Read tula Dwakam 21 Bible Online

Dwakam 21 - tula bible

Dwakam 21

¹Yinu n ku dii wufwiye n ti ti̱m bi̱fwim. Di̱ne dii wuka̱re n ti ti̱m bi̱ka̱ri̱mu a twiyan. Laati kwang a twiya ti̱n.

²N ku Wurchalima wufwiye, bi̱n Kwamanu a chire we dii ki̱suwedu. A dosan yinang na kwiye wu a do yikiyu keki̱ tekan n ti kwarta ko.

³Yinu n nwe ker di̱dun a chire we ki̱di̱ng mati̱nangu ko, “Ki̱ka̱ngu n Kwama ka swedu ware n ti ni̱bu, n ki̱n ka swedu n ti chi, n chi ka kau ni̱bu ki̱m, yinu n ki̱n n ki̱fwan kanodu ware n ti chi, n ki̱n nang Kwama chi.

⁴N ki̱n ka musu chimi̱n ti̱mwenitu we nuiyi chiyi kwang. A ne ya̱m bwamu we n ti wiiniyu n ti furi ki̱linu n ti burangu. Kwa̱li̱n chi̱n di̱du feredinu a su.”

⁵N ki̱n wu a swe a ki̱di̱ng mati̱nange a yi ko, “Mang Mai kanang ti̱ti̱le chiye ti̱fwi! Yinu a yiti̱n ko, mwalmwale, ya̱m bi̱bu bi̱yili̱m ka fwedu.”

⁶Yinu a yiko, “A ri. M mi̱n nang mweki̱ku n ti swangki̱ku[25]. M mwe kanang ti̱ti̱le chiye, mang swanti̱ kanang ti̱ti̱le chiye.

⁷Wu ka chau ki̱la ki̱ni fakware ka chau kula wu, mang kau Teki̱n n ki̱n ka kau bwemi.

⁸Aya bi̱bu a dumi̱n di̱ne tayimu n ti bi̱bu a kebu bi̱yili̱mi̱mu n ti bi̱bu ki̱seta yiimu, n ti bi̱bu ki̱chi̱be ni̱bumu n ti bi̱bu ki̱ma ti̱kulimu n ti ribi̱bu n ti bi̱bu ki̱si di̱yor n ti bi̱bu ki̱mwera ti̱kwanimu n chi kwang ka le ki̱rang ki̱kwanangu. Wu nang bwa wurobe.”

⁹Wuka we ni̱bu ti̱tumbi̱ri Kwamami bi̱dibiin bi̱bu a swan kute ki̱ni kutai yiyu a ri ki̱ni ki̱fwini Kwamayi yidibiniyu, a yimi̱n ko, “Be, n yungi̱n na kwiye Be Kwane.”

¹⁰Fi̱ki̱m Kwamamu a dai, n fwe a di̱kan kun di̱dun n kebi̱ swa̱n, a yungi bi̱n Kwamanu, Wurchalima wufwiye wu a chire a bwadi ki̱suwede.

¹¹Bi̱n Kwama di̱di kwangi wa̱liwa̱li ki̱ni dwiyen Kwamatu. Ki̱yiiye ko yinang kali yi wuli̱bi̱wuli̱bi n ti ki̱duum karfemu ni̱bu ki̱yalu ko chasfa yiyu yinang madubiyu.

¹²Yakwale bi̱ne a su, kwa̱ti̱ti kub chiri turau ki̱ni ni̱bu ti̱tumbi̱rimi kub chiri burau we kanang di̱di̱le kwa̱re. A mwal di̱mbi bi̱ntu a Yisrela we kanang di̱di̱le kwa̱re.

¹³Kanang wuwule fwiti̱ne we fwiti̱netiyi yaanangu kanang chikiye, twa̱r n ti twa̱r wuli̱n n ti kir kulanu n ti ki̱twale ki̱ni kwa̱ti̱ti ti̱ta.

¹⁴A ru tamme yakwale bi̱ne ki̱ni kaliyi kub chiri yurau. A mwal we kanang wuwule kale di̱n fandun we fandubu Be Kwanemi kub chiri burabi̱mu.

¹⁵Naba di̱tumbi̱re wu a fwa ya̱m n ti mi̱ne ki̱ni ki̱twalang sinariyang ki̱ku ka swe bi̱nu n ti kwa̱tu kitu n ti yakwale bi̱niyu.

¹⁶Fwiti̱neti bi̱niyu a fi̱rami̱n a fiwiine we swa̱nu ki̱ni kwang. N ki̱n a swe bi̱nu a ya swa̱n bi̱ni̱nu Kilomita kuniriti turau ki̱ni kuliti taana.

¹⁷Naba di̱tumbi̱re a swe yakwale, a ya swa̱n ki̱nu kuli diin ki̱ni wan taana chiri yaana.[26]

¹⁸A mu yakwale ki̱ni karfe ni̱bu ki̱yalu ko, “Chasfa.” Wauwade ki̱yiladu yinang si̱nariya, yinang madubi.

¹⁹A do tamiyu a bi̱n di̱diyu ki̱ni kanang wuwule ki̱dum kale wuyileme. A ma tame mwemi̱ne ki̱ni chasfa, wurobe a ma ki̱ni saffaya, wutare a ma ki̱ni akat, wunare a ma ki̱ni sumurrudu,

²⁰wunure a ma ki̱ni onis wunukune a ma ki̱ni karneliyan wuni̱bine a ma ki̱ni kirisolat, wunaribe a ma ki̱ni beril, wuturkube a ma ki̱ni tofas, wukube a ma ki̱ni daimon, wukub chiri wiine a ma ki̱ni chasin yinu wu kub chiri yurabe a ma ki̱ni ametis.

²¹Kwa̱ti̱tu ki̱ni kub chiri turako kana kali yidori, kanang di̱di̱le kware ki̱ni wuko kale. A ma nelo wuduwe we bi̱nu ki̱ni si̱nariya wu a kwa̱ukwa̱be, yinang madubi.

²²Mang kubu Kan Kwama di̱duna Wurchalimanu we bi̱nu. Nangki̱n n Kwama Tewuduwe naba dukane kwange n ti Be Kwane nang kanu.

²³Bi̱n di̱du a mabu nangangu ki̱ni kuko ka swange, di̱ne dwiyen Kwamatu a kau ki̱yyiye. Aya Be Kwane a kau kiye ko.

²⁴Kuuti ti̱ti̱niyu ka yadu we yiiku kangu, mati̱m ti̱ti̱nimu ka be bi̱n di̱du mi̱nedu ki̱ni kuli chitu.

²⁵A ne di kwa̱tu chitu ka yingede we, di̱ne a ne kum we bwako.

²⁶Kuuti yiyu a ti̱ti̱niyu be ka ni dwiyentu n ti kuli chitu.

²⁷A ne danduritu ka le fikotu we. Ni̱bu ki̱ma chi dibwimu n ti ni̱bu ti̱kwanimu a ne le fiko. Bi̱bu ka ledi̱mu kana ni̱bu bi̱bu di̱nbi chitu we taki̱da Be Kwane wu a ti̱kuri ki̱diya kwade.