Read tula Dwakam 8 Bible Online

Dwakam 8 - tula bible

Dwakam 8

¹Yo Be Kwane a wudu kale dukane yidibine, bwadi a le si̱ng a da̱u ki̱twalangu yinang di̱mwatar awa.

²Yinu n ku ni̱bu ti̱tumbi̱ri bi̱bu a kakku Kwamamu, a ni chi sumiyi yi̱di̱bi̱n.

³Yinu wuka naba di̱tumbi̱ri Kwama ki̱ni kwa̱se si̱nariya wu ki̱twing ki̱nung ki̱ki fi̱rfi̱ra̱ng, a be a ti we se Kwama. Ni̱bu a ni ki̱n ki̱nung ki̱ki fi̱rfi̱ra̱ngu nabwen ke n ki̱n a ketuwe twa̱ba̱ku ni̱bu yinang Kwamamu, ka nidu we se Kwama si̱nariya wu a kakku ki̱di̱ng mati̱nange.

⁴Ywa̱nu ki̱twiing ki̱nung ki̱ki fi̱rfi̱ra̱ngu n ti twa̱ba̱ku ni̱bu bunti̱ki̱mangu a chir we fa̱la̱ng naba di̱tumbi̱ri, a fi̱l a ya kakku Kwamang.

⁵Yinu naba di̱tumbi̱ri a da̱u kwa̱se ki̱twiing ki̱nung ki̱kii fi̱rfi̱ra̱ngu, a ri ki̱ni ki̱rang a sengu, a kure a ti̱ti̱ni. Ki̱yale a ngau n ti kebi̱ ti̱dui, n ti ki̱yilti, yinu ti̱mu a mi̱ka ti̱n.

⁶Yinu ni̱bu ti̱tumbi̱ri Kwamami bi̱dibini̱mu ki̱ni sumimu a do bwiyu ka ku sumiyu.

⁷Yo naba di̱tumbi̱re wu kake a ku sum ko, tarangkwai n ti ki̱rang, a se ki̱ni ki̱tum, a fwale we ti̱ti̱nitu. Ki̱rangu a twi ti̱me wiin we yitta wa di̱mbi̱rme ti̱ti̱niye, ti̱me wiin wa yitta we tiyang n ti fili̱nu n ti swa̱ki̱ku ki̱ni kwang.

⁸Wu robe naba di̱tumbi̱ri Kwama a be ku wuko sum, ti̱kan chi yinang kun di̱dun, di̱du ki̱chau ki̱rangi̱n, a mar ki̱n a nabwe ti mwe la. Ti̱me wiin wa yitta we kangu ba̱la̱ng mwe la a kau ki̱tuum.

⁹Ti̱me wiin wa yitta we chitu ki̱ni ti̱kuri a mwetu a bwaran, yinu ti̱me wiin wa yitta we kwa̱mbi̱ri mwenyu a fikoyu a twiyan.

¹⁰Yinu naba di̱tumbi̱ri wu tare a ku wuko sum, wuka nabwe ti ki̱swi wu ki̱chau ki̱rang yinang kuniye a chire a bwadi, a yartuwe ti̱me wiine wa yitta a latiye n ti neti̱bwi mweyu.

¹¹Di̱n ki̱swi wunu “Kadi” wiin wa yitta wu a mwetiye a suteni kadi, ni̱bu nabwen a no mwe wumu a bwaran, di̱ne kadiye ko.

¹²Wu nare naba di̱tumbi̱ri a ku wu ko sum, a ngau ti̱me wiin wa yitta we kuko a wuren n ti swangu n ti ki̱switiyu a suteni ki̱li a lam ti̱me wiin wa yitta. Ti̱me wiin wa yitta we kuko a ne yiiku we n ti swangu a yibu ki̱ni kum.

¹³N da̱ng n ki̱la ku naba di̱tumbi̱re Kwama ki̱bwa̱ladu a dii, a bwe keme ko: “A no chi̱n! A no chi̱n! A no chi̱n! Ki̱kume a ya ni̱bu ti̱ti̱nimu, di̱ne sum wu ni̱bu di̱tumbi̱rimi bi̱ta yaka kuwede!”