Read tula Yibraniyam 6 Bible Online

Yibraniyam 6 - tula bible

Yibraniyam 6

¹Di̱ne yiko, ni chakakku ki̱ni di̱mwar Kwamanu niyang mwe mi̱n nangangu we a dur Masiya Yesun we tile bi̱rkenu, ke ni kau ni̱bu a swan chi yinangi̱mu. A dakabu ni wite ya̱mu ko ni chirmi̱n a ki̱letimu we, bi̱bu a yung ni ti we keku bi̱yili̱mang chirengu a Kwamangu.

²A dakabu ta chakakku ki̱ni yikku di̱mwar we ya̱m nura ku batismamu n ti yoku kangangu n ti ya̱m kunku kwa̱miyangu n ti ya̱m mwataku ki̱diya kwadi̱mu.

³Di̱ne yiko ka Kwama a kenge, ni chakakku ki̱ni swaanki̱ku.

⁴Nangki̱n, bi̱bu a ki̱lani kuteng we keku bi̱yili̱mang chiyamu, ka ma bwar yinangu ni̱bu ka yo chi ka wo ki̱ti̱mangu. Ni̱bu bi̱bu a ku yiiku Kwamangu, yinu a ya yayu we ki̱li̱mang Kwamangu dangtidangti a yati̱ li̱mang chiyangu we Fi̱ki̱m Kwamamu.

⁵N chi a twai li̱mang ya̱m Kwamangu n ti dukan ki̱dangu ki̱bedangu.

⁶Ka n chi a ki̱la kutenge, ka ma bwar yinangu n chi ka ki̱ladu ka wo ki̱ti̱mangu, di̱ne n chi ki̱kukati̱n Bwe Kwama ki̱da, yinu ki̱mi ki̱nu ki̱niti̱n ki̱n dibwi.

⁷Ti̱mu ki̱ no mwe twiye ki̱yo swa̱ki̱ku n ti chabti̱tu ki̱ledu yinangi̱mu, n Kwama ki̱yo delaku we ti̱m bi̱ki̱mu.

⁸Aya ka ti̱mu ki̱ki kwa̱da n ti swa̱ku ki̱bwilange, ti̱m bi̱ki̱mu a lebu, a yung n Kwama a mwatan ka ma ki̱mi̱n yii, ka a kaiyane, ka le ki̱rang.

⁹Kebu mi̱m, kasi ki̱ku mi̱n fwa ki̱duum ya̱m bi̱bangu, n yim ti̱funti̱ bwi we nangi̱n chi̱ntu.

¹⁰N Kwama naba yile, a yim nangi̱n chi̱ntu ta maatu n ti yinangu ta mi̱la ki̱nangu we yo yati̱maka ni̱bu bunti̱ki̱me, yinangu n we ti̱madu ki̱ka̱nganu.

¹¹Ni̱n baddu ka wure ka yung dum kwa̱mbi̱ri̱mu, ka swan ti̱ni bil, ke yo ni̱re mo a ti ki̱ri̱ng.

¹²Bwiti chiyu a fwidu we bubbuku, aya ti̱bunti̱ nani bi̱bu a ke bi̱yili̱mi̱mu, a ma bwanu a lami̱nti̱ ki̱dangu a yiu chi Kwama a bwa̱u ka ni chide.

¹³Ki̱dangu n Kwama a bwa̱u n ti Yibrayim mangu, a bwa̱u ki̱ni di̱twa̱mbi̱r. N ki̱n a ma di̱twa̱mbi̱ru ki̱ni di̱n ki̱n di̱ne a ne di̱nu a lwe n ki̱n ka twa̱mi̱n chi̱nu we.

¹⁴N ki̱n a twa̱m ko, “Bi̱yili̱m mang yo mi̱n delaku nabwen, ti̱nti̱ne mang yo bwebwiyeti mwiyu ka bwidu yinang ki̱switiyu a dii.”

¹⁵A kuteng ki̱ku n Yibrayim a ma bwanuwangu, a ya chi ni̱bu a bwa̱u ka ni ki̱nitu.

¹⁶Ka ni yaka ma di̱twa̱mbi̱re, ki̱twa̱ndu ki̱ni chi a la ki̱ne, di̱twa̱mbi̱r di̱du ki̱ kau di̱yili̱n.

¹⁷We yiko, n Kwama a kwau dur ki̱nu ki̱ni di̱twa̱mbi̱r ke bi̱bu a yiu li̱me bwa̱kemu, ka yindu ko bi̱yili̱m n Kwama a sutebu ya̱m ki̱mu.

¹⁸Ti̱me chite yurau, wu neka sutedu sutene, wu n Kwama a ne kedu ka ma ti̱kali ki̱ne, n ki̱n a bwa̱u ka yo nimi̱n delaku yinu ko ka a newe yiko, a yung n ki̱n naba ki̱le. Di̱ne yiko, n chir bi̱bu niyang yika bwa di̱ki̱ne ke ni ya rukku ni laituwemu, ni tidu we bwa̱ki̱ kangu ki̱ni dukan.

¹⁹Yo ni̱re chire wu nang chi ki̱bedu ki̱ni bwa̱ki̱ ni̱rang we tiku chi̱renagitu. Ki̱yikadu ki̱ni chi̱ni we kwa̱r Kwamanu ki̱ ledu ki̱ni chi̱ni a mure wu a ki̱di̱ng kangi wauwade.

²⁰We bi̱bu, n Yesu a tu a le fiko di̱ne chiniye, n ki̱n nang tikake Fanseti ki̱diya kwade yinang Melkisedek.