Read tula Dwakam 2 Bible Online

Dwakam 2 - tula bible

Dwakam 2

¹Mwal naba ti̱tumbi̱ri a Kan Kwama di̱du a ni̱bu Afisa mi̱n mwi:

²M yim chi n ti̱n ni̱bu bunti̱ki̱mu a Afisa ti̱maditu. N ku yinangu ti̱kwa̱rtadu we nangangu n ti bwanu chi̱n. N yim a ne ta ma bwanu ki̱ni wa̱ri ni̱bu bi̱bwilamiyu. N swa̱ka̱ bi̱bu ki̱yidu ko n chi fandubu aya n ke ki̱ni̱mu. N ya chi ni̱bu ti̱kwanim

³N yim, m ma bwanu, m mun mu ni̱ru n nwe riye di̱ne mi̱n, mun wengi chik mwang ki̱labu kuteng.

⁴Aya chi mang fwadu a dur mune nang ti̱tu. Mwang mi̱laibu yinangu no a mwan mwengu.

⁵Da̱ng! Yaremo a ma nabwen. Woki̱ti̱m, ki̱latewe bunti̱ki̱ mwangu ferediyangu ka a newe yiko, mang ya bwa a di̱chine mang wela chi̱nu, mang chaku fiti̱la chi̱n we fi a no wemi̱ne.

⁶Aya a lemi we di̱mune nangu mwan ko dati Nikolatiyangu yinangu mang ko ti̱nangu.

⁷Wu ki̱ni ki̱teliye a dakan ka nwe chi Fi̱ki̱m Kwamamu ki̱fwa ni̱bu a kambi Kwamatu mi̱nde. Nii wu ka chau ki̱la, mang ni ki̱n da̱a̱ ka chadu we tiyang ti̱kuriyangu, ka nang chikiye, bwa lon Kwama.

⁸Mwal naba di̱tumbi̱ri Kwama wu kan Kwamanu a ni̱bu Si̱mi̱rina mi̱n mwi: Bi̱bu nang ya̱mu a wu a tiye kakke n ti wu ka swanti̱ne, wu a bwa a kuntuwe.

⁹N yim riye mwang lenge n ti kwalan mwitu. Aya ki̱ni yiko m muni ki̱ni kuliti̱tu a Fi̱ki̱m Kwamamitu! N yim ya̱mi swa̱ba ku ni̱bu ki̱fwadu a dur muniyu, n chi bi̱bu ki̱kudu ko n chi Yafuda bi̱suturi̱m Kwamamu. Aya a newe yiko, n chi a ki̱la nangi̱n Setan.

¹⁰Nwedu tayi riye wu mun yadu mwang nwede we. Da̱ng! N Setan ki̱yadu ka di̱ku bi̱kam chimu a di̱bi̱nti̱l ka swe chi̱nu, ta le riye fumake wu a wanditiye. Aya ka n tii ki̱ri̱nge, kasi no a yii bwange, mang ni̱n di̱ki̱ri̱n ti̱kuri.

¹¹Wu ki̱ni ki̱teliye a nwe chi Fi̱ki̱m Kwamamu ki̱fwa kambi Kwamatu mi̱nde. Ni̱bu ka ma ki̱ti̱memu, bwa wu robe a ne twai chidu.

¹²Mwal naba di̱tumbi̱ri Kwama wu a kan Kwamanu a ni̱bu Bi̱rka̱mu mi̱n mwi: Bi̱bu nang ya̱m ki̱mu wu ki̱ni di̱kwal Kwaman yinang kulu bali̱ntii turau ki̱ni chami̱nu.

¹³N yim fi mwang swe mi̱ne, n swe a bi̱nu Setan ki̱mang mati̱ne. Aya ki̱ni yiko, mun bumiti̱nu ki̱ni bi̱yili̱m. Ti̱nti̱ne, keku bi̱yili̱mangi wengi kusi̱kusi̱ we fi fakware ki̱mang mati̱ne kasi no n nang ki̱dangu n Antifas, naba nanganmi wu ni̱ri diine a bwa we bi̱nu fakware ki̱mang mati̱n kite.

