Read tula Yibraniyam 4 Bible Online

Yibraniyam 4 - tula bible

Yibraniyam 4

¹Yade bwa̱ki̱ ya̱m fi̱kaki̱mu, n we ki̱ka̱ngi chike, ni madi daan ke wuka we tibe chire a ki̱tan we wa̱re a lambu.

²Nangki̱n ni tu ni nwe ya̱m bi̱li̱mu bi̱bu a li̱nli̱memu yinangu n chi a tu a nwetengu, aya di̱mwar ya̱m bi̱li̱mu n chi a nwenu a makabu chi. Di̱ne n chi a yibu ki̱ni keku bi̱yili̱mang.

³We yiko, kana chi̱ni bi̱bu niyang ke bi̱yili̱mi̱mu ni le fi̱kaki̱ kangu. Aya bi̱bu a ko keku bi̱yili̱mangi̱mu, n Kwama a yi chi ko, “N twa̱n chitu yo m mi̱n a ki̱fwini miye, ‘N chi a ne len fi̱kaki̱ku we ko bayim.’ ”

⁴N nangki̱n a mwal ya̱m di wu yiddibine a wuka fi we ya̱m Kwamam bi̱mwali̱mu ko, “N Kwama a fi̱kan we nangi̱n kitu a di wu yiddibine.”

⁵Aya lanta ki̱ka̱ng ni̱bu a ki̱la fwati̱ ya̱m bi̱bu ki̱da ko, “N chi a ne le fi̱kaku mangu ko bayim.”

⁶Feredi ni̱bu a ma di̱mwar ya̱m bi̱bu a li̱nli̱mem we fi̱kaku kangu, aya ni̱bu a nwe di̱mwari̱mu a lebu di̱ne kwalan keku bi̱yili̱mang chiyange. Di̱ne yiko, ki̱swi we di̱ne ke bi̱kamu a le fi̱kaku.

⁷Da̱ng, n Kwama a ki̱la do wuka di n ki̱n a yal ko, “Diwu” a fwa ya̱m we di wu, a yii fa̱ku Dauda we swa̱ti̱tu a sutu, yinangu n we mi̱n we ya̱m bi̱mwali̱li̱m ya̱m Kwamamu a fwa feredimu ko, “Ka ti̱nwe ya̱m Kwamamu diye, ti̱mudu ni̱ru we ki̱ngki̱ng.”

⁸Ka a no n Chosuwa a ni ni̱bu Kwamamu fi̱kaki̱ke, no n Kwama a ne fwa wuka di dang we kuteng ki̱ku.

⁹Ti̱tu a yung fi̱kaku we a lanta ki̱ka̱ng, duum bi̱bu a di wu yidibiinemu di̱ne ni̱bu Kwamamu.

¹⁰Nangki̱n ka nang wuwule niye wu a ya fi̱kaku Kwamange, ki̱fi̱kadu we nangi̱n chitu yinangu n Kwama a fi̱kan we ki̱kangu nangangu.

¹¹Di̱ne yiko ni su funti̱ki̱bwiyang chirengu ke ni ya fi̱kaki̱ ki̱ku. Wuka ni a kedu a ki̱taduwe di̱ne kwalan keku bi̱yili̱mange wu a duum bi̱bu n chi a ma a kulangkulange.

¹²Nangki̱n di̱kwal Kwamanu ki̱ni ti̱kuri n ti dukan, ki̱ni chammu a la yii kulliti turabe, ki̱ mwatu ka ti̱ti̱le chiye, wenga finu bwe n ti Fi̱ki̱m a teka mi̱ne, we finu kwantu a ngaba mi̱ne, ki̱kaba ti̱kurantu n ti chi makitu ni̱r ni̱ni tu.

¹³A ne ti̱kan chi we wu ka laiyu we di̱Kwama chitu kwang we mweki̱ku a laibu aya a wuden we kwalangi Kwamayu, n ki̱n ka kaba chi̱ni mi̱nu kwang.

¹⁴Yo kwer niyang ya tikake Fanseti wu a ya we bwa diye, n ki̱n Yesu Bwe Kwama, ni ti ki̱ri̱ng ki̱ni keku bi̱yili̱mang chirengu.

¹⁵Nangki̱n tikake Fansetiyu chire wu, n ke wu ka du nidu we ki̱taku chi̱renge, ko bayim. Ni̱bu a sweti̱ ki̱n yinangu ka nang wuwule niye ki̱ya swekangu, aya n ki̱n a mabu ki̱le.

¹⁶Di̱ne yiko, ni ya fiswe mati̱n li̱me Kwama wu a ru ni̱re, ke ni yiu ki̱bune ni ya li̱meko wu ka makanidu we ki̱swi ni bau chiye.