Read tula 1 Biti̱re 2 Bible Online

1 Biti̱re 2 - tula bible

1 Biti̱re 2

¹Di̱ne yiko, ti̱du ka ti̱ti̱le chi ti̱bwilaiye, n ti̱ ti̱kwanitu, n ti di̱bebelin, n ti kati̱ntu, n ti ka ti̱ti̱le ki̱duum ti̱turane.

²Yinang bwesi̱m ki̱lwim bi̱bu ki̱bau ka̱rku yaran, n ti̱n ti̱ bati̱ ya̱m Kwamami yiko, ke ti̱dwiyen yinu ta yati̱ yuku.

³“Ki̱kangu ta tu ta twai li̱me Tewuduwe.”

⁴Ti̱be bwa di̱Masiya, wu n ki̱n yinang kale ti̱kuriye, wu ni̱bu a ko, aya n Kwama a sutu ki̱n a ni ki̱n dwiyentu.

⁵N ti̱n, ti̱n ti̱kau yinang kali yikuri, yiyu ni̱bu ki̱ma nangangi ki̱n ke a mu duum kan Kwaman da Fi̱ki̱mi Wauwadi̱m. Finu tani̱n ma ki̱mi̱n nangangu yinang kwa̱l fanseti wauwadi. Ta ni̱n ma ki̱mi̱n niku ki̱tumang duum bi̱bu a Fi̱ki̱m n Kwama ki̱ baddi̱mu a di̱Yesu Masiya.

⁶Yinangu ya̱m Kwamamu a fwa ko, “Da̱ng, n sutu kale wu a yile, n yo a kau kale wu a fwiti̱ne we Siyona. Wu a ke bi̱yili̱mu we kale we, a ne nwe dibwi ko bayim.”

⁷N ti̱n bi̱bu ta ke ki̱ni ki̱ni̱mu, kale wu ki̱ni nangange we di̱ chi̱ne. Aya bi̱bu a kebu ki̱ni̱mu, yinangu a fwangu, “Nang kale wu ni̱bu mukki̱mu a ko, a kau kale wu a lachi ki̱ni nange.”

⁸Yinu n ki̱n, “Kale wu ki̱yo ni̱bu ki̱ngau bewure we, ti̱nti̱ne kwam wu ka bedu ki̱ni yare.” N chi a ngau bewure di̱ne n chi a mabu kwa̱mbi̱r we ya̱m Kwamamu. Nang chi n Kwama a do di̱ne chiye.

⁹Aya n ti̱n bi̱suti̱ri̱m ni̱bu, n ti̱n kwa̱l fanseti bi̱u Mai Wuduwemu. N ti̱n kuu wu yi wawadu, ni̱bu Kwamam, wu a sutu chi̱n ke ti̱ma di̱mwar nangang Kwamang. N ki̱n a yal chi̱n we ki̱liye, ke ti̱ le yiiku kangu ka ya̱r yiiyangu.

¹⁰Yo ferediye, n ti̱n a no n ke ni̱bu Kwamam, aya ki̱ka̱ngu n ti̱n ni̱bu ki̱m, yo no ferediye n Kwama a nwebu ki̱bune chi̱n, aya ki̱ka̱ngu ti̱ya ki̱buneko.

¹¹Kebu bi̱bu mi̱n mi̱ladi̱m, mi̱n wana chi̱nu, n ti̱n ni̱bu kuum we ti̱ti̱nitu, n ti̱n ti̱ newe ki̱ni lo we fi, ti̱du kubeki̱ku a bwiyangu chi ki̱ma kati̱n n ti ni̱r chi̱ne.

¹²Ti̱kabi ki̱ni da wuyile we kuu ni̱bu bi̱bu a yimbu Kwamamu ke yo n chi ki̱mar ki̱mwa̱rang changu ko ti̱ma chi ti̱bwilai, di̱ne nangi̱n ti̱yili chi̱ntu n chi ki̱kuditu, n chi ka ki̱ladu kani̱n dela Kwama we Di ki̱lake ko.

¹³Di̱ne Tewuduwe, ti̱ma ka nang ti̱ti̱le mati̱ne mi̱n kwa̱mbi̱r wu ki̱ni dukan we ni̱be. Ti̱bunti̱ chi Mai wuduwe ki̱fwade, di̱ne ki̱n nang Mai wuduwe ki̱ni dukane,

¹⁴n ti Kwabnatiyu, bi̱bu n ki̱n a suti̱mu, ke a wela ni̱bu ki̱ma ki̱lemu a werti̱ bi̱bu ki̱ma chi a datu.

¹⁵Nang ki̱ke Kwama ka ti̱tum daati yiyiliye, ta yinge yiini ni̱biyu we ya̱mi yikusiyu a no dabu ni̱bu kani̱n fwaradu a dutu chinte a kwalan swaanke chi.

¹⁶Ti̱ma fiswe wu a ni̱bu a ya tuki̱m, ti̱kedu da ta ya a yodu ti̱ tundu bwila we, aya ti̱ ya yayu wu ka yungdu n ti̱n ka̱bi Kwamai.

¹⁷Ti̱ni ka wuwule niye dwiyentu, ti̱mi̱la bi̱kamu ni̱bu bunti̱ki̱m, ti̱nwe tayi Kwama, ti̱ni Mai wuduwe dwiyentu.

¹⁸N ti̱n ka̱biyu, ti̱ma tebu lo chimu mi̱n kwa̱mbi̱r ti̱ni chi dwiyentu kwang, n ke kana ni̱bu bi̱yili̱m bi̱bu ni̱ri bukki̱m, aya n ti bi̱bu ki̱ma chimi̱n muli̱ni̱mu.

¹⁹N Kwama ka dela chi̱nu we ti̱tu, ka ti̱mu ni̱ru we nwe riye yo ta mabu wuka ki̱lenge, di̱ne Ti̱ti we chi a ki̱ke Kwama.

²⁰Aya ka ni̱bu a twalan a wuka ki̱le, kasi no m mu ni̱ri yire we ti̱tu a ne ki̱ti̱me we. Aya ka ti̱ma nangang ki̱yilange, yinu ti̱nwe riye we dur ki̱ne, ti̱ma bwanuwe, a le, n Kwama ka yo chimi̱n delaku.

²¹Nang chi n Kwama a yal mi̱ne chi̱ne, n Masiya a nwe riye ti̱n di̱ne chi̱ne. Nang tiyangu a du chimi̱n ko ti̱bunti̱ nani kiyu.

²²“N ki̱n a manbu ki̱le we ko bayim, a ne nii a nwe mi̱nti̱ ti̱kwani a yiko we.”

²³Ki̱dangu ni̱bu a tu ki̱nangu, n ki̱n a yeebu. Ki̱dangu a nwe riyengu, a yibu ko ka yeedu. Aya n ki̱n a yo ni̱r ki̱nu a ka di̱Kwama, wu ki̱ma mwataki̱ ki̱yilange.

²⁴N ki̱n ki̱fwan a da̱u ki̱leti chireyu we bwikiyu yo ni̱bu a kuka ki̱n a ki̱tiyang bwange. A ma yiko ke we bwako ke ni du ki̱leti chireyu ni kau ni̱bu yilem. We bunbi kitu ti̱ya beku.

²⁵Feredi a no ti̱le we wa̱re yinang kwanti, aya ki̱ka̱ngu ti̱ki̱lawe bwa Naba Toke, wu ki̱to ti̱kuri chi̱ne.