Read tula Dwakam 16 Bible Online

Dwakam 16 - tula bible

Dwakam 16

¹N nwe di̱kan ker di̱dun a chire we se Kwama a bwadiye kiyi ni̱bu ti̱tumbi̱ri Kwamami bi̱dibini̱mu ko, “Ti̱kur kutai ki̱fwini Kwamayi yidibiniyu a ti̱ti̱ni.”

²We ni̱bu bi̱bu, wukakke naba di̱tumbi̱re Kwama a ya, a kur ki̱fwini Kwama wu a kwa̱se ko a ti̱ti̱ni. Bumbi ti̱tu ki̱ni swa̱le[20] a chire we bwiti ni̱bu bi̱bu a yiu di̱mwal nam wunu n ti bi̱bu ki̱ sii ti̱n ki̱wulang kangi̱mu.

³Wurobe naba di̱tumbi̱re a kur chi a wuko kwa̱se ki̱fwiniye a la wuduwe. Mwe a suten yinang ki̱tum nii wu bwarem. Kwali̱n chi̱nu ki̱ni ti̱kurinu we la wuduwenu a bwaran.

⁴Wutare naba di̱tumbi̱re a kur chi a wuko kwa̱se ki̱fwiniye a laa n ti beti̱ lati, n chi a suten a kau ki̱tuum.

⁵Yinu n nwe naba di̱tumbi̱ri wu dwiyen mwetitu a fa̱la̱ng kange a fwa ko: “Bale mun mang mwataki̱ mwange a lele, Kwama wu wauwade, wu we feredi a ne sutekuwe.

⁶Di̱ne n chi a kur ki̱tuum bi̱suturi̱m mume n ti fa̱kubu Kwamame, n ni chi ki̱tuumu n chi a chiben ni̱bumu a no, ke a twai ni̱r chi̱nu. Ti̱tu a wura chimi̱n bwi.”

⁷Yinu n nwe ker we se Kwama ki̱fwadu ko, “We yiko, Tewuduwe Kwama naba dukane kwange! Mwataku mwangu a le, a da.”

⁸Wunare naba di̱tumbi̱ri a kur chi a wuko kwa̱se a kuko ki̱yii ti̱me, a ni kuko dukanu a twi bi̱bwilamu ni̱bu ki̱ni ki̱rang kangu.

⁹Ki̱rang ki̱ku ka twi ni̱bu bi̱bwilamu, n chi a fwara ya̱mi swa̱ba ku we dur Kwamang wu a tau bwini chiyi kwange. Aya n chi a wobu ki̱ti̱m, a niti̱bu Kwama dwiyentu.

¹⁰Wunure naba di̱tumbi̱ri a kur chi a wuko kwa̱se, we fi nam wu ki̱mami̱n mati̱n kiye. Ki̱liye a yinge yaa ko. Ni̱bu bi̱bwilamu a ki̱rtu nuum chimu di̱ne riye n chi ki̱nwede.

¹¹N chi a swa̱ba Kwama di̱ne burangu n chi ki̱nwedangu n ti bumbi ti̱tu a bwi chitu. Aya n chi a wobu ki̱ti̱m we chii n chi a matu.

¹²Wunukune naba di̱tumbi̱ri a kur chi a wuko kwa̱se a nabwe laa wuduwe Yufi̱ritise. Ti̱tu a yo mwe la a ku a do wa̱re wu mati̱m bi̱bu a ti̱nti yiyu a twa̱ri̱mu ka sudu ka yikan ki̱twale ki̱ni ni̱bu ki̱rang chime.

¹³Ki̱la n ku ki̱fi̱bti yiyu a lebi̱lei yinang ki̱natatikuli. Wuka ki̱chiredu a yii soo, wuka a yii nam we, wuka a yii fa̱kubu ti̱kwanimu.

¹⁴Ki̱fi̱bti yibwilayu nang ki̱fi̱btiyu a ma chi ya̱r yiiyu. N chi a ti̱ran we mati̱m ti̱ti̱nimu ki̱ni kwang, ka mur chiyedu di̱ne kunnu a di ki̱fwini wubwila Kwama naba dukane kwange.

¹⁵“Ti̱da̱ng mi̱n bedu yinang daaku. Ni̱bu delaki̱m bi̱bu a swe ki̱ma ki̱yolang beki̱ mangi̱mu. Bi̱bu a yo kuli̱n chi̱nu ki̱dwan ko ke yayu a be kadu wu twatwadu ki̱ni dibwiye we.”

¹⁶Ki̱fi̱bti yibwilayu a mur mati̱mu ki̱ni kwang n ti ni̱bu ki̱rang chimu a fi ni̱bu Yafudam ki̱yalu ko Amekidon.[21]

¹⁷Wuni̱bine naba di̱tumbi̱ri a kur chi a wuko kwa̱se a ki̱fi̱be tanti̱lange twiye. Nabwe ker di̱dun a chire we se Kwama a bwadiye, a ki̱di̱ng mati̱nang kangi̱mu ko, “A ri yiko!”

¹⁸Di̱ne yiko, ki̱yile ki̱yaltiye n ti kebi̱ n ti ki̱yaleti n ti mi̱kaku ti̱mang ki̱duwang. Ki̱ku mi̱kaku ti̱mang a fwenbuwe feredi yinangu a mun mi̱n ni, a yo we ti̱ti̱nitangu, mi̱kaku ti̱mang ki̱ku a bwilan.

¹⁹Di̱ne mi̱kaku Babilangu, ti̱mu a keran ti̱nti yitta. Bi̱ntu kuuti ti̱tu ki̱ni kwang a wuren. Ti̱kuran Kwamatu a ki̱la Babila ki̱wuki̱mi̱n ki̱tele ko ke a twai ni̱r ki̱nu.

²⁰Mi̱kaki̱ku a yo kunni ti̱tu a mwetu a twiyan, kunni ti̱duiti kwang a twiya ti̱n.

²¹Nabwe ti̱ti tarankwai yinang kali yiyu turengu a lam kilo wan tunuyu, ki̱twakadu we di a twiye a dutu ni̱bi. N chi a swa̱ba Kwama di̱ne tarankwaitu ki̱ni chi riyetu a bwilan.