Read tula 2 Yowana 1 Bible Online

2 Yowana 1 - tula bible

2 Yowana 1

¹M mi̱na Yowana Sele, mi̱n mwal wusuti̱re Nene mi̱nu n ti bwesi̱m ki̱mu,[1] bi̱bu mang mi̱la chi nabweni̱mu. N ke ka mi̱n, seli̱bu kwang bi̱bu a yim bi̱yili̱m Kwamamu,

²di̱ne bi̱yili̱mu a swe a di̱chi̱niye ti̱nti̱ne a ne dunidu ki̱diya kwadu.

³Li̱me n ti ki̱bune n ti li̱mangu ki̱chiredu a di̱Kwama Te n ti Yesu Masiya Bwe Te a swe n ti chi̱ni a yile n ti mi̱laku.

⁴M ma furi mwemwenu nabwen yo mang nwe ko bi̱kamu bwesi̱m chimu ki̱bunti̱ bi̱yili̱me, yinangu Kwama Techire a fwako ni mangu.

⁵Ki̱ka̱ngu mi̱n wananu Nene, ni mi̱la yichireyu. Mang mwal chimi̱nbu yilang ki̱fwiyang aya nangku we ferediyangu.

⁶Maku nangangu ki̱ni chi Kwama a fwa nang mi̱laki̱ku ki̱yilangu. A tiwe yinangu ta nwe ferediyangu, ko ni ma da wu a mi̱lake.

⁷N fwa yiko di̱ne fakwarbu Masiyamu nabwen a ti̱ran we ti̱ti̱nitu. N chi a kebu bi̱yili̱mu ko n Yesu Masiya a be ti̱ti̱nitu ki̱ni bwi nii. Nii ki̱yung ti̱te, nang naba di̱buti̱re n ti wu ki̱ma kati̱n n ti Masiya.

⁸Di̱ne yiko, ti̱ma daandaan, di̱ne ke nangang changu a kadu ti̱kusi we, aya ke ti̱ya ki̱ti̱me wu di̱mbi̱li̱me.

⁹Nii wu a tibuwe ka miyaku ya̱m Masiyame, aya ki̱suti̱nu ki̱ni ti̱kanchiye, n Kwama a newe n ti ki̱n. Wu a tiwe ya̱m Masiyame, n Kwama n ti Bwe we di̱ki̱ne.

¹⁰Ka wuka a be a yung chi a lakan n ti ki̱ku yungke, ti̱ yiddu ki̱n we lo, ti̱ siti̱nu ki̱n we.

¹¹Nii wu ka sii ki̱duum nii wume, n ki̱n ki̱mati̱n nangi̱n bwilatu n ti ki̱n.

¹²Chi mi̱n baddu mang mwal chimi̱ne nabwen, aya mang kebu mang mwalumwale. N yo ni̱ru mang ya chimi̱n siram ke ni kukan kabu n ti kabu, ke ti̱mi̱lan chi̱retu a kabi di̱mbi̱li̱m.

¹³Bwesi̱m wuwiye mumu[2] bi̱bu n Kwama a suti̱mu, ki̱siintedu.