Read tula Dwakam 12 Bible Online

Dwakam 12 - tula bible

Dwakam 12

¹Ti̱kan chi ti̱dui n ti chi ka̱ta̱ki a chire we twiye. N ku wuka Naye[10] wu a yinge yikiyu ki̱ni kuko yinang kuli̱n di̱dori̱ne, a fau nani kiyu a swang. We dur Ki̱nu, n ki̱n a mu di̱ki̱ri̱n di̱du ki̱ni ki̱switiyi kub chiri yurabi̱n.

²Naye wu ki̱ni lur di̱bwilan, n ki̱n ki̱ki wi di̱ne yaka bi̱dde, n Ki̱n ki̱ma ki̱tine di̱ne yaka bi̱u riye.

³Yinu n ki̱la n kuti̱ ti̱kan chi ti̱dui n ti chi ka̱ta̱ki a chire we twiye, n ku neeti soo[11] wuduwe yiwur a chire ki̱ni dututi ti̱dibin n ti ki̱sumiyi kub we kanang di̱di̱le dure, ki̱ni tara Mati̱ne we kanang di̱di̱le dure ti̱n.

⁴Dukan Yangi̱nu a lam twiye a mwate ti̱me wiin wa yitta we ki̱switiyu a fwale a ti̱m. Yinu soo a ti we kakku Nayewu ko ke ki̱wu bwe[12]naye wu ka bi̱dde.

⁵Naye a mwinti̱n a bi̱u bwe wubare wu ka ma mati̱n kuu ti̱ti̱niye ki̱ni ki̱twalang makka,[13] aya ni̱bu ti̱tumbi̱rim Kwamamu a da̱u bwe wu a yikan bwana di̱Kwama n ti ki̱di̱ng mati̱nang kangu.

⁶Naye a wul nabwe di̱chilanchangine, finu n Kwama a do ki̱mi̱ne, fi ka yaan toku ka lami̱nti ditiyu kunengi kiin ki̱ni kuliti turau ki̱ni wan turukune (1,260).

⁷Yinu kun a fwe we bwadi. M Makel n ti ni̱bu bi̱tumbi̱ri ki̱mu ki̱makadu n ti neeti soo wuduwe. Soo wu n ti ni̱bu bi̱tumbi̱ri̱m ki̱mu a le kunnu yikul n ti bi̱ki̱m bi̱tumbi̱ri̱m ki̱mu.

⁸Aya ni̱bu a la neeti soo ki̱ni dukanu, yinu a kakati̱ ni̱bu ti̱tumbi̱rim ki̱mu. A kuteng kun di̱dangu n chi a du bwadiye a newe a ki̱ke chi.

⁹A tunge neeti so wuduwe a ti̱ti̱ni, kanang chikiye so wu n we ferediye. Wu ni̱bu ki̱yalu ko wubwilla ki̱yalti̱nu ko Setane. Wu a butu ti̱ti̱niti kwange. A tunge ki̱n a ti̱m n ti ni̱bu ti̱tumbi̱ri ki̱mi kwang.

¹⁰Yinu n nwe di̱kan ker di̱dun we di a twiye ko, Ki̱ka̱ngu yuku Kwamanuwangu n ti dukan ki̱nu n ti mati̱n kitu n ti dukan Masiya a lwe. Nangki̱n, a tung ni ki̱mai keme kebu ni̱me a ti̱m n ki̱n wu ki̱mai keme kebu ni̱me we di̱Kwama kum n ti kukonge.

¹¹N chi a chau ki̱la we di̱ki̱ne Ki̱ni ki̱tuum Be Kwanemu ti̱nti̱n di̱ne bi̱yili̱mu n chi a mwamu. Nangki̱n n chi a mi̱labu ti̱kuri chitu yinang a yo n chi ki̱wul tayi yinangu ka bwadangu.

¹²Di̱ne yiko ti̱ma furi mwen n ti̱n bi̱bu a diimu n ti bi̱bu a swe we diimu ki̱ni kwang! aya a no chi̱n ti̱ti̱ni n ti mweti yiduiyu! N Setan a be bwa di̱chi̱ne, ki̱ni ki̱fwini di̱ne a yim ki̱swi ko a dubi bayim.

¹³Yo neeti so wuduwe a swaan ko ni̱bu a tunge ki̱n a ti̱me, a ma nang a bituwe naye wu a bi̱u bwe wubare.

¹⁴Aya a ni naye wu la̱biyi yurau yinang yiyu a ki̱sung kuduwangi, ko ke a kun a wul nabwe di̱chilanchangi̱nu ni̱bu a do ka toon ki̱nu swa̱ti̱ti ti̱ta ki̱ni di̱mwatare.

¹⁵Soo wu a toye, a fwale mwe we yiiko yinang wu a laa, ko ke a da̱u naye wu a yikani ki̱n,

¹⁶Aya ti̱mu a maka naye. Ti̱mu a wuden a no mwe so a fwale.

¹⁷Yinu so a ma ki̱fwini ki̱ni naye yinang yinang, a kune ka ma di̱kulanu n ti ki̱kuwang nayengu, kanang chikiye bi̱bu ki̱bunti̱ yili̱n Kwamatu, bi̱bu a yo ni̱ri diin we ya̱mu n Yesu a fwamu.

¹⁸Yinu soo wu a ti a ki̱ti̱ku laang.