Read turkana Akisiakinet 11 Bible Online

Akisiakinet 11 - turkana bible

Akisiakinet 11

¹Eanete ngitunga a akwap kadaang ngabukui ngapei nabo araakasi ngakiro ngapei.

²Ani na awotuneta ngitunga alo kide, apotu tanangut naroatin a akwap a Babilonia. Sodi toloma kesi neni.

³Tolimonokinos kesi make tamasi, “Potu atoyata echoto, sodi enoma lokojokon.” Kitiliwosi kesi echoto lo enomete ngamoru, sodi tokonyakis a elaam.

⁴Tolimut tamasi, “Potu atodukokisi ere lo enangi aita keng nadis, sodi kitoyenikinere ngoni, nyikipetakin nakwapea daang.”

⁵Totiyaun Ekapolon Akuj aanyun ere ka adukuoru na adukete ngitunga.

⁶Sodi tolim Akuj tama, “Kingolikisi a, eraakasi kesi ebukut epei, nabo erai ngabukui kech ngapei. Erai ibore en akisiakinet a ngakiro ana esubete kesi. Nakaneni emam tokona ibore ni esakete kesi akisub ni ekuruwori kesi.

⁷Potu atotiyaaros sodi echoliakisi ngabukui kech, nyeepedoreta kesi make apupo a ngakiro ana iruorosi.”

⁸Sodi topeta Ekapolon Akuj kesi kaneni, kialakin akwap wadaang. Kimiekis kesi akiduk ere ngolo.

⁹Kotere ngakiro nguna, tanyarae ere ngolo Babilon,[18] kainyo neni ngesi echoliakinea Ekapolon Akuj ngabukui a ngitunga kadaang, nabo neni ngesi apetakinea Akuj kesi nakwap wadaang.

¹⁰Eraakasi ngirora lugu ngika ngalesea a Chem. Ani enangete ngikaru a Chem amiat apei, touriu Aripakichad, ngikaru ngiarei adaunet a akaale.

¹¹Ani akidounet a Aripakichad, kiboi Chem ngikaru ngamiae ngakan. Touriu ngesi ngide ngiche lusapa ka lupesur.

¹²Araunet a ngikaru a Aripakichad ngitomwon-uni ka ngikan, touriu Sela.

¹³Ani akidounet a Sela, kiboi Aripakichad ngikaru ngamiae ngoomwon ka nguuni. Touriu ngide ngiche lusapa ka lupesur.

¹⁴Araunet a ngikaru a Sela ngitomwon-uni, touriu Eber.

¹⁵Ani akidounet a Eber, kiboi Sela ngikaru ngamiae ngoomwon ka nguuni. Touriu ngide ngiche lusapa ka lupesur.

¹⁶Araunet a ngikaru a Eber ngitomwon-uni ka nguomwon, touriu Peleg.

¹⁷Ani akidounet a Peleg, kiboi Eber ngikaru ngamiae ngoomwon ka ngitomwon-uni. Touriu ngide ngiche lusapa ka lupesur.

¹⁸Araunet a ngikaru a Peleg ngitomwon-uni, touriu Reu.

¹⁹Ani akidounet a Reu, kiboi Peleg ngikaru ngamiae ngaarei ka ngikan-koomwon. Touriu ngide ngiche lusapa ka lupesur.

²⁰Araunet a ngikaru a Reu ngitomwon-uni ka ngiarei, touriu Serug.

²¹Ani akidounet a Serug, kiboi Reu ngikaru ngamiae ngaarei ka ngikan-kaarei. Touriu ngide ngiche lusapa ka lupesur.

²²Araunet a ngikaru a Serug ngitomwon-uni, touriu Naor.

²³Ani akidounet a Naor, kiboi Serug ngikaru ngamiae ngaarei. Touriu ngide ngiche lusapa ka lupesur.

²⁴Araunet a ngikaru a Naor ngitomwon-arei ka ngikan-koomwon, touriu Tera.

²⁵Ani akidounet a Tera, kiboi Naor ngikaru amiat apei ka ngitomon ka ngikan-koomwon. Touriu ngide ngiche lusapa ka lupesur.

²⁶Araunet a ngikaru a Tera ngitomwon-kaarei, touriu Aburam, ka Naor, ta Aran.

²⁷Eraakasi ngirora lugu ngika ngalesea a Tera. Auriuni Tera Aburam, ka Naor, ta Aran. Touriu Aran Loti.

²⁸Kisiau Aran totoan eringa apakeng Tera nyetoana. Atoani ngesi alore alo kolong edounere alo enyaritae Ur, alo eyei nakwap a Babilonia.

²⁹Kuutasi Aburam ka Naor. Anyaritae aberu a Aburam Sarai. Anyaritae aberu a Naor Milika. Arai Milika nakookeng a Aran alo arai apakeng a Isika.

³⁰Nakaneni akolupana Sarai, amam ikoku.

³¹Toriko Tera Aburam lo arai lokookeng, ka Loti lo arai lokookeng a Aran, alo arai lokookeng a Tera. Toriko tani Sarai na arai aberu a Aburam, alo arai lokookeng. Torotokis kesi alo Ur Anakwap a Babilonia, toloto nakwap a Kanaan. Ani enangete Aran, toloma neni.

³²Ani eraunete ngikaru a Tera ngamiae ngaarei ka ngikan, sodi totoan Tera alo Aran.