Read tula 1 Biti̱re 4 Bible Online

1 Biti̱re 4 - tula bible

1 Biti̱re 4

¹Yiko ti̱n yinangu m Masiya a nwe riye we a bwiye, n ti̱n fal ti̱ mu ni̱ru ti̱bunti̱ da ko we nwe riye, di̱ne ka nang wuwule niye wu a nwe riye a bwiye, ka du maku ki̱letiyangu.

²We ki̱swi a du ta swedu we ti̱ti̱nite, ne ta ki̱lati̱nu we da chi̱n wa kubeku bwiyange, aya ti̱ bunti̱ ki̱ke Kwama.

³Ti̱kai ki̱swi chi̱n feredi ti̱ma chi kuu ni̱bu a yimbu Kwama ki̱maditu. Ti̱lekan we ti̱kulitu, n ti kubeki̱ bwiyangu dangtidangti, n ti ti̱tosantu, n ti ki̱fi̱bti n ti ti̱noran ta mabwi n ti siiku di̱yor.

⁴Yinu ki̱kangu fati̱bu chimu feredimu ki̱ya̱r yii yo ta kunkabu n ti chi we maku chi ti̱bwilatu yinangu no kwadangu, n chi ki̱ swa̱ba chi̱nu.

⁵Aya n chi ka fwa ki̱leti chiyu we kakku Kwamangu, wu ka mwata bi̱bu ki̱ni ti̱kurimu n ti bi̱bwari̱mu mi̱nu.

⁶Nang chi a yo ni̱bu a ma bi̱bwari̱mu mi̱n di̱mwar ya̱m bi̱li̱me, kasi ki̱ku ni̱bu a mwata chimi̱n we a bwiyangu yinangu a fwe ti bi̱kamu ni̱bangu, ni̱bu n chi ka medu ka swedu we Fi̱ki̱mu yinang Kwama.

⁷Ti̱ti̱nitu a mwatan ki̱ridu, di̱ne yiko ti̱ti ki̱ni ki̱yolang, n ka wure a tau dur ki̱nu, ke ti̱yim tiwe twa̱ba̱ku buningu.

⁸Chi a la chiye nang ti̱tu, ti̱ mi̱la yichiyu ki̱ni ni̱ri diin, di̱ne mi̱laki̱ku ki̱yo duku ki̱letiyangu nabwen.

⁹Ti̱yiu kal chi̱nu a chau chitu we loni chiyu a ne kungakunga we.

¹⁰N Kwama a ni ka wure wakili ki̱ti̱me wu ka mang chiye dangti dangti, wu a li̱me ko, di̱ne ke ni ma nangangi ki̱n ke ni maka kal chi̱renu.

¹¹Nii wu ki̱ti̱me ko wu a di̱mware, a mwintuwe ka ma di̱mwar ya̱m bi̱bu a chire a di̱Kwamam. Bi̱bu ki̱ti̱me chi nangange, a chakakku a nang ma nangangu ki̱ni dukan di̱du n Kwama a ni chi̱nu, ke we chiti kwang n Kwama ka ya delaku we di̱Yesu Masiya, wu dwiyentu n ti dukanu n ti̱ki̱n ki̱diya kwadu. Amin.

¹²Kebu bi̱bu mi̱n mi̱ladi̱mu, ti̱yaru yii we riye ti̱nwedi budde di̱ne sweku change, ti̱da̱du we ti ti̱kan chi ti̱fwi ki̱fwedu n ti chi̱n.

¹³N ti̱ki̱ki yikongu, ti̱ri ki̱ni ti̱mi̱lan di̱ne ti̱nwe riye tiyangu m Masiya nwengu, ke ti̱ri ki̱ni furi mwe mwen nabwen yo n ki̱n ka bedu ki̱ni dwiyen kite.

¹⁴N ti̱n ni̱bu delaki̱m ka ni̱bu ki̱tu chi̱nu di̱ne ti̱bunti̱ Masiya, ti̱tu ki̱yung Fi̱ki̱m Kwamam bi̱bu ki̱ni dwiyeni̱m we ware ti chi̱n.

¹⁵Nwe riye chi̱n a kaduwe di̱ne ti̱kau dute, ka kute, ka ti̱ma chi ti̱bwilaiye, ka ti̱ yo dur chi̱nu we chitu a ne lwangang chang we.

¹⁶Aya ka wuka we tibe chi̱n ki̱nwe riye di̱ne ki̱bunti̱ Masiya, a nwedu dibwi we, aya a nang wana Kwama di̱ne ni̱bu ki̱yal ki̱nu ko naba bunti̱ke.

¹⁷Ki̱swi a lam di̱ne mwatake, ka mwedu we ni̱bu bi̱bu m bi̱u Kwamamu. Ka a mwetuwe di̱chi̱niye, kanodu bi̱bu a kebu ya̱m bi̱li̱m Kwamamu ka kadi yire?

¹⁸A mwalmwale ko, “ka ni̱bu yilemu ka swidu bawiye, ka kadi yire we bi̱bu a yimbu Kwamamu n ti ni̱bu ki̱letimu?”

¹⁹Di̱ne yiko, bi̱bu ki̱nwe riye di̱ne ki̱ke Kwama, a chakakku a nang ma chi a leetu. A ni dutu chitu a di̱Kwama wu a mu chi kwange, n ki̱n wu a kwiyabu bwa̱ki̱ kange.