Read tula Dwakam 18 Bible Online

Dwakam 18 - tula bible

Dwakam 18

¹A kuteng ki̱ku n ku wuka naba di̱tumbi̱ri Kwama ki̱suwedu we bwa diye ki̱ni nabwe dukane, ti̱nti̱ne dwiyen kitu a yii ti̱ti̱niti kwangi wa̱liwa̱li.

²A fwa ya̱mu ki̱ni dukan ko, “A yar, Babila bi̱n di̱dunu a yar! A kau lo wu a ki̱fi̱bti yibwilaye, n ti kanang bi̱bi̱le ki̱duum ki̱ni̱bi yibwilai yiyu a lebi̱ da̱ngke.

³N ki̱n a yo kuu ti̱ti̱niye kwang a yar di̱ne dwadi ko wu a lebe. Mati̱m bi̱bu a ti̱ti̱nimu a ma yaritu n ti ki̱n. Ni̱bu ki̱feku kuli̱ni̱mu a kul we chi n ki̱n ki̱chidu di̱ne nwe ta̱me ko.”

⁴Yinu n nwe di̱kan ker a chire we bwa diye ki̱fwadu ko, ti̱chir mi̱ne we di̱ki̱ne ni̱bu mi̱m, ko ke ki̱leti kiyu a bwitadu chi̱n we, ko ke ni̱bu a weladi̱ chi̱n we ware.

⁵Di̱ne swa̱n ki̱leti ki̱nu a bukan a lam twiye, n Kwama a tabi̱bu ka wela ki̱nu.

⁶Ti̱ma ki̱mi̱n chi a lebitu yinangu n ki̱n a ma bi̱kamu mi̱nangu. Ti̱ma ki̱yerangu ki̱da yurau we chi n ki̱n a maatu. Ti̱ri ki̱mi̱n kwa̱se ki̱ni mwe yinabiye wu dukan ki̱nu a la wu n ki̱n a niye ni̱be ki̱da yurau.

⁷Ni ki̱n riye n ti kaiyan ni̱re yinang nabwe dwiyentu n ti nwe ta̱me n ki̱n a ni dur ki̱ne. We ni̱r ki̱nu n ki̱n a kuku duru ko, M mi̱n Cheba mai naye, m mi̱n n ke nabune A ne mang mang furi ki̱linu we ki̱diya kwadu.

⁸Di̱ne yiko, di wiin burang n ti bwa, n ti furi ki̱lin ka lum ki̱nu. ki̱rang be ka twi ki̱nu, Di̱ne n Kwama wu a da̱ng yinangu ka wela ki̱nange n nang Tewuduwe kwang.

⁹Mati̱m ti̱ti̱nim bi̱bu a ma yari waremu, bi̱bu a nwe ta̱ma̱ng ware n ti ki̱ni̱mu, ka kira wiini ki̱ni kemi we dur ki̱nu yo n chi ka ku ywa̱n kirangi̱nu ki̱chiredu we fi ki̱twin ki̱ne.

¹⁰N chi ka tidu kutan di̱ne tayu ko ke chi leti̱nu ki̱rangu we n ti ki̱n kani̱n yidu ko, A no mun! nabwe bi̱n Babilanu. Wo, Babila, bi̱n dwiyeni̱nu! Yaremo a be a awa wiin.

¹¹We yiko, ni̱bu ki̱feki̱ chimu ka kirati̱ wiini ki̱ni furi ki̱lin di̱ne a ne ni ka ta̱n chimi̱n kuli̱ne we.

¹²Kuli̱nitu yinang si̱nariya, asurfa, kali yi ki̱lbi̱ki̱lbi n ti yidoriyu kali, kuli̱n di̱yili̱nu, di̱di bungbungi̱nu, fi̱bi̱n di̱di wusi̱ni̱nu n ti di̱di wuri̱nu, kuli̱n n ti kanang wuwule ki̱dum katakome n ti kuli̱n num nakami̱n n ti kuli̱nu a swa̱swa̱be ti̱ti̱niye n ti kuli̱n ka̱mbi̱r di̱ribi̱nu n ti di̱kusi̱nu n ti kuli̱n kaliyu ki̱yiladu yilaneni kwang.

