Read tula Dwakam 22 Bible Online

Dwakam 22 - tula bible

Dwakam 22

¹Yinu naba di̱tumbi̱re a yungi laa wu a mwe ti̱kuriye ki̱yiladu yinang kali yili, ki̱chiredu we ki̱di̱ng mati̱nang Kwamangu n ti Be Kwane,

²we tibe wuduwe nelo. We ki̱ti̱ku kanang wuwule laa, tiyang ti̱kuriyang we ki̱ku ki̱tu ti̱kulantu ki̱da kub chiri yurau we swa̱ra̱ngu. Lwangi̱n tiyangitu ki̱be kuuti mi̱n bumbi riyetu.

³A ne ti̱kan chi ti̱tu n Kwama a ma ki̱mi̱n yiitu we, ki̱di̱ng mati̱nang Kwamangu n ti ki̱ku a Be Kwanengu ka swedu we bi̱nu, ni̱bu nanga ki̱mu kani̱n sii ki̱nu.

⁴N chi ka ku kabu ko, yinu di̱n ki̱nu kanodu we kabi̱ni chiyu.

⁵A neti̱ wuka kum we, a ne bakku ki̱yiyen we, ka kuko, di̱ne n Tewuduwe Kwama ka ni chi yiiki̱ku. N chi ka chau mati̱ntu ki̱diya kwadu.

⁶Yinu naba di̱tumbi̱ri Kwama a yi mi̱n ko, “Ya̱m bi̱bu ka bi̱yili̱m, ka fwedu. N Kwama, wu ki̱ma nangang kangu a fi̱ki̱m we fa̱kube, a tume naba di̱tumbi̱re, ke a yung naba nanga ko chi a mwintuwe yaka fwedu a ne tiketu.”

⁷“Da̱ng, mi̱n ki̱ladi daatu! Naba delake ni wu a tau ti̱kwa̱li ti̱tu a chi a yaka fwede we taki̱da.”

⁸M mi̱n n Yowana, m mi̱n wu mang nwe, mang ku ti̱chitu we. Yo mang nwe mang kuti̱ne, n sung kus we nani kiyu mi̱n si naba di̱tumbi̱ri a tau ki̱yungi chite.

⁹Aya n ki̱n a yi mi̱n ko, “Maduwe yiko, m mi̱n naba nangange yinang mun n ti bi̱kamu kebu mumu fa̱kubu n ti kanang wuwule niye wu a tau ti̱kwa̱li yiitu a taki̱da wutu. Sii kana Kwama!”

¹⁰Yinu a yimi̱n ko, “Laiyu ti̱kwa̱li yiitu a chi yaka fweditu we, di̱ne ki̱swi mwatawe.

¹¹N ki̱n wu ki̱ma chi a lebe, n ti wu ki̱mwe ti̱kwaniye, n ti wu ki̱tum bi̱yili̱me, a chakakku. N ki̱n wu ki̱ma fiswe yinang Kwama a chakakku a nang madu.”

¹²“Da̱ng, mi̱n bedi datu, mang bedu ki̱ni ki̱ti̱me, be mang nikadu, mang swe kawuremi̱n ti̱nu we chi n ki̱n a maatu.

¹³M mi̱n nang Alfa n ti Omeka. Kanang chikiye, m mi̱n nang wukakke n ti wu ka ta̱lle, Mweku n ti Swangku.”

¹⁴Ni̱bu delaki̱m bi̱bu ki̱bunti̱ yili̱n Kwamati̱mu. Di̱ne n chi ka ledu we kwa̱tu bi̱nitu, ka chadu we ti̱kulan tiyang ti̱kuriyangitu.

¹⁵Ni̱bu bi̱bwilamu kanodu a kuteng bi̱nang kanang chikiye ribi̱bu n ti ki̱kulbi̱bu, bi̱bu ki̱chi̱be ni̱bi̱mu n ti bi̱bu ki̱sii di̱yor n ti bi̱bu a mi̱lan chakku kakku ki̱ni ti̱kwanimu.

¹⁶“M mi̱n n Yesu, n tum naba di̱tumbi̱ri mi, ko ke a fwa ni̱bu mi̱n ya̱m bi̱bu we kambi Kwamatu. M mi̱n nang buke ki̱kuti̱li̱me Dauda wu yinang ki̱ yinang.”

¹⁷N Kwama Fi̱ki̱m n ti ni̱bu ki̱mu yinang naye na kwiye we di̱ki̱nemu a yi ko, “Be!” Ti̱nti̱ne n ki̱n wu ki̱nwede a fwa ti̱n ko, “Be!” Kanang wuwule niye wu ki̱bau mwe ti̱kuriye, a be, ti̱nti̱ne, n ki̱n wu a ke kayidde, a yiu mwe ti̱kuriye li̱mang.

¹⁸M mi̱n n Yesu, mi̱n wu ki̱tele we ni ki̱nwe ti̱kwa̱li yii chi yaka fwede. Ka wuka ni a su chi we ya̱m bi̱be, n Kwama ka su ki̱mi̱n bwini chi yinangu we taki̱da wuwangu.

¹⁹Aya ka wuka ni a chaku di̱kan di̱kwa̱l yiin we chi yaka fwede, n Kwama ka chaku ki̱ti̱me ko wu a tiyang ti̱kuriyange n ti wu a bi̱n Kwamane, yinangu a swe we taki̱da wuwangu.

²⁰N ki̱n wu a fwa ya̱m bi̱be, a yi ko, “Ki̱kumang mi̱n bedi daatu!” Naba mwalke a ke ko, Amin. Be Yesu Tewuduwe!

²¹Li̱me Tewuduwe Yesu a swe ware n ti ni̱bu Kwamamu. Amin.