Read tula 2 Biti̱re 2 Bible Online

2 Biti̱re 2 - tula bible

2 Biti̱re 2

¹Aya yo no ferediye, fa̱kubu ti̱kwanimu a chire we ni̱bu Kwamamu, yinangu a ne ni kwala ni̱bu yungku ti̱kwanimu we di̱ chiniyemu. N chi ka bedu ki̱ni ki̱ka̱ng miyaku ti̱kwani ki̱ku ka yodu ni̱bu ka twa̱ndu we keku bi̱yili̱m chimu, n chi ka ko Tewuduwe wu tu a chiye, di̱ne yiko n chi ka wu dutu chitu mi̱ne ti̱welan ti̱bwilai.

²Ni̱bu nabwen ka bunti̱ chi dibwi ti̱tu a yaritu. We chitu n chi ki̱maditu, bi̱kamu ni̱bu nabwen ka swa̱ba wa̱re wa bi̱yili̱me.

³We mi̱kakwiye chi ni̱bu miyaku ti̱kwanimu ka funti̱bwi we fwaku ki̱sini ya̱m ti̱kwanimu ke chi ya ka̱mbi̱ru nabwen we di̱chi̱ne. Feredi n Kwama a tu a mwata chi mi̱n, ki̱swi twiyake chi we ki̱yang chidu.

⁴Kono nang ni̱bu ti̱tumbi̱ri Kwamamu feredimu n Kwama a dubu chi yo n chi a ma ki̱lenge, n ki̱n a mar chi a far ki̱rangi̱n, bwar ti̱tu a su a ne yiiku we ka ki̱liye fi n chi kani̱n ya̱mi̱n di mwatake.

⁵Ko nang ki̱dangu ferediyangu n Kwama a dubu ti̱ti̱nitu, n Ki̱n a fi̱r ni̱bu a bunti̱bu da komu we ti̱ti̱nitu ki̱ni mwe bambi̱lake, a du ka Nufu wu ki̱ma di̱mwar yilene, n ti bi̱kam ni̱bu chi bi̱dibiin.

⁶N Kwama a wur bi̱n Sodom n ti Komara ki̱ni ki̱rang, a du fiko a kau di̱kun buken a yung nang chi ka fwedu n ti bi̱bu a bunti̱bu da komu.

⁷N ki̱n a yu Lotu, naba yile, n ki̱n a kai ni̱r ki̱ni chi dibwi ti̱tu a yari ni̱bu Sodom bi̱bu a bunti̱bu yili̱ni̱mu.

⁸Kasi ki̱ku ni wu naba yilengu, yo n ki̱n ki̱swedu n ti chiye, n ki̱n ki̱ku bwila chi ka wuwule diye, ki̱nweti̱ ya̱mi yikusi chiyu, ti̱tu a yo ni̱r ki̱nu a kaiyan yinang di̱ne n chi a bunti̱bu yili̱ntu.

⁹Yinu n Tewuduwe a yim kangu ka yu ni̱bu bi̱bu ki̱bunti̱ dakomu we kasi no a ki̱ki̱le sweku chiyangu, yinu ti kangu ka to bi̱bwilamu ka lami̱nti̱ di kabake.

¹⁰Mwataki̱ku ka la chi a bi̱bu ki̱bunti̱ chi ti̱bwilai ti̱tu bwi chi ki̱kubeditu, n ti bi̱bu ki̱ swa̱ba mati̱ni̱mu. Ni̱bu yungku ti̱kwanim bi̱bu a ne dibwi we ko bayim we di̱chiye, n chi ki̱ kuki̱ ka dutu. N chi a nwebu tayi ti̱kanchi, kono n nang bi̱bu ki̱ma mati̱n a diimu n chi ki̱ tudu.

¹¹Aya n chi ni̱bu ti̱tumbi̱ri Kwamamu chi fwan, kasi ki̱ku a la ni̱bu yungki̱m ti̱kwanim bi̱bu ki̱ni dukanangu n ti dwiyentangu, n chi a swa̱ba bu bi̱bu ki̱ma mati̱n a diimu we kakku Tewuduwengu.