¹⁴Kasi ki̱ki yikongu, m mi̱ni ki̱ni ya̱m we dur muni bayim. N du bi̱kam we tibe chi̱n, bi̱bu ki̱bunti̱ miyaku Balaam, wu a miya Balak mi̱n, yinu a yo ni̱bu Yisrela a ma ki̱le, a chau chabtu ti̱tu ni̱bu a ma ti̱yobi mi̱n niku ki̱nitu. Yinu a yo n chi a mati̱ ti̱kuli.

¹⁵A lakabu ti̱n, muni ki̱ni bi̱bu ki̱bunti̱ miyaku Nikolatiya.

¹⁶Wo ki̱ti̱m! Ka a newe yiko, a ne ti ke mang ya bwa a di̱mune mang makadu n ti chi ki̱ni dukan di̱kwa̱l Kwamanu yinang kul ka chiru a yiinu.

¹⁷Wu ki̱ni ki̱teliye a nwe chi Fi̱ki̱m Kwamamu ki̱fwa ni̱bu a kambi Kwamatu mi̱nde. Kanang wuwule niye wu ka chau ki̱la, mang ni ki̱n manna[3] n ti kale dukane wu mwemwe ki̱ni di̱n di̱fwin we bwikiye, kana wu ka yidde a yim.

¹⁸Mwal naba di̱tumbi̱ri Kwama wu a kan Kwamanu a ni̱bu Tiyati̱ra mi̱n mwi: Ti̱tu nang ti̱kwa̱li yii Bwe Kwamatu, wu nui kiyu yinang ben ki̱rangi̱ne, naniyu yinang takula wu ni a kwasukwase.

¹⁹N yim nangi̱n mwitu, mi̱laku mwangu n ti keku bi̱yili̱mang mwangu. Nangang Kwama mwangu n ti bwanumo, n yim ti̱n mun funti̱bwi a la ki̱dangu no mwang kunengu.

²⁰Aya a mwintuwe, mang fwa bi̱bu we dur munu. N du Yesebel naye wu ki̱yal dur ki̱nu ko fa̱ku we. Di̱ne chi n ki̱n ki̱miyade, ki̱butu ni̱bu ki̱mana ti̱kuli, ki̱chati̱ chabtu ti̱yobi.

²¹N ni ki̱n ki̱swi mi a wo ki̱ti̱m, aya n ki̱n a ko ki̱bakka ti̱kuli.

²²Mang yo burang ki̱kwanang ka tau ki̱nu. Bi̱bu ki̱ma sulai waremu mang ni chi riye wuduwe ka lami̱nti̱ yo n chi ka wo ki̱ti̱me.

²³Mang chi̱u bi̱bu ki̱bunti̱ yiikomu, yinu ni̱bu bunti̱ki̱mu ka yindu ko m mi̱n nang wu mi̱n ku ni̱tu ni̱bitu n ti ti̱kuran chite. Mang ni kawure ki̱ti̱me yinangu kwa̱mbi̱r ki̱n a yungyangu.

²⁴Ki̱ka̱ngu mi̱n fwa chimi̱nu n ti̱n bi̱kamu a Tiyati̱ramu, bi̱bu a bunti̱bu miyaku ki̱kusangu ki̱ku a naye wangu, ta miyabu chi bi̱bu ki̱bunti̱ni̱mu ki̱yiidu ko “ti̱lairi Setan ti̱tu a ma swa̱n”. A ne mang yo chimi̱n kaang tureng.

²⁵Chi mang yi chi̱ne, ti̱tau keku bi̱yili̱mang changi ki̱ri̱ng a lami̱nti̱ yo mang bede.

²⁶N ki̱n wu ka chau ki̱la ka lami̱nti̱ yo mang ki̱ladange, Mang ni ki̱n dukanu ka ma mati̱n kuuti.

²⁷Ka ma mati̱ntu ki̱ni ki̱twalang makka. Ka wure chidu yinang kubi swani.

²⁸N chi kanodu ki̱ni duum dukani̱mu mang yiuwe a di̱ Temiyemu. Yinu mang ni li̱mangu yinang ki̱swi ki̱chiredi kunsine.

²⁹Wu ki̱ni ki̱teliye a nwe chi Fi̱ki̱m Kwamamu ki̱fwa ni̱bu a kambi Kwamatu mi̱nde.