Read tula Dwakam 14 Bible Online

Dwakam 14 - tula bible

Dwakam 14

¹Yinu n da̱ng, n ku Kwanu a ti a kun Siyona[17] n ti ni̱bu kuniyu kuul ki̱ni wan taana chiri yana[18] bi̱bu a mwal di̱n Be Kwanenu n ti di̱n Te ki̱ni̱nu we ti ka̱be chi.

²Yinu n nwe di̱kan ker a chire a twiye, ki̱ngau diru yinang mwe ki̱sudu a la, yinang ki̱yale wu ki̱ni diir nabwene. Keru mang nwenu yinang yo ni̱bu ki̱ngau molotiye.

³N chi a kau te wufwiye we ki̱di̱ng mati̱nangu n ti kakku bi̱kuri̱m bi̱bi baanamu n ti seli̱bu. A ne nii ka medu ka miya te wuko we ka n ke bi̱bu kuniyu kuul ki̱ni wan taana chiri yaname bi̱bu a ya yuku we ti̱ti̱nimu.

⁴N chi nang ni̱bu bi̱bu n Kwama a so chi a mabu yarimu, bi̱bu a ya yinang Kwamamu. N chi nang bi̱bu ki̱bunti̱ Be Kwane kasi no ka yadi bwalemu, bi̱bu a ya yuku we bi̱kamu ni̱bi̱mu, n chi nang bi̱kaki̱mu ka le fa̱la̱ng Kwamang n ti Kwani̱mu.

⁵N chi a mweenbu ti̱kwani we, a neti̱ chi mwang tuun chide we.

⁶N ki̱la, n ku wuka naba di̱tumbi̱ri Kwama ki̱yadu we twiye yinang ki̱ka̱le, ki̱ni di̱mwar ya̱m bi̱li̱m ki̱diya kwadi̱m, be ka fwa ni̱bu a ti̱ti̱nimu n ti ki̱dum ni̱bi̱mu n ti kuuti, n ti yiiniyu n ti ti̱ntiyu.

⁷A fwa ki̱ni ker di̱dun ko, “Ti̱ni Kwama dwiyentu, dela ki̱n di̱ne ki̱swi mwatake a lam. Ti̱sii ki̱n wu a yo dii n ti ti̱mu n ti nabwe ti laatiyu n ti neti̱bwiye.”

⁸Wuka naba di̱tumbi̱ri Kwama a nabe wukakke ko, “A yar! Babila bi̱n di̱dunu a yar! N ki̱n a yo kuuti a no mwe yinabi a lwe bwitiyu di̱ne nabwe ti̱bwitan yari kite!”

⁹A kuteng ki̱ku wuka naba di̱tumbi̱ri Kwama a bunte bi̱kaki̱mu ki̱fwadu ko, “Ka wuka ni a sii nam wu n ti ki̱wulang kangu yinu a yiuti̱ di̱mwar ki̱nu we ti ka̱be ka fa̱la̱nge,

¹⁰ni wuko ka le riye ki̱fwini Kwama, di̱ne ki̱fwini ko a kaiyan. N Kwama ka ni chi riye ki̱ni ki̱fi̱bti ben ki̱rangi we kakku ni̱bu ti̱tumbi̱ri bi̱bi wauwadi̱mu n ti Kwanu.

¹¹Ywa̱nu ki̱chiredu we fi n chi ki̱nween riyenu a ne riduriye. Riye a ne swe bunge wuka di we bi̱bu a sii nam wu n ti ki̱wulang kangi̱mu n ti bi̱kami kwang bi̱bu a yiu ki̱kwai di̱n ki̱ni̱nu.”

¹²Ti̱tu ki̱yungdu a mwintuwe, ni̱bu Kwamamu, ka mu ni̱ru we ti̱fumantu ki̱ni bwanu. N chi ka bunti̱ yili̱ntu, ka tidi ki̱ri̱ng we keku bi̱yili̱mang chiyangu a di̱n Yesunangu.

¹³Yinu a nwe ker a chire a dii ko, “Mwal mwi ni̱bu delaki̱m bi̱bu a bwamu, bi̱bu ki̱bwadu a di̱n Tewuduwe mu, a tatuwe ki̱ka̱ngu a ne fi̱rufi̱re!” Fi̱ki̱m a fwa ko, “Ki̱kumang, ka fi̱kadu we riye chi, nangi̱n chitu ka bunti̱ chi.”

¹⁴Yinu n ku chi ya̱r yii yinang di̱twin mwen, we di̱twinu wuka ni a swe we yinang Bwe Nii, ki̱ni di̱ki̱ri̱n si̱nariya we duru n ti yunge wu ki̱ni chamme we fa̱la̱ng kangu.

¹⁵Yinu wuka naba di̱tumbi̱ri Kwama a chire furtu we Kan Kwama di̱dunu, a yal wu a swe a di̱twine ki̱ni dukan ko, “Chake yungemo[19], di̱ne ki̱swi kakke a lam, ti̱ti̱nitu a bi a lam kakku yinang cham.”

¹⁶N ki̱n wu a swe a di̱twine, a swi ti̱ti̱nitu ki̱ni yungeko yinang cham, a mur ti̱ti̱nitu ki̱ni kwang.

¹⁷Yinu wuka naba di̱tumbi̱ri Kwama a chire we Kan Kwama di̱dun di̱du a diinu. A tatte wuko yunge.

¹⁸Yinu wuka naba di̱tumbi̱ri Kwama a chire we se Kwama. N ki̱n nang wu ki̱to ki̱rangu ka twi ti̱ti̱niyangu we se Kwama. A yal wu yunge ki̱ni dukan ko, “Chake yungemo ki̱ni chame n swi yinabe we ti̱ti̱nitu, di̱ne ti̱kulan kitu a bi, di mwatake a lam.”

¹⁹Naba di̱tumbi̱re a mau yunge ko we ti̱ti̱nitu, a swi yar yinabe we tiyangu, a kur chi a di̱kulen, finu ki̱fwini Kwama ka yammi̱n chide.

²⁰Ni̱bu nanga Kwamamu a faba ni̱bu bi̱bwilamu we di̱kulenu a kuteng bi̱nang. Ki̱tuumu ki̱chiredu sibsib we di̱kulen di̱du, ki̱fwadu a fwa laa wuswa̱me wu swa̱n ki̱nu a lam Kilomita kuuliti ti̱ta, ki̱sule ko ni fadu naniyi yurukun.