Read tula 1 Biti̱re 1 Bible Online

1 Biti̱re 1 - tula bible

1 Biti̱re 1

¹M Biti̱r, fandu Yesu Masiya, m mwal bi̱suturi̱m ni̱bu Kwama mi̱n lwangi̱n di̱du, bi̱bu a ti̱ran ki̱ma fiswe wu a ni̱bu kuume we yaatiyu a Fontu, Ka̱latiya, Kafadokiya n ti Asiya a lanta Bitiniyamu.

²N ti̱n bi̱bu n Kwama Te a yim chi̱n a sutu chi̱n feredimu, Fi̱ki̱m ki̱mu a yo ti̱kau bi̱bi wauwadi̱m, ke ti̱ma Yesu Masiya mi̱n kwa̱mbi̱r ti̱ya nuraku we ki̱tum ki̱mu. Li̱me n ti li̱mangu a swe n ti chi̱ni di̱bi̱l.

³Ni dela Kwama n ti Te Tewuduwe chire n Yesu Masiya di̱ne ne ki̱bune a ni chi̱ni ti̱kuri ti̱fwin we kunku Yesu Masiya we furangu. Ti̱tu a yo n chi̱ni ki̱ni yo ni̱re wuduwe.

⁴Yinu ni yo ni̱ru ke ni ya chi n Kwama a yo ni̱bu ki̱m mi̱ne, a yo chi̱n mi̱n a bwaditu, finu a ne twiyadu, a ne kayadu, ka ka surede.

⁵We keku bi̱yili̱mang changu, n ti̱n bi̱bu n Kwama ki̱to chi̱nu ki̱ni dukan ki̱nu ka lami̱nti̱n di yuke wu n ki̱n a do ka yung ki̱nu we di swang kute.

⁶Ti̱ma furi mwen we ti̱tu, kasi ki̱ku ki̱ka̱ngu we ki̱swi wu bayim ti̱ma furi ki̱liki̱lin di̱ne sweki̱ku ti̱yadu we mure dangtidangtiyangu.

⁷Ti̱tu ki̱fwedu di̱ne ke a yung yinangu keku bi̱yili̱mang changu a tiyangu. Kasi no si̱nariya, wu ka kayade, ni swedu a ki̱rang, keku bi̱yili̱mang changu yiko, wu a la si̱nariya, a mwintuwe ka ya sweki̱ku, ke a ya ruku. Yinu ta ya delaku n ti dwiyentu nabwen we di n Yesu Masiya ka fwadede.

⁸Ti̱mi̱la ki̱n, kasi ki̱ku ta kuunbu ki̱n wengu, ti̱ke bi̱yili̱mu we di̱ki̱ne, kasi ki̱ku ta kubu ki̱n ki̱ka̱ngu. Ti̱ri furu ki̱ni ti̱mi̱lantu nabwen n ti ti̱mi̱la ti̱tu a dwiyen ti̱tu a su ki̱nati̱ngi,

⁹di̱ne ti̱ yiu ki̱ti̱me chi̱n we keku bi̱yili̱mang changu nang yuku ti̱kuri chi̱ntu.

¹⁰We yuku ki̱ku fa̱kui a ta̱l ya̱m bi̱bu di̱ne ke chi swaan, yo n chi a fwa ya̱mu we li̱me wu n Kwama ka ni chi̱ne.

¹¹N chi a bau ka yindu ka ti̱tu ka fwedi fere, n ti kangu ka fwendangu. Wu nang ki̱swi wu Fi̱ki̱m Masiyamu we di̱ chiye a no ki̱yung chidu, ki̱fwadu kangu m Masiya ka mu ni̱ru we nwe riyengu, n ki̱n ka ya dwiyen kite.

