Read turkana Akisiakinet 12 Bible Online

Akisiakinet 12 - turkana bible

Akisiakinet 12

¹Tolimok Ekapolon Akuj Aburam tama, “Tonyou anakwap kon, ana eyakasi ngiyenet kon, ka ngitunga a awi a apakon, tolot nakwap nakedodikini ayong iyong.

²Ketiliwori ayong iyong ebukut loapolon. Kapiari ayong iyong, etiliwo ekiro kon lo eyenikinitae nabo a ekiro kon eraunete luche lu epiaritae.

³ Apiari ayong ngulu kipiarete iyong, ani ngini kilami iyong, elami ayong. Apiari ayong ngibukui daang kotere iyong.”[19]

⁴Sodi torotok Aburam loger lo alimokinitor Ekapolon Akuj ngesi, apot kirukosi ka Loti. Araakasi ngikaru a Aburam ngitomwon-kaarei ka ngikan na arotokinio alo Aran.

⁵Toriko Aburam Sarai na arai aberu keng, ka Loti lo arai lokookeng a lokaatokeng, tolemasi tani ebari daang lo apot kesi taanyut. Toriko tani ngikedalak lu aanyunete kesi alo Aran, toloto nakwap a Kanaan.

⁶Kitor Aburam kiding akwap ngina tanang Chekem ni ayei echoke lo italeunitoe ani enyaritae More. (Aringa ngitunga a akwap a Kanaan eyakasi neni ngirwa ngulu.)

⁷Tatakanu Ekapolon Akuj ani a Aburam tolimok tama, “Ainakini ayong ngalesea kon akwap naga.” Sodi todukok ngesi neni ekeno a ngakipeyos a Ekapolon Akuj ana atakanuuni anikeng.

⁸Ani erumor towosia moru lo ayei kide a Besel. Todukok ngesi eam neni. Ayei Besel lowae loa lotoo, toyei Ai lowae loa lokide. Todukok ngesi ekeno a ngakipeyos neni, sodi kilip enyarit ekiro a Ekapolon Akuj.

⁹ Sodi torubak awesit a Aburam elosi ngaren, eteni lowae loa Negeb.[20]

¹⁰Nakaneni min eron a akoro nakwap a Kanaan. Towosia Aburam nakwap a Misiri akiboi kaina kainyo arono akoro ngina noi.

¹¹Ani enangete kesi diyete Misiri, tolimok Aburam aberu keng Sarai tama, “Ayeni ayong atamar irai iyong aberu nakebusean.

¹²Nakianyungareta iyong Ngimisiri, etamarete irai iyong aberu kang, sodi kataara ayong kimiekis iyong.

¹³Tolimok iyong kesi atamar irai iyong nakaatokang, sodi katosubere ayong naajokak, nabo atoyuun ayong kotere iyong.”

¹⁴Ani enangi Aburam Misiri, kingolikis Ngimisiri atamar ibus aberu keng noi.

¹⁵Ani eanyungarete ngikapolok a arieng a Parao, alo arai ekapolon a Misiri aberu ngina, toloto tolimokis Parao atamar ibus ngesi noi. Torikoroe aberu ngina kai a Parao.

¹⁶ Tosubea ekapolon Parao Aburam ngakiro naajokak kotere Sarai. Nak Parao Aburam ngamesekin, ka ngaanei, ka ngaatuk, ka ngisikiria, ka ngikedalak, ta ngikaala.

¹⁷Nakaneni kitoting Ekapolon Akuj Parao ka ngitunga a awi keng ngidekesinei luaronok noi ani alemarea Parao Sarai na arai aberu a Aburam.

¹⁸Sodi tanyarau Parao Aburam kingit tama, “Anukiro nugu kisubea iyong ayong? Nyo pekilimokinea iyong ayong atamar erai Sarai aberu kon?

¹⁹Nyoni ibalar iyong erai nakaatokon, sodi kimiek iyong ayong alemari ngesi toliwor aberu kang? Kingolik a, aberu kon naga, toriko tonyou tolot kane.”

²⁰Kisuruor ekapolon ngolo ngitunga keng ngakiro a Aburam. Kitwarakis ngitunga ngulu Aburam anakwap kech. Kirukosi Aburam ka aberu keng, ta ibore daang ni arai ikeng.