̱nitu, n fwa mi, ‘N chi ki̱koyi kwadu we ni̱tu chitu. N chi a kebu ka ma chitu mang fwa chimi̱nitu.’

¹¹Di̱ne yiko m ma ki̱fwini we ni̱r mi̱nu n twa̱n chi mi, ‘n chi a ne ka yaan bwa ma do n chi ka fi̱kande we.’ ”

¹²Di̱ne yiko kebu mi̱m, a mwintuwe ti̱kedu ni̱tu chi̱ntu a ridu we ki̱ni bwila n ti kwalan keku bi̱yili̱mange, chi ka yodu ta du Kwama wu kure.

¹³Aya ti̱ kum yichiyu mi̱n ni̱tu diti ki̱da̱ng, ti̱ma nangangu ki̱ni ki̱swi ta ya ki̱ka̱nge, ke wuka a madu ni̱ri ki̱ngki̱ngi̱nuwe di̱ne di̱buti̱r ki̱leti.

¹⁴Ka ni lam di swan kute ki̱ni yile chire ki̱ri̱nge, ni ke bi̱yili̱mu we Kwama yinangu niyang mwe niyang yiu ki̱nange, yani chau li̱me ware n ti Masiya.

¹⁵Aya ti̱ tabi̱du ki̱kure wu we: “Ka ti nwe ya̱m ki̱mu diye, ti mi̱rsi̱du ni̱ru we ki̱ngki̱ng, yinangu Yisrela a ma Kulangkulangengu.”

¹⁶Kano ni̱bu bi̱bu m bi̱wure bi̱bu a ma kulangkulange n ti Kwama, kasi ki̱ku n chi a nwe ker ki̱ni̱mu, n ke ni̱bu Yisrelamu m Musa a chake chi a Masarma?

¹⁷M bi̱wure n Kwama a ma ki̱fwini ki̱ni chi swa̱ti̱tu wan taanamu? N chi ke bi̱bu a ma ki̱leti, bi̱bu chi a yaran a bwaran a nabwe di̱si̱lanchangi̱ne ma?

¹⁸M bi̱wure bi̱bu n Kwama a twa̱n chi we dur chi̱nu ko a ne lam bwa n chi ka fi̱kande mu? N chi nang bi̱bu a ko bunti̱ki̱mu kangi̱mu.

¹⁹Di̱ne yiko ni ku a dubu chi ko a le fi̱kaki̱ku di̱ne kwalan keku bi̱yili̱mang chiyange.