Read tula Yakubu 4 Bible Online

Yakubu 4 - tula bible

Yakubu 4

¹Wureni a yo ti̱ma tukaku n ti di̱kulan yiinu we tibe chi̱ne? A ne kamaku we ki̱bedu a kubeku chiyang changu ki̱ma kun we di̱chinangu.

²Ti̱bau chitu ta yabu, ti̱swanadi kakku durang, ti̱bau chitu ki̱ni dukan, ti̱kwaladu, ti̱swanadi di̱kulan yiin n ti dukulan. Chi a yo tayabu chite di̱ne ta twa̱ba̱bu buni we.

³Ti̱nti̱ne, ki̱dangu ti̱bi̱u Kwamangu ta yabu, di̱ne ta babu a wa̱re wu yile, di̱ne yata ma nangangi ki̱n a wa̱re wu kuse wu ta nweng ta̱ma̱ng chi̱nge.

⁴N ti̱n ni̱bu ti̱kulimu, ta yimbu tiko baku chi ti̱ti̱nitu kati̱n n ti Kwama? Di̱ne yiko ka nang wuwule niye wu ki̱mi̱la ti̱ti̱niye, a Mai dur ki̱nu kati̱re Kwama.

⁵Ka ti̱kamadu tiko a ne bi̱yili̱m we bi̱mwali̱li̱m ya̱m Kwamu a fwa ko, “N Kwama a rii ki̱ni di̱bwilang ki̱ken we fi̱ki̱mu a yo we di̱chi̱nemu.”[2]

⁶Aya n Kwama a su nimi̱n li̱meko nabwen nang chi a yo ya̱m bi̱mwali̱li̱m ki̱mu a yi ko, “N Kwama a babu ni ki̱kuki̱ dur ki̱ne ka swedu ki̱dwan n ti ki̱n, aya ki̱ma wu ni̱ri bubbuke mi̱n li̱me.”

⁷Di̱ne yiko ti̱yiu Kwama nang Tewuduwe mo, ti̱ti ki̱ri̱ng ti̱kedu n Setan we, ka du chi̱nu.

⁸Ti̱be ki̱dwang n ti Kwama, n Kwama ka be tedu ki̱dwang n ti chi̱n. Ti̱du chi a lebitu n ti̱n ni̱bu ki̱letimu, n ti̱n ti̱kuran chi̱ntu a kera kerane ti̱do ni̱tu chiti wa̱la̱k.

⁹Ti̱ma furi ki̱lin, ti̱kii wii, ti̱fwal ti̱mwenitu. Ti̱lemi̱n ti̱nurantu, ti̱nang kii wii, ti̱du ti̱mi̱lantu, ti̱nang ma furi ki̱lin.

¹⁰Ka ti̱swa̱ba yi chiyu we kakku Tewuduwe, n Kwama ka ri̱ka chi̱nu we kakku kangu.

¹¹Kebu mi̱m, ti̱fwadu chi ti̱kusi we tibe chi̱n. Di̱ne ni ki̱ tu keko naba bunti̱ke, ka mun mwata ki̱mi̱nne, a yung mun makadu n ti yilang Kwamang, mu yo yilang Kwamangu mi̱n ki̱le. Nangki̱n ka mun makadu n ti yilang Kwamange, a yung mwang bunti̱bu yilangu. Ti̱nti̱ne n yung dur munu naba mwatake.

¹²N Kwama ki̱kun wu a yo yilange, nang ni ka mwata nimi̱n ti̱ne. N ki̱n ki̱kun ki̱ni dukan yuki̱nu, n ti di̱du a chikki̱nu. Aya mun kamadu m mun n wure wu mwan lwe mwang mwata kemo mi̱nde?

¹³Ti̱nwe n ti̱n bi̱bu ti̱ yidu ko, “Di ka fi̱nenange ni̱n yika di̱kan bi̱n, nang ma swa̱r wenu. Nang ma di̱be we bwako nang mur ka̱mbi̱r.”

¹⁴Chi ti̱fwade a lebu, di̱ne ta yimbu chi ka fwedu ki̱ni chi̱n fi̱nenange. Ti̱kuri chi̱ntu yinang di̱talluken di̱du a ne tike, ki̱yarati̱nu.

¹⁵Chi a no ta fwaditu nang ti̱tu, “Ka n Tewuduwe a ke a du ti̱kurite, nang ma ti̱tu n ti ti̱tu.”

¹⁶Aya ki̱ka̱ngu ti̱kuku duru, ti̱ngau kwiye we chi ta yo a kakitu, aya maki yikongu kana nangang ki̱bwilang.

¹⁷Di̱ne yiko, ka nang wuwule niye wu a no dakan ka ma chi ti̱yiliye yinu n ki̱n a mabe, a kau ki̱mi̱n ki̱le we kakku Kwamangu.