Read tula 1 Biti̱re 3 Bible Online

1 Biti̱re 3 - tula bible

1 Biti̱re 3

¹A fi wiine, n ti̱n nati̱bu ti̱ma kwartabu chimu mi̱n kwa̱mbi̱r, ke ka bi̱kam we tibe chi a bunti̱bu ya̱m Kwamame, we daati yiyili chiyu ka yodu n Kwama ka wuwe chidu, kasi no niya ma chimi̱nbu di̱kan di̱mwar,

²di̱ne n chi ka kudu tiyangu n ti̱ni wa̱la̱k we ni̱tu chi̱ntu n ti kwa̱mbi̱r chi̱nu.

³Leran chi̱ntu a kadu ka ti̱tu a bwi we, yinang yikki̱ durang ka doku bukki si̱nariya, ka kuli̱n di̱du ki̱ni kwa̱ti̱ri̱ne.

⁴N ti ki̱ku ta madi yangu, leran chi̱ntu a kau ti̱tu a mure ni̱r chi̱ne, ti̱kabi buk ki̱ni takku durang ti̱tu nang daatiyu a kayabu kayane. Ti̱tu nang chi a la chiye we di̱Kwama.

⁵Nang chi nati̱bu feredimu bi̱bi wauwadi̱mu bi̱bu a yo ni̱tu chitu a di̱Kwama yinu a dosa dutu chitu. N chi ki̱ma kwartabi̱ chimu mi̱n kwa̱mbi̱r.

⁶Yinang Saratu, wu a ma kwartako, n Yibrayim mi̱n kwa̱mbi̱re yinu ki̱yal kwartako ko, “Tete.” N ti̱n ta kau fwa̱niki ka nangi̱n chi̱ntu a lenge yinu ta nwebu taye.

⁷Yiko ti̱n, n ti̱n kwartabu, ti̱swe n ti nati̱bu chimu ki̱ni swaangku, ti̱yim n chi a ne dukan we yinang chi̱n. Ti̱ni chi dwiyentu di̱ne n ti̱n n ti nati̱bu chimu ti̱ya ti̱kuri ware di̱ne li̱me Kwama. Ti̱ma ying ke twa̱ba̱ku chi̱ngu a ledu wa̱re we.

⁸We kutengi kwang, n ti̱ni ki̱ni kwang ti̱yo ti̱kuran chi̱ntu a fi wiine, ti̱nwe ki̱bune yichiyu, ti̱mi̱la kebi̱bu, ti̱maka yichiyu, ni a kukki̱du dur ki̱nu we.

⁹Ti̱yedu bwila we ki̱ni bwila, ka di̱tur ki̱ni di̱ture. We yiko, ti̱yo chi mi̱n delaku. Di̱ne yiko n Kwama a yal chi̱ne a bwa̱u ta ya delaku.

¹⁰A mwalmwale ko, “Wu ki̱baddu ka nwe ta̱ma̱ng ti̱kuri kiye, yinu ki̱baddu diti kiyu ka lediye, a tau ben ki̱nu we chi ti̱bwilaitu, a tatti̱ yii ko we ti̱kwanitu.

¹¹N ki̱n ka sabi̱r kuteng we bwila ka ma chi ti̱yili, a bau li̱mangu ki̱ni ni̱r ki̱ni diin.

¹²Di̱ne nui Tewuduwe we a nii ki̱tum yile, ki̱telikiyu ki̱nwe twa̱ba̱ki̱bune chitu. Aya n Tewuduwe a sabi̱r kuteng we ni̱bu ki̱tum bwilamu.”

¹³N wure ka ma chimi̱n muli̱nu ka ti̱funti̱bwi ti̱ma chi ti̱yiliye?

¹⁴Aya kasi no ti̱ nwe riye we chi ti̱yilitu ti̱maditu, n Kwama ka yo chimi̱n delaku. Di̱ne yiko ti̱nwedu tayi bi̱bu ki̱ma chimi̱n muli̱ni̱mu we, a buddu chi̱n ni̱r we.

¹⁵Aya we ni̱tu chi̱ntu ti̱ni Masiya dwiyentu, di̱ne ki̱n nang Tewuduwe. Ti̱swe ki̱ni doku bwiyang ka wuwule ki̱swiye ke ti̱ni ka wuwule niiye di̱ki̱li̱nu wu ka bi̱u chi̱nu we yo ni̱re n ti̱ni ki̱ne,

¹⁶aya ti̱ma ki̱ni ni̱ri bukki̱n n ti niku dwiyenang. Ti̱ma ka nang ti̱ti̱le chiye ki̱ni ni̱r di̱yili̱ni kwadu, ke ka ni̱bu a tu chi̱ne, bi̱bu ki̱fwa bwila we da wuyile chi̱n wu a ni̱bu bunti̱ki̱m Masiyame be ka nwe dibwi.

¹⁷Di̱ne a dakan, ta nwe riye we chi ti̱yilitu ti̱maditu ka ki̱ke Kwama, n ti ki̱ku ta nwe riye a tunku bwila.

¹⁸We yiko n Masiya a bwa di̱ne ki̱leti ki̱da kiin a ri, n ki̱n naba yile a bwa di̱ne chi̱ni ni̱bu ki̱leti̱m, ke a yo ni we kakku Kwamangu. N chi a chi̱u ki̱n we bale bwiye, aya n ki̱n a kuku ki̱n wukure ki̱ni dukan Fi̱ki̱m.

¹⁹Yinu we dukan Fi̱ki̱mi̱nu n ki̱n a yikan a ma di̱mwaru we fi̱ki̱mtiyu a lo di̱bi̱nti̱leyu.

²⁰Bi̱bu nang fi̱ki̱mti bi̱bu chi a ko a bunti̱bu chi n Kwama fwa ferediye, ki̱dangu ki̱n a swe ki̱ni bwanu we yo n Nufu a yaki̱ do kwa̱mbi̱re mwe. Ni̱bu a swimi bayim we mwe bambi̱lake, n chi nari̱bu we kwa̱mbi̱re mwe.

²¹Mwe wu a kau di̱mwal batisma di̱du a yu chi̱n ki̱ka̱ngi̱nu. N ke nuraku dutang we bwiti chiyu, aya nang bakku ta ma Kwama mi̱n nangu ki̱ni ni̱ri diine. Ki̱yu chi̱nu we kunku Yesu Masiyangu we furu.

²²Ki̱ka̱ngu m Masiya a yika dii. A swe a kang ki̱yilang Kwamang, ki̱ma mati̱n ni̱bu ti̱tumbi̱ri Kwamamu n ti mati̱mu n ti ni̱bu ki̱ni dukani̱mu a swe a wume ko.