Read tula Dwakam 20 Bible Online

Dwakam 20 - tula bible

Dwakam 20

¹Yinu ki̱la n ku naba di̱tumbi̱ri ki̱suwedu a dii ki̱ni masoli wu a bwang ki̱swa̱ma̱nge, a tatte neti maklane we fa̱la̱ng kangu.

²N ki̱n a tau neti soo wuduwe, kanang chikiye so wu ni̱bu ki̱yalu ko wu bwila ki̱yalti̱nu ko Setane, a kwau ki̱n ka ma swa̱ti̱tu kuneng.

³A mar ki̱n we bwang ki̱swa̱ma̱ngu a yinge ti̱n. N ki̱n a ne ya da ka buti̱ti̱ kuu ni̱bu ki̱da ka lami̱nti̱ yo swa̱ti̱tu kuneng ka ride. A kuteng ki̱ku ka mar ki̱nedu a bakswi bayim.

⁴N ku ti̱di̱ngri mati̱ni ki̱ni ni̱bu a ya da ka ma mati̱ni̱mu a swe we. N ki̱la n ku bi̱bu ni̱bu a chi̱be chi di̱ne ki̱ma di̱mwar ya̱m Yesum, ki̱mwati̱ ya̱m Kwamamu, bi̱bu a siibu nam di̱kire ka ki̱wulang kangemu, a yiu ti̱bu di̱mwal ki̱nu we ti ka̱be chi ka fa̱la̱ngemu, n Kwama a yo chi bi̱kuri̱m ka ma mati̱ntu n ti Masiya swa̱ti̱tu kuneng.

⁵(Bi̱kamu a bwarani̱mu a kunbu didin ka lami̱nti yo swa̱ti̱tu kuneng ka ride.) Ki̱ku nang kunku kwa̱miyang ki̱kakkangu.

⁶Ni̱bu delaki̱m bi̱bu yinang Kwamamu, n chi wetuwe bi̱bu ka mwe kunki̱mu. Bwa wurobe a ne ya da we di̱chiye. Aya n chi kano fanseti Kwamai n ti Masiya n chi ka ma mati̱ntu ware swa̱ti̱tu kuneng.

⁷Ka swa̱ti̱ti kunengitu a suwe, yinu ka mare Setan we kange ko

⁸N ki̱n ka chakakku kani̱n butu kuuti ki̱yalu ko Kok n ti Makok we fwiti̱neti ti̱ti̱niyu ki̱ni yanako. N Setan ka mur chidu ki̱ni kwang a fi n chi ka mang kunne, n chi nabwen yinang yane wu a la.

⁹N chi a ti̱ran we ti̱ti̱nitu, a kana bi̱nu n Kwama a mi̱lani̱nu, kanang chikiye fi ni̱bu Kwamamu wemi̱ne. Aya ki̱rang a chire a bwa diye a be twi fakwarbi̱ bi̱bu.

¹⁰N Setan wu a buti̱ chiye, ni̱bu a kwaban a mar a far ki̱rang ki̱kwanang. Nang fi nam di̱kire n ti fa̱kubu ti̱kwanimu wemi̱ne. N chi kani̱n nwe riye we fiko kum n ti kuko ki̱diya kwadu.

¹¹Yinu n ku nabwe ti ki̱di̱ng mati̱nang n ti wu a swe we kwangi mwe. Ti̱mu n ti twiye a twiyan, a kwala fi ka sweende.

¹²Yinu n ku bi̱bwari̱mu, seli̱bu n ti bwesi̱m a ti we kakku ki̱di̱ng kangu, yinu a wudu tati̱ki̱dayu, a wuduti̱ wuka taki̱da, kanang chikiye taki̱da ti̱kuriye. N ki̱n a mwata bi̱bwari̱mu mi̱n, a bunti̱ chi n kawure a ma a ti̱ti̱niye.

¹³Laa wuduwe a chake bi̱bu a bwaran a di̱ki̱nemu, yinu bwa n ti futi̱tu a chake bi̱bwari̱mu a di̱chiyemu. A mwata kanang wuwule niyemi̱n yinanga dakanangu.

¹⁴A kuteng ki̱ku, a mar bwa n ti futi̱tu a far ki̱ran. Far ki̱ranu nang bwa wurobe.

¹⁵Nii wu di̱n ki̱nu a newe taki̱da ti̱kuriye, ka marti̱ ki̱nu we far ki̱ran di̱du.