Read tula 1 Yowana 5 Bible Online

1 Yowana 5 - tula bible

1 Yowana 5

¹Ka nang wuwule niye wu a ke bi̱yili̱mu ko n Yesu nang Masiya, n ki̱n nang Bwe Kwama, yinang nii wu a mi̱la te bwe a mi̱lati̱ bweko.

²Nang tiyangu ni yimi̱nu ko ni mi̱la bwesi̱m Kwamamu di̱ne niya mi̱la Kwama yinu ni bunti̱ yili̱n kite.

³Ti̱tu nang mi̱laki̱ chirengu we di̱Kwama, ni bunti̱ chi n Kwama ki̱badde, ti̱nti̱ne yili̱n kitu a mabu bwar.

⁴Di̱ne ka nang wuwule nii wu a kau bwe Kwama ki̱ni da ka chau ki̱la we ti̱ti̱nitu. Keku bi̱yili̱m chirengu we di̱Masiya nang chi ki̱ni chi̱ni chakku ki̱late.

⁵Ti̱nti̱ne n wure ka medu ka chau ki̱la ki̱ni ti̱ti̱nite? Kana nii wu a ke bi̱yili̱mu ko n Yesu Bwe Kwama.

⁶N Yesu Masiya nang wu n Kwama a wudu ni̱bu mi̱n ko wu nang Bweko, we yo n ki̱n a ma batisma ki̱ni mwe n ti yo a kur ki̱tuumu a ki̱tiyang bwange. A wudu ni mi̱nbu ki̱ni kana mwe, aya mwe n ti ki̱tuum. Fi̱ki̱m ki̱yung nidu ko ya̱m bi̱bu bi̱yili̱m, di̱ne fi̱ki̱mu bi̱yili̱me.

⁷Ti̱nti chi yittayu ki̱ma di̱mwaru ko n Yesu Bwe Kwama.

⁸Nang Fi̱ki̱m Kwamamu, batisma wa mwe, n ti ki̱tuum bi̱bu a kur di̱ne chini̱mu, ti̱nti chiyi yittayu ki̱fwa ka chi wiine.

⁹Yo ni̱bu a fwa chi n chi a kuwe ni̱n ke ki̱n, aya chi n Kwama a fwa a lachi ni̱bu a fwa, yinu n ki̱n nang wu a fwa ya̱m a dur Bwekone.

¹⁰Wu a ke bi̱yili̱mu we Bwe Kwama, a yim we ni̱r ki̱nu di̱mwar di̱du di̱yili̱n. Aya wu a kebu bi̱yili̱mu we di̱Kwama, a mar Kwama naba ti̱kwaniye, yo n ki̱n a ko chi n Kwama a fwa we dur Bwekone.

¹¹We chi n Kwama a fwa a dur Bwekotu, n ki̱n a ni chi̱ni ti̱kuri ki̱diya kwaditu, ti̱kuri ti̱tu a be a Bwekotu.

¹²Ka nang wuwule niye wu ki̱ni Bwe Kwama ki̱ni ti̱kuri, aya wu a ne Bwe Kwama we, a ne we ki̱ni ti̱kuri.

¹³N ti̱n bi̱bu ta ke bi̱yili̱m a Bwe Kwamamu, m mwal chimi̱n ya̱m bi̱bi kwang ke ti̱yim tiko n ti̱n ki̱ni ti̱kuri ki̱diya kwaditu.

¹⁴N chi̱ni ki̱ni runi ni tidu we kakku kangu di̱ne ni yim ki̱nwe nide yo ni bi̱u ki̱n chite we ki̱keko.

¹⁵Yo ni yim ki̱nwe nide kasi no ni bi̱u ka ti̱ti̱le chiye, a yung ni yim n chi̱ni ni ya ka ti̱ti̱le chiye ti̱tu niyang bi̱u ki̱netu.

¹⁶Ka wuka nii a ku ke ko naba bunti̱ke ki̱ma ki̱le wu a ne da̱u ti̱kuri kiye, a twa̱ba̱ki̱ mi̱n buni, di̱ne twa̱ba̱bune nii we n Kwama ka ni ki̱n ti̱kuri. Aya ka a ma ki̱le wu ka yo ki̱nu ka bwadi ki̱ne, mang yibu mi ti̱twa̱ba̱ ki̱mi̱n buni.

¹⁷Chi ni a ma a lebiti kwang ki̱le, aya yikayu ki̱leti n ke yiyu nii ka bwadi ki̱ni.

¹⁸Ni yim bwe Kwama a chabu kakku ki̱ni ki̱letiyu, di̱ne Bwe Kwama ki̱so ki̱nu ko ke n Setan a twaiyu ki̱nuwe.

¹⁹Ni yim n chi̱ni bwesi̱m Kwamam, aya ti̱ti̱niti kwang a fa̱la̱ng Setanang.

²⁰Ni yim Bwe Kwama a be ti̱ti̱nitu, a wudu chi̱ni mi̱n ki̱kwa̱me ke ni yim Kwama wu yile. Ki̱ka̱ngu n chi̱ni we di̱ki̱ne, n ki̱n wu yile, we Bweko n Yesu Masiya. N ki̱n nang Kwama wu yile n ki̱kun. N ki̱n nang wu ki̱ni ti̱kuri ki̱diya kwadite.

²¹Bwesi̱m, mi̱n fwa chimi̱nu ti̱so yichiyu di̱ne ke di̱yoru a mulchinu we wa̱re Kwama.