Read tula Dwakam 11 Bible Online

Dwakam 11 - tula bible

Dwakam 11

¹Yinu a ni ti̱kan chi ti̱sweri yinang swe. A yi ko ya n swe se Kwama n ti ki̱di̱ng se Kwamangu, n ki ni̱bu ki̱ sii Kwama a muremu.

²Aya a mwintuwe a ne mwang swe tanti̱lange wu a fi̱lang Kan Kwama di̱duna Wurchalimanu. Di̱ne n ni bwako a bi̱bu a kuuti a kebu bi̱yili̱m we di̱mi̱nemu. Bi̱bu ka ni bi̱ni wauwadi̱mu riye swartu wan taana chiri turau.

³Mang tum ni̱bu mi̱mi burau yaka ma fa̱kui di̱mwar ya̱m bi̱yili̱m mi̱mi siini̱mu. N chi ka do kuli̱n furi ki̱lin ka ma di̱mwar mi̱nu we ditiyu kuneng ki̱ni kuuliti turau ki̱ni wan turukun.

⁴Ni̱bu di̱mwari̱m bi̱bu nang tini setuniye yurabiyu n ti fitilati yurau a ti̱ya a kakku Tewuduwe.[8]

⁵Ka bi̱kam ki̱baddu ka nwe chimi̱nde, ki̱rang ki̱chiredu we yii ki̱chati̱ bi̱ki̱mu. Nang tiyangu ni̱bu ki̱baddu ka chi̱u chini̱mu ka bwaradangu.

⁶A ni chi dukanu ka yinge twiye ke a swidu mwe we diti yikiyu n chi ki̱ma di̱mwar mi̱niyu. N chi ki̱ni dukan we neti̱bwiyu, ka sutedu ka kau ki̱tuum. N chi ki̱ni da ka yo di̱kume ka bulma ti̱ti̱nitu we ki̱dangu n chi ki̱badangu.

⁷Ka a ri di̱mwar chi̱ne, wuka nam ka chiredu a bwang ki̱swa̱ma̱nge ka kuladu n ti chi. Nam wu ka la chidu ka chi̱be ti̱n chidu.

⁸Kwa̱mi chiyu ka dudu we wa̱re ne lo a bi̱n di̱dun[9] di̱du ni̱bu a kukan Yesu Tewuduwe. Bi̱n di̱du ni swedi Sodom ka Masare.

⁹Ni̱bu n ti kuuti n ti ti̱fi̱ki̱ritu n ti yiiniyu ka fwal nui chiyu kani̱n da̱ng kwa̱mi yiyu ka lam ditiyi yitta ki̱ni di̱mwatar ka ko ti̱n furku kwa̱miyangu.

¹⁰Ni̱bu ti̱ti̱nimu ka ma ti̱mi̱lan we bwa ni̱bu di̱mwari̱mi burabi̱m bi̱bu. Ka ma mabwi, kani̱n nika ki̱li̱mang di̱ne fa̱kubi̱bu burabi̱mu a be di̱mwar a ti̱ti̱nitu a ni riyemu.

¹¹Aya we kuteng ditiyi yitta ki̱ni di̱mwatariyu, fi̱ki̱m chitu a ki̱latewe bwa di̱Kwama, ka le bwi chiyu, ka kunu ka tidutiye. Tayi yidui ka tau ni̱bu nabwen bi̱bu a ku chimu.

¹²Yinu fa̱kubi̱bi burabi̱mu a nwe di̱kan ker ki̱ni dukan a chire we bwadi ko, “Ti̱fi̱le fi!” N chi fal a fi̱l we ti̱twinitu a yika dii, fakwarbu chimu ki̱da̱ng ti̱ni ying.

¹³Bi̱nabi̱na ni̱bu a nwe ti̱mu a mi̱kan ki̱ni dukan, yinu ti̱me wiin wu a Wurchalima a kiyani ki̱ti̱bu, ni̱bu kuniyi yidibiin a bwaran. Ni̱bu a dubumu a nwe tayi nabwen. N chi a ni Kwama wu a diye dwiyentu yinang yinang.

¹⁴Di̱kumen di̱robi̱nu a su. Di̱tari̱nu nang wu ki̱funte bwi ki̱bedu.

¹⁵Naba di̱tumbi̱re Kwama wu nibine a ku wuko sum. Ti̱kan kebi̱ ki̱ni dukan a chire we bwadi ki̱fwadu ko, “Dukan mati̱nu a ti̱ti̱ni ki̱ka̱ngi̱nu n ti̱u Tewuduwe chire n ti Masiya ka ma mati̱ntu ki̱diya kwadu!”

¹⁶Yinu seli̱bu wan turau chiri baana bi̱bu a swe a ki̱di̱ng mati̱ni̱mu a sung we kakku Kwamangu, a sii ki̱n,

¹⁷ki̱yidu ko, “Mwang mabe, Kwama Tewuduwe naba dukane kwang, m mun wu we ferediye n ti ki̱ka̱nge! Di̱ne mati̱n mwitu mwan mwe mun maditu ti̱dui ki̱ni dukan.

¹⁸Kuu ni̱bu a yimbu Kwamamu a ri ki̱ni ki̱fwini, Aya ki̱ka̱ngu, ki̱swi ki̱fwinimo a lam Ki̱swi a lam wu mwang kaba bi̱bwari̱mu mi̱nde, Fa̱kubu mumu ka ya sure chi, n ti ni̱bu bunti̱ki̱mu a nwe tayi mwiyumu. Seli̱bu n ti bwesi̱m ki̱swi a be wu ka chi̱be bi̱bu a chi̱u ti̱ti̱nimu!”

¹⁹Yinu a wudu lo Kwama we bwadi, akwati wu a bwa̱ki̱ we mure lo Kwama. A kuteng ki̱ku, ki̱yile n ti kebi̱ n ti ker ki̱yalti n ti mi̱kaku ti̱mang n ti nabwe tarankwai.