¹²N Kwama a kwa̱l chimi̱n ko, nangan chiyangu n ke di̱ne dutu chiye, aya di̱ne chi̱n. Ki̱ka̱ngu n chi a fwa ya̱m we ti̱tu chi ta tu ta nwe we Fa̱ku wu a fwa Ya̱m Bi̱li̱m we dukan Fi̱ki̱m bi̱bu a tume a bwa diye mu. Ti̱tu nang chitu kasi no ni̱bu ti̱tumbi̱rimu ki̱baddu ka swaane.

¹³We yiko, ti̱do ni̱tu chi̱ntu di̱ne nangangu, ti̱tau dutu chi̱ntu, yinu ti̱yo ni̱tu chi̱ntu we li̱me ka ni chi̱nu we di n Yesu Masiya ka fwadede.

¹⁴Ti̱kabi ki̱ni kwa̱mbi̱r we bunti̱ki̱ku yinang bwesi̱m Kwamam, ti̱kedu chi ti̱bwilatu ti̱baditu a kwel chimi̱nu ni̱tu we, yinang yo n ti̱n a no a ki̱liye.

¹⁵Aya ti̱kau ki̱ni wauwade we nangi̱n chi̱ntu kwang, yinang ki̱ku n Kwama wu a yal chi̱ne yi wauwade.

¹⁶Ya̱m Kwamamu a fwa ko, “Ti̱ma fiswe wu wauwade, di̱ne n mi̱ni wauwadu.”

¹⁷Ti̱ yal ki̱nu tiko Te, yo ti̱twa̱ba̱ buni we di̱Kwama, n Ki̱n wu we mwataku ni̱bangu a yungbu lakaku we nangi̱n ti̱tu n ka wure a mangitu. We yiko, ti̱ya yayu ki̱ni tayi Kwamai we ti̱ti̱nitu yinangu chi̱n ni̱bu kuum.

¹⁸Di̱ne ta yim n Kwama a tu chi̱n we dati yikusi yiyu tukebu chimu a du chimi̱niyu, a tubu chi̱n ki̱ni chitu ki̱kayadu kayane, yinang asurfa ka si̱nariya,

¹⁹Aya a tu chi̱n ki̱ni ki̱tum bi̱bu a ma kwa̱ti̱ri̱m bi̱u Masiya, wu yinang be kwane niku ki̱tumang, di̱du a ne der we ko bayimi̱n.

²⁰N ki̱n nang wu Kwama a sutu yo a tibu yo ti̱ti̱niye, aya we diti swan kuteyu n ki̱n ka fwadedu di̱ne chi̱ne.

²¹A di̱ki̱ne n ti̱n ti̱ke bi̱yili̱mu we di̱Kwama, wu a kuku ki̱n we fure, a ni ki̱n dwiyentu, di̱ne ti̱te keku bi̱yili̱mang changu n ti yo ni̱re a di̱Kwama.

²²Ki̱ka̱ngu yo ta kabi wa̱la̱k we kwa̱mbi̱r chi̱nu ki̱ku a bunti̱ku bi̱yili̱m mangu ke ti̱yung kebi̱bu ne mi̱laku changu, ti̱mi̱la yichiyu yinang we ni̱tu chi̱ntu.

²³Di̱ne ta ya bi̱be wu fwiye, n ke ti̱kuri ti̱tu ka ridu riye, aya ti̱tu ki̱diya kwadi. A di̱kwa̱l Kwaman di̱du ki̱ni ti̱kuri yinu di̱kwa̱l di̱du ki̱diya kwade.

²⁴Yinangu ya̱m Kwamamu a fwa ko, “Ni̱bi kwang yinang swa̱ku, leran chitu yinang fili̱n swa̱ki̱n. Swa̱ki̱ku ki̱wurmadu yinu fili̱ntu ki̱twakati̱nu,

²⁵aya ya̱m Tewuduwe mu we ki̱diya kwadu.” Ya̱m bi̱bu nang ya̱m bi̱li̱mu a fwa chimi̱n a di̱mwar ki̱ni̱mu.