Read tula Dwakam 15 Bible Online

Dwakam 15 - tula bible

Dwakam 15

¹N ku ti̱kan chi ti̱dui, chi ya̱r yii we di a twiye, ni̱bu ti̱tumbi̱rimi bi̱dibiini̱mu a ti ki̱ni bwini chiyu ka swani̱ndiyu n chi yidibiin. Di̱ne nang fi ni̱bu ka kuun ki̱fwini Kwama wu ka swani̱nde.

²N ku ti̱kan chi yinang far ki̱lasi̱n, a se ki̱ni ki̱rang. Yinu n kuti̱ bi̱bu a ma ki̱ti̱me we nam wu n ti ki̱wulang kangu, ki̱ni di̱mwal di̱n ki̱ne, n chi a ti we ki̱ti̱ku nabwe laa ki̱lasi̱nu, ki̱ni sumiyu n Kwama a ni chiyu.

³Kuuti ki̱kaba teniyu m Musa naba nanga Kwama a kaban ferediye. N chi a kabi ying ki̱dela Yesu Mai wu yinang Kwane: “Tewuduwe Kwama naba dukane wu a lachiye, Nangi̱n mwitu a dwiyen, chi ya̱r yii! Wa̱ri mwiyu yiyu a ni̱ri diin, yiyu a bi̱yili̱mi Tewuduwe Kwama dilewenge.

⁴N wure a wulbu tayi mwiye, Tewuduwe? N wure a ne ni̱n dwiyen mwite! Wu wauwade ka mun. Kuuti kwang be ka sii ki̱nu, mwataki̱ mwang ki̱yilangu a chirengi kwa̱rikwa̱ri.”

⁵A kuteng ki̱ku, n ku Kan Kwama di̱dunu a bwadi, kanang chikiye di̱kur Kwaman, a wuden.

⁶Ni̱bu ti̱tumbi̱ri Kwama bi̱bi bi̱dibiin ki̱ni bwini chi yidibiinimu a chire we Kan Kwama di̱du, n kawure a do luke fi̱bi̱ne mwe, wu wusi̱ne, ki̱yila ti̱nu yilane, n kawure a mu di̱ki̱ri̱n si̱nariya we kwiye.

⁷Yinu wuka we bi̱kuri̱mi baanamu a ni ni̱bu ti̱tumbi̱ri bi̱bi bi̱dibiini̱m bi̱bu ki̱ni kutai sinariyayi yidibiin yiyu a ri ki̱ni ki̱fwini Kwama wukure ki̱diya kwade.

⁸Kan Kwama di̱dunu a ri ki̱ni ywa̱n di̱du ki̱yungdu dwiyen Kwamatu n ti dukan ki̱nu we fiko. A ne nii ka medu ka le Kan Kwama di̱dune we, a lami̱nti̱ yo ni̱bu ti̱tumbi̱ri Kwamami bi̱dibiin a ri ki̱ni bwini chiyi yidibiiniye.