Read turkana Akisiakinet 14 Bible Online

Akisiakinet 14 - turkana bible

Akisiakinet 14

¹Anyounete ngikapolok nguomwon lu anyaritae Amurapel loa akwap a Babilonia, ka Ariok loa akwap a Elasar, ka Keroriloama loa akwap a Elam, ta Tidal loa akwap a Goim.

²Toloto akitojwore ngikapolok ngikan lu anyaritae Bera loa akwap a Sodom, ka Biricha loa akwap a Gomora, ka Chinab loa akwap a Adima, ka Chemeber loa akwap a Seboim, ta ekapolon a akwap a Bela (ana enyaritae ekiro keng eche Soar).

³Kiriamariama ngajorei a ngikapolok alukan kangulu nadipo a Sidimu (ana enyaritae a ekiro a eche anam a Amakat).

⁴Apolokinit Kedoriloama kesi a ngikaru a ngitomon ka ngiarei. Ani enangi ekaru loa ngitomon ka nguuni, tongero kesi ngesi.

⁵Ani ekaru loa ngitomon ka nguomwon, pot Kedoriloama ka ngikapolok lu arukito ka ngesi kidwanga Ngirepai alo Achitaros-karinaim, kidwanga Ngisus alo Ham, kidwanga Ngiemim alo Chawe-kiriyasaim.

⁶Sodi kidwanga Ngiori alomor kech enyaritae Edom, tanang Eliparan lo eyei lokwaas a ariet.

⁷Ani erumor tobongut kesi tanangut Eminisipat (ni enyaritae a ekiro a eche Kadech). Kidwanga kesi ngitunga daang a akwap a Ngiamalek, kidwanga tani Ngiamor lu alomito Asason-tamar.

⁸Sodi tonyou ekapolon a Sodom, ka ekapolon a Gomora, ka ekapolon a Adima, ka ekapolon a Seboim, ta ekapolon a Bela (ana enyaritae a ekiro a eche Soar). Kiriamariama ngajorei kech daang nadipo a Sidimu.

⁹Kitojwoto kesi Kedoriloama lo arai ekapolon a Elam, ka Tidal lo arai ekapolon a Goim, ka Amurapel lo arai ekapolon a Babilonia, ta Arioko lo arai ekapolon a Elasar. Kitojwoto ngikapolok nguomwon ngikapolok ngikan.

¹⁰Eleleba ngaduon na ebokere elaam nadipo a Sidimu. Ani ematarosi ngikapolok a Sodom ka Gomora, tadakakinos epewae kech naduon nguna, tamataros luche lomor.

¹¹Tolemasi ngikapolok luomwon ngiboro daang lu ayakasi Sodom ka Gomora. Tolemasi tani akimuj torotokis.

¹²Torikosi tani Loti lo arai lokookeng a lokaatokeng a Aburam, losek alomit Sodom. Tolemasi tani ngiboro keng.

¹³Nakaneni tobuchun itwaan alojie kangolo tolot tolimok Aburam lo arai Eburaniait ngakiro a ejie. Alomit Aburam lochokei lu italeunitoe a Mamure alo erai Eamorit. Arai Mamure lokaatokeng a Echikol ka Aner, alu ebakito ka Aburam aapei.

¹⁴Ani iirari Aburam atamar arikor lochien keng, tochunak ngesi ngikiliok lukajwok a awi keng. Araakasi daang ngamiae ngauni ka ngitomon ka ngikan-kauni. Sodi kiwapa ngikapolok luomwon ngulu tananga ni enyaritae Dan.

¹⁵Ani enangete neni, totiak ngesi ngitunga keng a ngajorei, kitojwoto ngimoe nakwaare, sodi kidwang. Kirita ngesi kesi tananga Oba lo eyei kwap a Damasko.

¹⁶Sodi tobuu ngesi ngiboro daang, tobuu tani lochien keng Loti ka ngiboro keng daang, ta ngaberu ka ngitunga luche.

¹⁷Ani ebonguni Aburam ani edwangea Kedoriloama ka ngikapolok luche, tolot ekapolon a Sodom akisiriam ngesi anadipo a Chewa (ana enyaritae a ekiro a eche Adipo a Ekapolon).

¹⁸Yau Melikisedeki lo arai ekapolon a Salem amugati ka emuna lo epuritoe. Arai ngesi tani emuron a Akuj ana Epol Noi.

¹⁹ Sodi topia ngesi Aburam tolim tama, “Epiari Akuj na Epol Noi Aburam, Akuj nakolong asubuni adis ka akwap.

²⁰Kipuroe Akuj na Epol Noi, na erai ngesi idwangea iyong ngimoe kon.” Sodi tolemik Aburam Melikisedeki alemunet apei anatomon a ibore kadaang ani atingit ngesi.

²¹Tolimok ekapolon a Sodom Aburam tama, “Nakinae ayong ngitunga, sodi tolema iyong ngiboro.”

²²Nakaneni tolimok Aburam ekapolon a Sodom tama, “Ekong ayong alongaren Ekapolon Akuj Namerikanyer, nakolong asubuni adis ka akwap,

²³atamar nyalemari ayong arukan kori emasanit kori ibore cha daang ni erai ikon, sodi nyiitamarea iyong etabar Aburam.

²⁴Emam ibore achamuni ayong, mati akimuj na anyamete ngisorok ka ibore ni einakinio ngitunga lu kirukitor ayong. Kimiekisi Aner, ka Echikol, ta Mamure tolemasi ibore ni erai ikech.”