¹³N ti kuli̱n; sinamon n ti kuli̱n kwekwen n ti kuli̱n ki̱rangi̱n di̱di fi̱rfi̱ri̱n n ti mur n ti luban n ti mwe yinabi n ti ki̱nung n ti miim alkamam n ti ki̱nuti alkamam n ti tanti̱kai n ti kwanti n ti siti n ti keti̱kei kwerei n ti ka̱bi kanang chikiye ti̱kuri ni̱bi.

¹⁴Ni̱bu ki̱feki̱ chimu ka yi ki̱nu ko, “Nabwe ti̱kulan tiyilintu mwang yotu ni̱r we ka twiyadu, ti̱nti̱ne kuli mwitu n ti kuli̱n leran mwinu a twiyan. A ne mwang ya ti̱nu we ki̱da.”

¹⁵Ni̱bu ki̱feki̱ chimu, bi̱bu a ya kuli chitu we kuli̱n di̱du ki̱feku ki̱mi̱ndi̱nu, ka tidu kutan, di̱ne riye naye wu ki̱nwede a ya̱r chi yii.

¹⁶Kani̱n yidu ko, “A no mun! Nabwe bi̱n Babila a no ki̱do ka sa̱ni wu a fi̱bi̱n di̱di wusi̱ne n ti luke wu ki̱ni di̱mwali wure ki̱dosa bwi kiyu ki̱ni kuli̱n si̱nariyan, n ti kali yiyili n ti kali yiyu ni̱bu a swa̱swa̱be.”

¹⁷A ki̱twalangi kiin, kuli chiti kwang a twiyan. “Ki̱ni bi̱bu ki̱si kwa̱mbi̱re mwemu n ti bi̱bi kwadu ki̱ya chidu we fikomu, n ti bi̱bu ki̱ya chabtu chitu we mwemu lamu, ka tidu kutan.”

¹⁸Yo n chi ka ku ywa̱n ki̱ran di̱du ki̱twi Babilanu ki̱chiri wulakwulake, n chi ka yidu ko, “Nang di̱di̱le bi̱nu a no lam di̱ki̱nu?”

¹⁹N chi a fwal kur ki̱ti̱n di̱du a furi ki̱lin we bwi chiyu, ki̱kirati̱ wiini ki̱bwa̱kati̱ kemiyu ki̱ni furi ki̱lin ko, “A no mun! Bi̱n di̱dun, Bwa ni̱bu kwa̱mbi̱re mweti kwang ki̱mang kuli di̱ne nabwe kuli̱n ki̱ne. A awa wiin, kuli̱n di̱di kwang a twiyan.”

²⁰Ti̱ma furi mwen, n ti̱n bi̱bu a twiyemu! Ti̱ma furi mwen, ni̱bu Kwamam n ti fandubi̱bu n ti fa̱kubu. N Kwama a ma ki̱mi̱n yinangu n ki̱n a ma chimi̱nangu.

²¹Yinu wuka naba di̱tumbi̱ri Kwama a da̱u nabwe ti kale yinang ner a mar we nabwe ti laa, ki̱yidu ko. “Nang ki̱swi ni̱bu ka mang Babila ki̱ni dukanu nabwenabwen, ka twiyadu ki̱diya.”

²²A ne ti̱kan kwa̱ri̱n ngaki we, kono bi̱bu ki̱kaba tenim, ka bi̱bu ki̱kura chime, ka bi̱bu ki̱ku sumimu we di̱mune. A ne wuka nii we wu ka feku chi a di̱mune. A ne di̱kan diir di̱du a kwaku chiyan we.

²³A ne ni ku ti̱n wuka fiti̱la wa di̱mune we. A ne di̱kan ker bwele ki̱yiu naye, ka fwa̱n di̱du ki̱ naden we di̱mune. Di̱ne yo ferediye, ni̱bu di̱bem mumu, nang bi̱bu ki̱ma mati̱n we ti̱ti̱ni kwangi̱mu, kuuti kwang a ki̱tan di̱ne yimarichi mwiyu.

²⁴Ki̱tuum fa̱kubu Kwamamu n ti ni̱bu Kwamamu n we bi̱n Babilanu. n ti bi̱bu ni̱bu a chiben we ti̱ti̱nimi kwangi̱mu.