Read tula 3 Yowana 1 Bible Online

3 Yowana 1 - tula bible

3 Yowana 1

¹M mi̱na Yowana sele we seli̱bu, mi̱n mwal mi̱nu Ka̱yus, m mun wu mang mi̱lan yinange.

²Fati̱mi, mi̱n twa̱ba̱ mi̱n bunitu mi ke n ya li̱mang we ka ti̱ti̱le chiye, yinu mwan yati̱ li̱mang bwiyangu yinang yinangu mwan ti we fi̱ki̱m Kwamangu.

³M ma furi mwemwen yinangu bi̱kamu kebu a ki̱lawe a fwami yinangu keku bi̱yili̱m mwangu a ti ki̱ri̱ngangu n ti yinangu mun bunti̱ da wa bi̱yili̱me.

⁴A ne chi ki̱ni furi mwemwen a la chiye we, ka n nwe bwesi̱mi̱mu ki̱chakakku we bi̱yili̱me.

⁵Fati̱mi, mun ma nangangu yinangu a dakan naba bunti̱ke ka madangu, mun madu di̱ne kebi̱bu n ti bi̱bu n chi rungkomu.

⁶Ni̱bu bi̱bu mwang maka chimu, ki̱fwa ni̱bu bunti̱ki̱m bi̱bu a fimu mi̱n ki̱duum mi̱laki̱mu mwang yung chi mi̱nangu. N chakakku mun maka ki̱duum ni̱bu bi̱bu we yayu chi tiyangu ka li̱ma Kwama ka nwe ta̱ma̱ngu.

⁷Ni̱bu bi̱bu ki̱chiru di̱ne di̱mwar ya̱m Kwamame, a yibu ti̱kan chi we ni̱bu a yimbu Kwamamu.

⁸Di̱ne yiko, a dakan ni yiu ki̱duum ni̱bu bi̱bumu, ke a yung n chi̱ni fati̱bu nangang wuyile.

⁹M mwal ni̱bu bunti̱ki̱mu mi̱n ya̱m bi̱bu aya n Diyotarifu wu ti̱kuran kitu a ki̱la baku dwiyenange, a ko a yibu ya̱m bi̱bu.

¹⁰Di̱ne yiko, ka n yange, ma kwa̱l chi ti̱laiyiri kitu, n ti ya̱miyu n ki̱n ki̱fwaradu a li̱mbi̱li̱me a dutu chi̱rentu. A titi̱bu we ti̱tu, n ki̱n a yibu kebu ni̱bu bunti̱ki̱mu, yinu a keti̱bu ko wuka nii a yiu chi. N ki̱n ki̱kaka bi̱bu ki̱baddu kama makaki̱mu.

¹¹Fati̱mi, bunti̱nu da wu a lebe we, nang ma ti̱yilitu. Nii wu ki̱tum yile n wu Kwama, aya wu ki̱ma chi a lebite a yimbu Kwama.

¹²Ka nang wuwule niye ki̱fwa ya̱m bi̱bu a lelem we dur Dimitiriyu, dako ki̱fwan ki̱yungdu n ki̱n nii wuyile. Ni̱n ni̱n fwa ti̱nu, m mun n yim chi nang fwa bi̱yili̱m.

¹³Ya̱mu mi̱n baddu mang fwa mi̱ni̱mu nabwen aya ka lachi ni tekadu kabu n ti kabu n ti ki̱ku mang mwalumwalengu.

¹⁴N yo ni̱ru mang ya bwa di̱mune ke ni kukan kabu n ti kabu, ni fwa ya̱mu.

¹⁵Li̱mangu a swe n ti mun. Fati̱bi̱ mumu a fimu ki̱siintedu. Sii miti̱n fati̱bu chi̱remu we bwakomu.