Read tula Dwakam 19 Bible Online

Dwakam 19 - tula bible

Dwakam 19

¹A kuteng ki̱ku n nwe di̱kan ker di̱dun we dii yinang muraku ki̱duwang ki̱ngau keme ki̱fwadu ko, Dela Kwama! Yuku n ti dwiyentu n ti dukanu a di̱Kwama.

²We bi̱yili̱mu, Kabaku kangu ki̱yilang. N ki̱n a wela ki̱kule, wu a kai ti̱ti̱nitu ki̱ni da yariye ko. N ki̱n a ye ni̱bu Kwamamu mi̱n ki̱tuuntiyu naye wu a kuriyu.

³N chi a ki̱la ngauti̱ keme ki̱da ko, “Dela Kwama Ywa̱n twiku kangi̱nu ki̱chiru ki̱yika twiye ki̱diya kwadu.”

⁴Seli̱bu wan turau chiri baanamu n ti bi̱kuri̱m bi̱bi baanamu a sungeni kukus a sii Kwama, wu a swe we ki̱di̱ng mati̱nange. N chi ki̱yidu ko, “Amin. Dela Kwama!”

⁵Yinu di̱kan ker a chire we ki̱di̱ng mati̱nangu ko, “Dela Kwama chire, n ti̱n ni̱bu nangang Kwamamu, n ti̱n bi̱bu ti̱nwe tayi kiyimu, bi̱ti̱ri̱mu n ti bi̱duumu.”

⁶Yinu n nwe ker di̱ki̱nu yinang tuule, yinang ker mwe ki̱sudu a laanu yinu yinang yo twiye ki̱madi kuurkuur yo ki̱ma twiye, ki̱fwadu ko, Dela Kwama chire naba dukane! Di̱ne n Kwama Tewuduwe ki̱ma mati̱nte.

⁷Ni ma furi mwen ni ma ti̱mi̱lan. Ni ni ki̱n dwiyentu! Di̱ne ti̱kali ki̱natu a be Kwanetu[23] a lame, fwa̱n ki̱nu a tu a do bwi ti̱kali ki̱nayu.

⁸“A ni ki̱n luke lili wu ki̱lbi̱ki̱lbu a ne dutu we.” Luke wu ki̱yung nangi̱n ti̱yili ti̱tu a ni̱bu bunti̱ki̱mitu.

⁹Yinu naba di̱tumbi̱re Kwama a yimi̱n ko, “Mwal, ni̱bu delaki̱m bi̱bu n Kwama a yal chiye di̱ne ti̱kali ki̱natu ti̱tu a Kwanitu. N ki̱n a sub ko, bi̱bu nang kasi ti̱kwa̱li ti̱yili ti̱tu a chire a di̱Kwamatu.”

¹⁰We bi̱bu ya̱m n sung we kakku Kwamangu mi mang si ki̱nu. Aya n ki̱n a yi ko, “Maduwe yiko, di̱ne m mi̱n naba nangange yinang mun n ti kebu mumu, bi̱bu a tau di̱mwar Yesuni ki̱ri̱ngi̱mu. Bi̱yili̱mu n Yesu a kwa̱l ni mi̱ni̱mu nang niku dukan mwaki̱nu.”

¹¹Yinu n ku dii a wuden, wuka kwere a ti we bwako mwe. Di̱n nii wu a swe wenu n yile n ti bi̱yili̱m. Ki̱ ma mwataki̱ kangu ki̱ni yile yinu ki̱mati̱ kun di̱du a yilen.

¹²Nuyi kiyu ki̱yidu yinang ben ki̱rangi̱n, ti̱ki̱ri̱ni mati̱nitu we dur ki̱nu nabwen. A mwalati̱ di̱nbi we ti̱tu kana ki̱n ka medu ka kidii.

¹³N ki̱n a do luke wuswa̱bre a ki̱tuume. Di̱n ki̱nu “N di̱kwal Kwaman.”

¹⁴Ni̱bu kuni̱mu we bwadi ki̱ nabi̱ ki̱nu, n chi a do kuli̱n lilin di̱du a ne dutu we, kuli̱n di̱du yimwemwen, a swe a kwereti mwemwen.

¹⁵Kul di̱du ki̱ni chami̱n ki̱chiredu we yi ko di̱du ka chau ki̱la ki̱n we kuuti. Ka ma mati̱n chitu ki̱ni ki̱twalang makkang[24]. Ka faba ti̱kulan yinabitu a kange Yinabiye wu a ki̱fwini Kwama naba dukane kwange.

¹⁶A mwal di̱n di̱du we luke ko n ti markune ko: “Mai mati̱me n ti Tewuduwe, Tewuduwe tiye.”

¹⁷Yinu n ku naba di̱tumbi̱ri a ti a kuko, ki̱yale ki̱sungti̱kwasi we twiye ko, “Ti̱be, ti̱chau nabwe chabte Kwama a mar chimi̱ne,

¹⁸beti̱ wu nam mati̱me n ti wu a tikaketi ni̱bu kuni̱me n ti ki̱kati ni̱bu kunni̱miyu n ti ni̱bu bi̱bu a di a kweretimu n ti bi̱bu ki̱sii chimi̱ndi̱mu n ti ni̱bi kwang n ti ni̱bu bi̱ni̱mu n ti ka̱biyu, seli̱bu n ti bwesi̱m.”

¹⁹Yinu n ku nam di̱kire n ti mati̱m ti̱ti̱nimu n ti ni̱bu kunni̱mu a muran, di̱ne ke chi ma kunnu n ti wu a swe a di a kwere n ti bi̱ki̱mu ni̱bu.

²⁰Yinu a tau nam di̱kire n ti fa̱kubu ti̱kwanimu wu a ma chi ya̱r yii di̱ne wuka nam di̱kire. We chi ya̱r yiitu a maatu a yo bi̱bu ki̱ni di̱mwal nam wumumi̱n ti̱dui n ti bi̱bu a le bobu ki̱ sii ki̱wulang niyange. A tau nam di̱kire n ti fa̱ku ti̱kwaniye a mar chi ki̱ni ti̱kuri a far ki̱rang di̱du ki̱twidu ki̱ni ben ki̱fi̱bti ki̱rang ki̱kwanang.

²¹A chi̱be ni̱bu kuni̱mu ki̱ni kulu ki̱chiredu we yii ni wu a swe a kwere wu ki̱ni di̱mwali mwenge. Ki̱ni̱btiyu a wu nam chi yinangu n kawure a kudiyang.