Read turkana Akisiakinet 15 Bible Online

Akisiakinet 15 - turkana bible

Akisiakinet 15

¹Ani ekisidi taanyunga Aburam akisingolikinet a Akuj sodi kiira Ekapolon Akuj elimokini ngesi ebala, “Aburam, wara nyikibul. Arai ayong aupwal kon. Epoloor ebachit kon noi.”

²Nakaneni tolim Aburam tama, “Ee, Ekapolon lo irai Ekapolon Akuj, nyoni kiinakini iyong ayong atorubakinite ayong emam ikoku. Nakaneni Elieser loa akwap a Damasko ngesi erai ekeruman a awi kang.”

³Tolim Aburam tama, “Kingolik a, emam ikoku kiinak iyong ayong, nakaneni ekedalan lo idounitoe anawi kang ngesi eliwor ekeruman a awi kang.”

⁴Sodi kiira ngesi Ekapolon Akuj elimokini ngesi ebala, “Nyirumi itwaan en awi kon, lokookon ngesi irumi awi kon.”

⁵Kipudo Ekapolon Akuj Aburam nikalapatan tolimok tama, “Kingolia nadis, sodi kimaru ngikanyer, erai kipedori iyong akiyen ekimar kech.” Sodi tolimok Ekapolon Akuj ngesi tama, “Etiauni alalau a ngalesea kon neni.”

⁶ Kigienokin ngesi Ekapolon Akuj kotere ngakiro nguna, talakar Ekapolon Akuj kimaru atamar etenoono eboyor keng.

⁷Tolimok Ekapolon Akuj Aburam tama, “Ayong ngesi Ekapolon Akuj nakolong karikuni iyong alo Ur alo a akwap a Babilonia, kainak ayong iyong akwap naga toliwor akon.”

⁸Nakaneni kingis Aburam tama, “Ekapolon lo irai Ekapolon Akuj, ekokini ayong ayeni atamar eliwor akwap naga akang ai?”

⁹Tatachak Ekapolon Akuj ngesi tama, “Yau ataok, ka akale, ta emesek loochi, lu enangito ngikaru kech nguuni. Yau tani akuuri ka itaok a kidomelio.”

¹⁰Inu Aburam Akuj ngitieng ngulu, tapak ngaarei, kiwaak kesi lowaitin ngiarei isibakit. Nakaneni nyepaka ngikieny ngaarei.

¹¹Ani epote ngataruk akinyam ngitieng lukatoak ngulu, kitwarak Aburam.

¹²Ani elosi akolong adooyor, kilurut Aburam ngaju naapotiok tojotoor, sodi tobul Aburam noi kotere ngakiro na erujae.

¹³Tolimok Ekapolon Akuj Aburam tama, “Toyen dir atamar eliworosi ngalesea kon ngipeyok anakwap a ache. Eliworosi kesi ngikedalak sodi toboliare a ngikaru a ngamiae a ngoomwon.

¹⁴Nakaneni erirae ayong ngibukui lu esubete kesi etich kech. Ani erumor, erotokinete ngalesea kon ebarito.

¹⁵Ani eliwor iyong, iboi iyong tomojong, totoan akaalimon, sodi kitonuk.

¹⁶Ebongunete kesi nege enangi ales na a ngoomwon, kainyo nyetwarakini ayong Ngiamor mati mono kerokearosi kesi noi.”

¹⁷Ani edooyori akolong sodi toribok akwap, abu ekeno lo apurui ka akinwaket na anoki kitoro kiding ngitieng lu apakak ngaarei.

¹⁸Akolongit ngina kaneni jik, tachamakin Ekapolon Akuj ka Aburam tolimok tama, “Ainakini ayong ngalesea kon akwap naga napei anangolol a Nili alo Misiri, tanang nangolol naapolon na enyaritae Eupurate.

¹⁹Ainakini tani akwap a Ngiken, ka na a Ngikenis, ka na a Ngikadimon,

²⁰ka na a Ngiiti, ka na a Ngiperes, ka na a Ngirepai,

²¹ka na a Ngiamor, ka na a Ngikanaan, ka na a Ngigirigach, ta na a Ngiebus.”