Read tula 1 Biti̱re 5 Bible Online

1 Biti̱re 5 - tula bible

1 Biti̱re 5

¹M mi̱n wu mang kau sele mi̱n fwan, mi̱n mwa chi̱nu n ti̱n seli̱bu kanbi Kwamamu. M mi̱n wetuwe bi̱bu a ku riye Masiyame. M mi̱n wetuwe bi̱bu ka ya delaku kangu we di ki̱lake ko. Mi̱n wana chi̱nu mi,

²ti̱ to ki̱ran kwanti di̱du n Kwama a ni chini̱nu. Ti̱nang da̱ngdu ki̱ni ki̱ ke chi̱n, n ke yinangu ni̱bu ki̱yo chi̱nu yong. Ti̱maduwe di̱ne ni̱bu ka fee chi̱ne, aya ti̱ma di̱ne ti̱ badu siin ta ma nangang Kwamang.

³Ti̱yungdu dukan we ni̱bu bi̱bu n Kwama a ni chini̱mu, aya ti̱yung da wuyile we kwanti n chi ka miyade.

⁴Yinu yo Naba Toke Wuduwe ka fwadede, taya di̱ki̱ri̱n di̱yili̱n di̱du dwiyen kitu a ne ridu riye ki̱diya kwadunu.

⁵Bwelemu ti̱n, ti̱bunti̱ ya̱m seli̱bu. N ti̱ni ki̱ni kwang, ti̱kuki̱du dutu chi̱ntu we, ti̱maka yichiyu we nangangu, di̱ne ya̱m Kwamamu a fwa ko, “N Kwama ki̱ko ni̱bu ki̱kuki̱ duti̱mu, aya ki̱yung ni̱bu bi̱bu a kuki̱bu dutu chiti̱mu mi̱n li̱me.”

⁶Di̱ne yiko, ti̱kuki̱du dutu chi̱ntu we kakku Kwama naba dukane, ke we ki̱swi a dakane ka ni chi̱n dwiyentu.

⁷Ti̱du ti̱kuran chi̱ntu kwang a di̱ki̱ne, di̱ne n ki̱n nang naba tore chi̱n.

⁸Ti̱do bwi, ti̱swe ki̱ni ki̱yolang! N Setan ki̱bwa̱ladu yinang turum wu ki̱kii wii chune, ki̱bau wu ka wude.

⁹Ti̱nidu ki̱n da we, ti̱ti ki̱ri̱ng we keku bi̱yili̱mang changu, di̱ne ta yim kebu chimu ni̱bu bunti̱ki̱m ka nang bwa̱le we ti̱ti̱nitu, n chi ti̱n ki̱nweti̱ riye wu yiko.

¹⁰A kutengu ta nwe riye a baku ki̱swi bayimangu, n Kwama naba li̱me kwang, wu a yal chi̱ne a di̱ Yesu di̱ne ke ti̱ya dwiyenkitu ta ki̱diya kwadi, n ki̱n ka yodu ta kadi di̱mbi̱ri̱m, ka ni chi̱n dukan yinang, yinu ka ru ti̱chinu.

¹¹Mati̱nti kwang n ti̱ki̱n ki̱diya kwadu! Amin.

¹²M mwal chimi̱n lwangi̱n di̱du ki̱ni makaku Sila,[1] wu ki̱n naba bunti̱ki̱ke mang ke. N ke mang ru chi̱nu, mang fwa chimi̱n ti̱ni kwa̱rikwa̱ri bi̱yili̱m li̱me Kwama kangu wemi̱nangu. Ti̱ti ki̱ri̱ng we mure.

¹³Ni̱bu bunti̱ki̱mu a fi a Babilamu,[2] bi̱bu Kwama a sutu ti̱n yinang chini̱mu, ki̱sii chi̱n tedu, bwemi m Markus ki̱siite chi̱nu ti̱n.

¹⁴Ti̱siikan ki̱ni kwarkaku ki̱yung mi̱laku ni̱bu bunti̱ki̱me. Li̱mangu a swe ware n ti chi̱ni kwang, n ti̱n bi̱bu m bi̱u Masiyamu.