Read tula Yibraniyam 8 Bible Online

Yibraniyam 8 - tula bible

Yibraniyam 8

¹Di̱kwa̱l ya̱mi̱nu n di̱u. N chi̱ni ki̱ni tikake Fanseti, wu a swe a fi wuduwe wu mati̱n a kang ki̱yilang Kwamang.

²Fanse wuduwe wu ki̱ma nangang kangu a kan di̱du a murenu, di̱du a la chi ki̱ni wauwadenu. A finu Kwama siine we mi̱ne wu Tewuduwe n ki̱fwan a don ke nangang niyange.

³Ka nang wuwule fanse, nangang kangu ka ma niku n ti niku ki̱tuumang, a mwintuwe tikake Fanseti chire ka ma ti̱ni yiko.

⁴Ka n ki̱n a no we ti̱ti̱nite, a no ne ka kau fanse, di̱ne bi̱bu a ki̱kuwang fansetimu n we, bi̱bu ki̱bunti̱n ti̱bokani yili̱n musamu.

⁵Fansetiyu ki̱ma nangange kimadi chitu a kan di̱du a kabbi wauwadi̱n di̱ne a kau ki̱swerang we kasi sweki̱ku wu a diye. Nangki̱n, yo m Musa yaka ru kan muraki̱n di̱du a Kwamane, n Kwama a wu ki̱mi̱n ki̱tele ko, “Tabi̱du chi we, ma yinangu mwang ku mang yungi̱n we dii a kunangu.”

⁶Aya ki̱ka̱ngu n Yesu Fanse Wuduwe ki̱ni nangang ki̱duwang ki̱ku a la bi̱kamu fansetiyu a ma nangangu ki̱ni yili̱n Musamu. N ki̱n nang wu a tibe a ni chi̱ni da wu ni ya yayu wa bwa̱ki̱ n ti Kwama ka ni ma chi a dakane.

⁷Ka no bwa̱ki̱ ki̱kakkangu a ne der wenge, a no niyang babu kang.

⁸Aya yo n Kwama ki̱fwan a ya der we ni̱be, a fwa ko, “Ki̱swi ki bedu, yo mang chiredu ki̱ni bwa̱ki̱ ki̱fwiyangu n ti ni̱bu Yisrelamu n ti bi̱bu a Yafudamu.

⁹Ki̱ku bwa̱ki̱ a ne kadu yinang ki̱ku mang bwa̱u n ti tukebu chimangu, yo mang ta chi a fa̱la̱nge mang chaku chi we ti̱m Masar, n chi a tibu we bwa̱ki̱ mangu yinanga dakanang. Di̱ne yiko n sabi̱r kuteng n ni chi.

¹⁰“N Tewuduwe a fwa ko, Bwa̱ki̱ku mang madu dikongu, n ti ni̱bu Yisrelamu nang kiku: ‘Mang yo chimi̱n yili̱ntu we ti̱kuran chitu, di̱ne ke n chi a swaan. Ti̱nti̱ne mang mwalu we ni̱tu chitu ke n chi a nang bunti̱nu. Mang kau Kwama chi, n chi ka kau ni̱bu mi̱m.

¹¹N chi a ne baddu ko chi miya kebu chimu mi̱nu, ka wuka ka yi keko ko, yim Kwama. Nangki̱n n chi kwang ka yim mi̱nu, ka nang wuwule niye ka yim mi̱nu, ka mwe ti̱nu we bi̱ti̱ri̱mu ka ka swan ti̱nu we bi̱duumu.

¹²Nangki̱n, mang du chimi̱n ki̱letiyu a ne mang kur ti̱nu we ki̱dang.’ ”

¹³Yinangu n Kwama ki̱fwa ya̱mu ko bwa̱ki̱ ki̱fwiyangu, a yung ki̱ku a mwe mi̱nangu a ka̱ra̱ng. Chi a ka̱ra̱ka̱ra̱netu, a ri ki̱ni ying.