Read tula Dwakam 17 Bible Online

Dwakam 17 - tula bible

Dwakam 17

¹Wuka we ni̱bu ti̱tumbi̱ri Kwamami bi̱dibini̱mu ki̱ni kutai ki̱fwini Kwamayi yidibiniyu a be fi a di̱mi̱ne ko, “M be, mang yungi̱nu yinangu mang madu ki̱ni naye wu ki̱ma ti̱kuliyengu. Wu ki̱sweda fanti mweti nabweniyu.[22]

²Mati̱m bi̱bu a ti̱ti̱nimu a ma yaritu n ti ki̱n. A yo ku ti̱ti̱niye ki̱tosadu ki̱ni mwe yinabi wu a yarikiye.”

³Yinu naba di̱tumbi̱re Kwama a dai a Fi̱ki̱m a yika di̱chilachangi̱n. We bwako, n ku naye a swe a nam di̱kire wu wure, wu ki̱ni duti̱ti ti̱dibiin n ti ki̱sumiyi kube. A bwal bwikiyu ki̱ni di̱mbiti kwebekwebe ti̱tu a swa̱ba ku we dur Kwamanu.

⁴Naye wu a do kuli̱ni bungbungi̱n n ti di̱di wurwuri̱n. Ki̱yiladu yinang si̱nariya n ti kali yiyu a lelei n ti chi ki̱lbuki̱lbe. N ki̱n a tau kwa̱se wu a si̱nariya we fa̱la̱ngu, kanang chikiye ki̱yung ya̱mi yibwilai n ti dutu ti̱tu a yari kitu.

⁵We tikabe ko a mwal di̱n di̱lairi̱mwu a ne nii ka kide we, “Babila wuduwe, ne ti̱baniye kwang, ne wu a chi ti̱bwilaiye we ti̱ti̱nitu.”

⁶N ku naye wu a ri fur ki̱nu ki̱ni ki̱tuum ni̱bu Kwamam, kanang chikiye, ki̱tuum ni̱bu Kwamam bi̱bu a mibani bobu ki̱mwa di̱n Yesuni̱mu. Kangu mang ku ki̱nangu a yari yii yinang yinang.

⁷Yinu naba di̱tumbi̱ri Kwama a bi̱u mi̱n ko, “A mayire mun ya̱r yiiye? Mang fwami̱n ya̱m bi̱lairi̱m naye wu mu n ti bi̱bu a nam di̱kiremu wu n ki̱n a fi̱l ki̱ni dututi ti̱dibiin n ti ki̱sumiyi kube.”

⁸Nam di̱kire mwang kuwe, a no wukure, aya a newe ki̱ni ti̱kuri ki̱ka̱ngu. N ki̱n ka chiredu a bwang ki̱swa̱ma̱ng, ka yika bwanu n ki̱n ka twiyande. Aya ni̱bu ki̱bunti̱ da ti̱ti̱ni ti̱ti̱mu, bi̱bu ni̱bu a no a mwalbu di̱nbi chitu we taki̱da ti̱kuriye a yo no a tibu yo ti̱ti̱niye, ka ya̱r yii yo ka ku nam di̱kire wu a no bwa a chirtewe.

⁹Ti̱tu ki̱bau kasn n ti ti̱kuran ti̱yili ti̱dui. Dututi ti̱dibinitu, yinang beti̱ kuni yi̱di̱bi̱n yiyu naye wu ki̱mang mati̱niyu. Ki̱yung mati̱m mi bi̱dibiin.

¹⁰Ti̱nti̱ne, dutu ti̱ti ti̱dibinitu yinang mati̱m bi̱bi bi̱dibiini̱m, bi̱bi bunu we bi̱bi bi̱dibiini̱m a bwarani̱mu, wuka n we ki̱ma mati̱ntu, wuka a bebu didiin. Ka a benge, a mwintuwe ka ma mati̱n kitu a ne tike.

¹¹Nam di̱kire wu a no ki̱ni ti̱kuriye ki̱ka̱ngu a ne ti̱kuri we, nang wu nari̱be, aya a chire we yi yidibiniyu, ti̱nti̱ne a tau wa̱re ki̱yika bwa ka twiyande.

¹²Ki̱sumiyu mwang ku kubiyu, yinang mati̱m mi kubu, bi̱bu a tibu mwe mati̱ni̱mu. Aya n chi beka yiu mati̱ntu ka madu a awa win n ti nam di̱kire wu.

¹³N chi ki̱ni kwang ti̱kuran chitu kanodu a fiwiine, ka kedu ka ni nam di̱kire wu dukan n ti mati̱n chi̱ntu.

¹⁴N chi ka ma kunnu n ti Be Kwane, aya Be Kwane ka chau ki̱la di̱ne n ki̱n Tewuduwe wu a Tewuduwe n ti Mai wu a mati̱me. N ki̱n kanodu n ti bi̱yali̱li̱mu n ti bi̱suti̱ri̱mu n ti bi̱bu ki̱bunti̱ ki̱nu ki̱ni ni̱ri dini̱mu.

¹⁵Yinu naba di̱tumbi̱re a ya̱i ko, “Mwetiyu mwang kuyu, n nang fanti sweri di̱baniyu we ka nang bi̱bi̱le ni̱bi n ti muraku ni̱bang n ti kuuti n ti kanang wuwule yiiye.

¹⁶Nam di̱kire wu n ti ki̱sumiyi kubu mwang kuyu ka ko di̱bannu. N chi ka wur ki̱nu, ka wo kuli̱nu ka du ki̱ni twatwadu. N chi ka wu nam ko, ka twidu a ki̱rang.

¹⁷“Mati̱mi kubumu ka madi ying di̱ne n Kwama a yo chi a kur chi n ki̱n ki̱baddu n chi ka made. Di̱ne yiko n chi ka kekadu ka ni nam di̱kire wu dukan mati̱ni̱nu. N chi kani̱n ma nam di̱kire wumi̱n kwa̱mbi̱r ka lami̱nti̱ yo ya̱m Kwamamu ka ride.

¹⁸Naye mwang kuwe ki̱yung bi̱n di̱dunu ka ma mati̱n mati̱m ti̱ti̱nimu.”