Read tula 2 Biti̱re 3 Bible Online

2 Biti̱re 3 - tula bible

2 Biti̱re 3

¹Di̱du nang lwangi̱n di̱robi̱nu mi̱n mwal chimi̱ndi̱nu n ti̱n bi̱bu mang mi̱lani̱mu, we lwangi̱n ti̱tu mi̱n kur chimi̱nu di̱ne ke n su chi̱n ti̱ma ti̱kuran ti̱yili.

²Mi̱n baddu ta kuru ta swaati̱ chi fandubu Kwamami wauwadi̱mu a fwa fereditu n ti chi Tewuduwe n ti Naba Yuke a fwa yii fa̱kube.

³Mi̱n baddu ta mwedu ta swaan bi̱bu, we diti swan kutengu ni̱bu ki̱fiyem ka chiredu bi̱bu ka nura chi̱nu nurane. N chi ka chakakku ki̱ni kubeku chi ti̱bwilatu.

⁴N chi ka ni̱n fwadi ying, “A n Yesu a bwa̱u ko ki̱ki̱ladu, a ki̱lawenga? Feredi ki̱dangu tukebu chi̱remu a du ti̱ti̱nitangu, kanang ti̱ti̱le chiye a sutebu yinangu ni̱bu a yo mi̱ne ti̱ti̱nitangu.”

⁵N chi a mwenti̱ki̱ti a tabu ko feredi n Kwama a yo dii ki̱ni ya̱m a fwa yiikom, ki̱ni mwe n ki̱n a chake ti̱mu, a kana ti̱mu ki̱ni mwe.

⁶N Kwama a ma nangangu ki̱ni mwe bambi̱lake a wur ti̱ti̱nitu we ki̱dang kangu.

⁷Ka ya̱m bi̱biini̱m, dii n ti ti̱mu a yang di̱ne ki̱range. Ki̱yo chidu di̱ne di mwatake, yo ni̱bu bi̱bu a bunti̱bu Kwamamu ka twiyade.

⁸Aya n ti̱n kebi̱ bi̱bu mi̱n mi̱ladi̱mu, ti̱tabi̱duwe tiko di wiine yinang swa̱tu kuneng we kakku Kwamangu, ti̱nti̱ne swa̱tu kunengitu yinang dii wiin we kakku kangu.

⁹N Tewuduwe a ti̱kabu we bwa̱ki̱ kangu a yi ko ka bedangu yinangu bi̱kamu ki̱kuradangu. N ki̱n ki̱ma bwanu di̱ne mune, n ki̱n a babu wuka ni ka twiyadu. N ki̱n a ni ki̱swi nabwen ke n kawure a wo ki̱ti̱m.

¹⁰Aya di Tewuduwe ka bedu yinang daaku. Yinu dii ka twiyadu ki̱ni nabwe ker, yinu chitu we mureti kwang ki̱rang ka twidu, yinu ti̱ti̱nitu n ti chitu we mureti kwang ka twiyadu.[1]

¹¹Kangu ti̱tu chi kwang ka twiyadu a wa̱re wangu, bi̱bi̱le ki̱dum daam a dakan ni madumu? Ti̱ya yayu wu wauwade, ti̱ni dur chi̱nu we di̱Kwama,

¹²ti̱kur kwalangi chiyu a di̱Kwama wu ki̱bede, ti̱funti̱ bwi ti̱yo diwu a be daatu. Diwu ki̱rang ka twi dii, n ti chi a muretu kwang ka yubadu we ben ki̱rangi̱n.

¹³Aya ni yam twiye wu fwiye n ti ti̱m bi̱fwimu n ki̱n a bwa̱umu, bwako ni̱bu kani̱n tum ka yile.

¹⁴Di̱ne yiko kebu bi̱bu mi̱n mi̱ladi̱mu, we yo ti̱yam Di we, ti̱funti̱ bwi ti̱ya yayu wu wauwade wu a ne di̱tuur we, ti̱ma fiswe li̱mange.

¹⁵Ti̱kur tiko, n Tewuduwe chire ki̱ni bwanu di̱ne a ni ni̱bu ki̱swi ko ke n chi a ya a swimi̱n. A ti we yinangu ke chire m Bulus a mwal chimi̱n ki̱ni kasan ti̱tu n Kwama a ni ki̱nitu.

¹⁶N ki̱n a fwa ya̱mi yiyu we lwangi̱n kitu. Ti̱kantu chi ti̱tu a fwatu ki̱ni bwar swaan ki̱n. Nang chi bi̱kam bi̱bu ki̱ni kwalan swaangke bi̱bu a tibu yinang we keku bi̱yili̱mange ki̱sute chi n ki̱n a fwa a muretu. Nang kangu ki̱mandu ki̱ni ti̱kantu ti̱mwa̱lan yam Kwamamitangu. Ki̱wu dutu chitu mi̱ne riye.

¹⁷Di̱ne yiko kebu bi̱bu mi̱mi̱ladimu, yo ta tu tayim ti̱te, ke ti̱kabi ki̱ni ki̱yolang, ke ti̱yaruwe ti̱kubbi ni̱bu bi̱bwilamu, ke ti̱yaruwe fi ta timi̱ne.

¹⁸Aya ti̱chakakku ti̱nang dwiyedu we li̱me n ti yingku Tewuduwe chire n ti Naba Yuke Yesu Masiya. Dwiyentu n ti̱ki̱n a mwetuwe ki̱ka̱ngu ki̱diya kwadu. Amin.