Read turkana Akisiakinet 13 Bible Online

Akisiakinet 13 - turkana bible

Akisiakinet 13

¹Sodi tonyout Aburam ka aberu keng alo Misiri, tolemasi ibore daang ni arai ikech. Kirukosi kesi ka Loti tananga Negeb.[21]

²Abarit Aburam ngibaren, ka ngaropiyae, ta egolit.

³Towot ngesi alo Negeb tanang Besel, kiding Besel ka Ai, nikolong sek adukokinit ngesi eam keng,

⁴ka ekeno a ngakipeyos. Kilip Aburam kaneni enyarit ekiro a Akuj.

⁵Ayakasi Loti dang lo arukito ka Aburam ngisipaan a ngaatuk, ka ngamesekin. Ayakasi ngesi tani ngieaman.

⁶Nakaneni todidinger akwap ngina, tongop kesi kona iboikinosi wapei ani alalaketa ngibaren kech.

⁷Tongolopa ngikeyokok a Aburam ka ngikeyokok a Loti. (Ngirwa ngulu, aringa Ngikanaan ka Ngiperes elomito nakwap.)

⁸Sodi tolimok Aburam Loti tama, “Nyejoikinit iyong ka ayong, kori ngikeyokok yok engolopasi, kainyo kirai ngoni ngitunga lu kiyana.

⁹Aloger kangolo, atotiakas. Toseu ewae lo kijoikinit iyong. Ani kilot iyong lowae loa loteten, alosi ayong lowae loa lokedieny.”

¹⁰Kingolia Loti taanyunga adipo a Yorudan eyakasi ngakipi wadaang loger a amana ana a Ekapolon Akuj.[22] Ekwaan nabo ka akwap a Misiri, ewae lo etenere Soar. Araakasi ngirwa ngulu lu aringaakar Ekapolon Akuj nyinyasuna ngirerea a Sodom ka Gomora.

¹¹Sodi toseu Loti adipo na a Yorudan. Towot Loti toten kide. Ekokinete kesi etiakasi neni.

¹²Tolom Aburam nakwap a Kanaan, sodi tolom Loti lorerea lu ayakasi nadipo, diyete Sodom.

¹³Aroko ngitunga a Sodom. Asubete ngasechesea naaronok ani a Ekapolon Akuj.

¹⁴Ani kerotoki Loti kerumor, tolimok Ekapolon Akuj Aburam tama, “Kingolia lowaitin daang, ani iyei iyong kaneni.

¹⁵Kainyo akwap na itee iyong ngina, kainakini ayong iyong ka ngalesea kon jik.

¹⁶Elalakearosi ngalesea kon totiata ngalup, sodi ani kepedori itwaan akimarun ngalup, epedori tani akimarun ngalesea kon.

¹⁷Tonyou tokona tolot kiseme akwap etiae lo etia, kainyo kainakini ayong iyong.”

¹⁸ Sodi toyata Aburam eam keng, tolot tolom lochokei lu italeunitoe lu eyakasi Mamure, nakwap a Eburon. Todukok ngesi ekeno a ngakipeyos inaa.