¹²Aya ni̱bu bi̱bu ki̱fwa ya̱m swa̱ba ni̱mu we chi n chi a swaanbe. N chi yinang nai a ne ti̱kuran we, yiyu a yim ka chi bwi chi ki̱badde. Ni̱bu a bi̱u chi di̱ne ka taba chidu ka chibedu, yinu n chi ka bwaradu yinang nai di̱kiri.

¹³Ti̱nti̱ne yinangu n chi a ni bi̱kamu ni̱bu riyengu, ni̱bu ka ma chimi̱n ti̱ni yiko. N chi a da̱ng ko yaritu nang nwe ta̱me chi, n chi ki̱mati̱ni tibe kuko. Fiswe chi we tibe chi̱n a kau chi ti̱kwani chi dibwi. N chi ki̱ chadu, ki̱nodu ware n ti̱chi̱n, aya we kuteng ki̱ku n chi ki̱ma chitu n chi a ku diye.

¹⁴Ti̱kuran chiti kwadu a kana maku ti̱kuli, maku ki̱letingu a twibu chi bwi. N chi ki̱butu bi̱bu a kebu bi̱yili̱mangu a ne dukan wemu. Kubeki̱ku a la dukan chi̱nu, ki̱kumang n Kwama ka kai chidu.

¹⁵N chi a du wa̱re wu dere, ki̱bunti̱ wa̱re Balaam bwe Beyore, wu ki̱baddu kaya ka̱mbi̱ru we maku chi ti̱bwilatu.

¹⁶Aya ni̱bu a wela ki̱n we ki̱leti kiyu, kurunge a fwabu ya̱me, a fwa ki̱mi̱n ya̱m ki̱ni ker yinang nii ke a yo fa̱ku wu a du maku funti̱ki̱teliyangu.

¹⁷Ni̱bu bi̱bu yinang nebwi wu a ne mwe we. N chi yinang di̱kunu ki̱fi̱be ki̱ kari̱n. N Kwama a do chimi̱n fiswe wu a mwan a ma ki̱liye.

¹⁸N chi ki̱ kuku dutu chitu ki̱fwati̱ ya̱mi yikusi. We da chi wu a sulaiye n chi ki̱si lan ki̱butu bi̱bu a no swi we ni̱bu ki̱letimu a tibukemu, ki̱ ki̱late da wu a ki̱letiye we.

¹⁹N chi ki̱bwa̱u chimi̱nu ko da wuyile we yayu chi, kasi ki̱ku n chi chifwan ka̱bi we sulaitangu. Di̱ne ni ki̱kau ka̱be we chi a da̱u ti̱kuran kiye.

²⁰Ka ni swaan ko n Yesu Masiya nang Tewuduwe ti Naba Yuke chire, yinu ke ni swi we nangi̱n ti̱tu ki̱kwaba ni̱bu a ti̱ti̱niye, yinu ki̱ni kuteng ki̱ku, chi ki̱latuwe wa̱ri yi bwilaiyu, a kau chimi̱n bwi yinang, ki̱dum ni̱bu bi̱bu, da a swan mi̱ne a la wu a mwe mi̱ne ki̱ni bwila yinang.

²¹Ka no ki̱dum ni̱bu bi̱bu a yimbu wa̱re yile we, a no la chimi̱n chi. Aya a kutengu n chi a yim wa̱rengu, n chi a ki̱lan ni kuteng a bunti̱bu yili̱ntu n Kwama a ni chitu.

²²A tiwe chi baltaki̱ku a fwa ko, “Kada a kwi a ki̱latuwe ki̱kwiyeko ki̱chadu,” yinu “Sulki̱m lo ni̱bu a ru ki̱ni mwe, a ki̱lati̱ ki̱bwiriyu ki̱burti̱ti̱nu we.”